Kur oferta për një zbardhim dhëmbësh falas shpëton një jetë!

Nga Norberto Maccagno

"Është e vështirë që të imagjinohet që 6 javë më parë po përgatitesha për një operacion. Ndërsa sot përgatitjet e mia janë për US Open Tennis."

Ky ka qenë një shkrim në profilin e Facebook nga Nicole Gibbs, teniste amerikane (134° në botë) që në datë 13 maj ka deklaruar, gjithnjë nëpërmjet rrjeteve sociale që dentisti i saj i kishte identifikuar një lezion dyshues që më pas ishte zbuluar se ishte një formë e rrallë tumorale e gjëndrave të pështymës.

Website sportiv ESPN ka shpjeguar më me detaje ngjarjen me një intervistë të tenistes, e cila ka treguar se pak ditë përpara festës së beqarisë së mikes së saj Caroline Wozniacki, Gibbs ka marrë një e-mail në të cilin një klinikë i ka dërguar një ofertë për një zbardhim dhëmbësh falas. Sigurisht që dëshironte një buzëqeshje rrëzëllitëse!
Gibbs tregon për ESPN se gjatë vizitës kur ka shkuar për zbardhimin e dhëmbëve, dentisti i ri ka vënë re një fryrje në qiellzë.
Tenistja është shprehur se ai ja ka vënë në dukje dhe se ajo i është përgjigjur se është në dijeni të kësaj fryrjeje por dentisti që e ka ndjekur më parë i kishte treguar se bëhej fjalë për një rritje të vogël kockore dhe nuk ka asgjë për t'u shqetësuar.

Por ky shpjegim nuk e ka bindur dentistin e ri, i cili ka insistuar që të kryhet një biopsi. Dhe përgjigjja e biopsisë ishte se bëhej fjalë për një rast të rrallë të "microcystic adnexal carcinoma".

Duke qenë se është diagnostikuar në kohë ka mjaftuar vetëm një ndërhyrje e vogël kirurgjikale dhe më pas tenistja ka rifilluar sërish aktivitetin sportiv.

Historia e Nicole Gibbs ka bërë për vete të gjithë ata që prej kohësh po punojnë për të sensibilizuar qytetarët dhe Institucionet mbi tumoret e zgavrës orale dhe mbi rëndësinë e parandalimit duke kryer vizita kontrolli te stomatologu.
Kjo është një histori që duhet cituar dhe duhet marrë si shembull i një rasti të frytshëm.

Por pyetja që shtrohet është: Nëse Gibbs nuk do kishte marrë një e-mail për një zbardhim dhëmbësh falas si do të kishte shkuar çështja?

Në këtë rast duhet shtuar se përveç vizitës falas që e ka shtyrë Gibbs të kryejë një kontroll stomatologjik, është edhe profesionaliteti i dentistit që nuk ka kryer thjesht zbardhimin e ofruar falas por edhe një kontroll të imtësishëm të zgavrës orale.

Me siguri ajo klinikë dentare që ka ofruar një shërbim falas e ka kryer për të tërhequr pacientë të rinj dhe për t'u bërë e njohur duke vendosur një raport me pacientët e rinj. Por në këtë rast vizita falas ka lejuar që të shpëtohet një jetë apo të paktën të shmangen probleme serioze.

Por a është kosto problemi i vërtetë i pacientit?
Mendoj se kanë të drejtë ata që thonë se gjithçka që mund ta bindë një qytetar që të shkojë për vizitë në një klinikë dentare është e mirë por edhe ata që mbështesin se ky mund të jetë një justifikim për të "rrëmbyer pacientët".

Besoj se ngjarja e tenistes Gibbs ka treguar sesi është e qartë se një dentist i vetëm mund të bëjë diferencën pasi është ai që me veprimet e tij vendos nëse do të jetë një tregtar apo një mjek, por këto dy zgjedhje mund të bashkekzistojnë nëse është për të mirën e pacientit.

Nëse ai që propozon një vizitë falas e bën në mënyrë të nxituar, sipërfaqësore ose më keq akoma propozon kura të padobishme apo të favorshme për ekonominë e klinikës dhe jo për shëndetin e pacientit, atëherë kanë të drejtë personat që thonë se ajo që është falas është thjesht tregti profesioni. Por problemi në këtë rast nuk lind sepse vizita është falas, një vizitë e pakujdesshme është problem qoftë nëse është falas qoftë nëse është me pagesë.

Nëse propozon një implant për 2€, problemi nuk është kosto por nëse ai dentist e ka blerë implantit duke e ditur që nuk përmbush kërkesat e sigurisë, e vendos keq duke mos i kushtuar kohën e mjaftueshme dhe profesionalitetin e nevojshëm për të kryer një rehabilitim sepse "gjithsesi pacienti paguan pak".

Pra si përfundim ajo që bën diferencën është gjithmonë vetëdija e dentistit, etika e tij profesionale dhe jo kosto e shërbimit, të paktën kjo ka dalë në pah nisur nga ngjarja e Gibbs.

Përktheu: Valbona Spahia