Kur pacienti ka frikë edhe vizitën te dentisti

Nga Debora Bellinzani

A është e mundur që pacientët të kenë frikë edhe nga pastrimi i gurëzave? Përgjigjja është PO dhe vjen nga një kërkim i realizuar së fundmi në Turqi: nuk ndodh në pjesën më të madhe të pacientëve, sigurisht por disa kanë ankth dhe dhimbje edhe kur i duhet t'i nënshtrohen një trajtimi stomatologjik të konsideruar i thjeshtë.

Pra mund të jetë e dobishme që stomatologu dhe higjienisti të dinë se cilat kategori pacientësh ndjejnë më shumë ankth dhe dhimbje në mënyrë që të përshtatin kur është e mundur, një sjellje të kujdesshme dhe veçanërisht të sigurt në lidhje me to. "Kërkimi ynë ka pasur pikërisht objektivin që të identifikojë pacientët më të ndjeshëm ndaj pastrimit të gurëzave për të mundur në njëfarë mënyrë t'i evidentojë ata përballë profesionistëve," - mbështet Esra Guzeldemir, kërkuese në Departamentin e periodontologjisë së Universitetit Baskent në Ankara. "Për këtë arsye kemi kërkuar të eliminojmë çdo faktor që mund ta bëjë një trajtim të ndryshëm nga tjetri, si për shembull delikatesa e profesionistit, duke i nënshtruar të gjithë vullnetarët ndaj një trajtimi të kryer në të njëjtën dhomë të izoluar nga zhurmat, në të njëjtin poltron dhe me të njëjtin profesionist."

Vullnetarët e përfshirë nga kërkimi kanë qenë 113 (72 femra dhe 41 meshkuj me moshë nga 19 - 58 vjeç) dhe rezultatet e marra nga testi i tyre që ka lidhje me ankthin dhe dhimbjen e provuar janë grumbulluar dhe publikuar në faqet e Journal of Periodontology. "E dhëna më e dukshme që ka dalë në pah ka qenë se femrat, individët me moshë më të re dhe jo duhanpirës kanë nivele ankthi më të larta më krahasim me pjesën tjetër të popullsisë," - vijon kërkuesja. "Në veçanti femrat, duke mos çuar deri në fund trajtimin për shkak të ndjesisë së dhimbjeve të forta në krahasim me meshkujt, tregojnë nivele më të larta ankthi kur bëhet fjalë për t'ju nënshtruar procedurës: kjo e dhënë është në përputhje me rezultatet e studimeve të shumta nga të cilat rezulton një prirje më e madhe për ankth te femrat, në krahasim me të gjitha procedurat stomatologjike." Për më tepër ka dy kategori pacientësh që përveç ankthit ndjejnë edhe dhimbje. "Në veçanti, të rinjtë në grup moshën nga 18 deri në 28 vjeç dhe jo duhanpirësit kanë nivele më të mëdha dhimbjeje të perceptuar gjatë trajtimit," - shprehet kërkuesja: "nëse për faktorin moshë mund të supozojmë se plakja sjell rritjen e pragut të dhimbjes dhe përjetimi lejon që të kihet më shumë eksperienca stomatologjike pozitive për të kompensuar frikën e provokuar nga ajo aktuale, për faktorin duhan diskutimi bëhet më kompleks: mendojmë se duhanpirësit, duke pasur përgjithësisht një shëndet oral më të keq mund të jenë më pak të ndjeshëm falë efekteve në organizëm për shkak të marrjes së vazhdueshme të nikotinës, sepse kjo substancë ka aftësinë për të modifikuar perceptimin e dhimbjes."
Sapo të identifikohen individët potencialisht në risk në krahasim me vuajtjen gjatë pastrimit të gurëzave profesionisti ka mundësi që të ndërhyjë në mënyrë më të personalizuar. "Është e mundur që në këtë pikë të thellohet njohuria mbi disa pacientë, në mënyrë që të grumbullohen eksperiencat e mundshme negative dhe të qetësohen personat që kanë më shumë nevojë," - përfundon Guzeldemir, - "fakti që pastrimi i gurëzave nuk është aspak një procedurë e dhimbshme është treguar nga fakti se pjesa më e madhe e personave si edhe e vullnetarëve tanë deklaron se kanë perceptuar nivele shumë të ulëta dhimbjeje; në të njëjtën kohë është e pamohueshme që për disa persona ky trajtim është veçanërisht i bezdisshëm dhe është e nevojshme që t'i kushtohet vëmendje veçanërisht në këto raste në mënyrë që pacientët të mos evitojnë ose të shtyjnë një trajtim periodik të nevojshëm për ruajtjen e shëndetit të tyre oral."

Përktheu: Valbona Spahia