Vlerësimi afatgjatë i recesioneve gingivale të incizivëve inferiorë pas trajtimit ortodontik

Nga Davide Elsido

Zhvillimi i recesioneve gingivale është lidhur me trajtimin ortodontik: megjithatë, një etiologji e qartë ende nuk është njohur.

Recesioni gingival është përkufizuar si spostim i indit marginal apikal në junksionin cement-smalt. Recesionet gingivale janë lidhur me ndjeshmërinë termike të dhëmbëve, shtimin e riskut të kariesit radikolar dhe përbëjnë një nga shqetësimet estetike kryesore te pacientët periodontalë.

Recesionet gingivale varen nga mosha dhe është cituar që në moshën 20 vjeçare 63% e meshkujve kaukazianë paraqesin një recesion. Kjo përqindje vazhdon të rritet dhe në moshën 50 vjeçare evidentohet që më shumë se 90% e pacientëve ka të paktën një recesion.

Zakonet siç janë larja e dhëmbëve në mënyrë traumatike, piercing, aktivitetet parafunksionale dhe lezionet okluzale janë lidhur shpesh me zhvillimin e recesioneve gingivale te pacientët jo-ortodontikë.

Është supozuar edhe që karakteristikat anatomike (si mungesa pre-ekzistuese e kockës kortikale alveolare për shkak të një eruptimi dentar ektopik jashtë harkadës dentare, gjerësia e vogël e gingivës së keratinizuar, biotipi gingival i hollë) janë faktorë të tjerë etiologjikë.

Zhvillimi i recesioneve gingivale është konsideruar një sekelë e zakonshme e trajtimit ortodontik. Ruajtja jo optimale e higjienës orale gjatë trajtimit dhe gingiviti kronik i kombinuar me lëvizjen ortodontike mund të shkaktojnë recesione gingivale.

Për më tepër, recesionet gingivale bukale lidhen me një simfisis të hollë, me një proklinim më të madh të incizivëve mandibularë (më shumë se 10 gradë në krahasim me linjën mandibulare) me zhvendosjen e regjionit cervikal të rrënjëve jashtë kockës kortikale alveolare.

Tipologjia e kërkimit dhe modaliteti i analizës
Në numrin e marsit 2019 në revistën The European Journal of Orthodontics është publikuar një artikull për të qartësuar lidhjen e mundshme ndërmjet zhvillimit të recesioneve labiale e linguale dhe inklinimit të incizivëve inferiorë gjatë trajtimit ortodontik, morfologjisë faciale vertikale, gjerësisë së procesit kockor alveolar, gjatësisë dhe gjerësisë së simfisis të tyre pas trajtimit ortodontik dhe mbajtjes për një kohë të gjatë.

Në këtë artikull, në modelet dentare dhe në radiografitë e kafkës në projektimin lateral për 126 pacientë ortodontikë janë kryer matjet dhe janë vlerësuar recesionet gingivale.

Rezultate dhe konkluzione
Autorët nuk kanë gjetur ndonjë lidhje ndërmjet gjerësisë së procesit kockor alveolar të apeksit, një nivelin e kreshtës dhe në mes të rrënjës, gjerësisë, modelit skeletik vertikal (AnsPns-Go'Me) dhe fillimit të recesionit bukal ose lingual. Zhvillimi i recesioneve të reja lidhej qartazi me seksin mashkull dhe me rritjen e moshës.

Lartësia e simfisis lidhej statistikisht me fillimin e recesioneve linguale në dhëmbët 3.2 dhe 4.2. raporti ndërmjet lartësisë së simfisis dhe gjerësisë në nivelin e kreshtës ka treguar një lidhje statistikisht të rëndësishme me praninë e recesioneve bukale dhe linguale.

Një proklinim i tepërt (≥10°) i incizivëve inferiorë ka treguar një lidhje me fillimin e recesioneve në 25% të rasteve.

Për më tepër: Pernet F, Vento C, Pandis N, Kiliaridis S. Long-term evaluation of lower incisors gingival recessions after orthodontic treatment. European Journal of Orthodontics 2019 Mar 29.

Përktheu: Valbona Spahia