Rritet tregu i ortodoncisë DIY në SHBA

Alarmi: Dëme serioze në shëndetin e personave që kryejnë trajtime ortodontike me maskerinat transparente pa mbikëqyrjen e një stomatologu

Tregu i maskerinave ortodontike DIY (Do It Yourself - Bëje Vetë) është një treg që në Shtetet e Bashkuara të Amerikës është gjithnjë e më shumë në rritje, sipas një sondazhi të fundit, të kryer nga American Association of Orthodontists (AAO) që ka zbuluar sesi 13% e specialistëve ortodontistë kanë vizituar pacientë që kanë përdorur maskerina të blera sipas matjeve të tyre, me metodën "Bëje Vetë" dhe në disa prej këtyre pacientëve janë zbuluar dëmtime të pariparueshme në harkadat dentare.

Për këtë arsye vitin e kaluar AAO ka paraqitur denoncime në 36 shtete të Amerikës, duke mbështetur dhunimin e ligjeve që rregullojnë ushtrimin e profesionit të ortodontistit. Betejave të AAO dhe General Dental Council në Mbretërinë e Bashkuar (GDC), i është bashkuar edhe ASIO (Associazione Specialisti Italiani in Ortodonzia), duke shpallur kështu luftë kundër kësaj praktike të papërshtatshme, duke denoncuar nëpërmjet rrugëve ligjore kompanitë përgjegjëse. ASIO deklaron në një njoftim se i thotë "JO" ortodoncisë DIY dhe thekson se është kundër atyre që nëpërmjet marketingut i shesin pacientit maskerina transparente pa verifikuar më parë indikacionet e duhura dhe saktësinë e saj me vizita dhe kura të personalizuara tek ortodontisti.

Mekanizmi DIY ortodontik është ai që lejon pacientët nëpërmjet një kit-i që ju dërgohet në shtëpi, që të marrin vetë gjurmën e harkadave dentare, t'ia dorëzojnë një qendre që prodhon maskerina, e cila gjen diagnozën, projekton terapinë dhe ja nis pacientit në shtëpi setin me të cilin duhet të drejtojë dhëmbët.

Më pas evolucioni i sistemit është ai që është praktikuar prej disa kohësh në SHBA ku klientët i drejtohen një filiali të kompanisë ku nëpërmjet një skaneri i merret gjurma e më pas marrin në shtëpi sekuencën e maskerinave transparente.

"Terapitë me maskerina transparente janë sa interesante aq edhe delikate dhe të specializuara, sepse përshtaten vetëm me disa tipologji të malokluzionit dhe pothuajse gjithmonë nuk arrijnë 100% të rezultateve të premtuara në simulimet e ndryshme virtuale pre-trajtim që i tregohen pacientit," - vijon njoftimin presidenti Luzi.

"Në një artikull të fundit të New York Post, " - thotë presidenti i ASIO, - "është e dukshme sesi janë shtuar risqet për shëndetin oral të pacientëve."

Ai nënvizon sesi një maskerinë mund të çojë në një përkeqësim funksional të hapjes së gojës apo kafshimit apo te vetë pozicioni i dhëmbëve, ose në situata të tjera që duhen vlerësuar nga një specialist i ortodoncisë që di sesi të gjykojë mënyrat dhe kohët e përshtatshme të një trajtimi të saktë."

Në fund presidenti i ASIO përmbyll: - "Është thelbësor një komunikim i përshtatshëm me pacientin që ai të mund të jetë pjesëmarrës dhe i sigurt për kurën e tij, duke kuptuar plotësisht strategjitë e përshtatura për shëndetin e tij oral. Nuk mund të jetë i mjaftueshëm një test i shkurtër në internet dhe blerja e një pajisjeje për të korrigjuar malokluzionin, pa marrë në konsideratë jo vetëm sigurinë por mbi të gjitha një vlerësim të specializuar, një diagnozë të saktë, një monitorim të vazhdueshëm dhe konstant të progreseve për të arritur rezultatin e dëshiruar."

Përktheu: Valbona Spahia