Heqja e pigmentimeve gingivale të melaninës. Krahasimi i dy laserëve

Nga Lara Figini

Pigmentimi gingival i melaninës (GMP) është një fenomen i zakonshëm, i karakterizuar nga akumulimi i sasive të tepërta të melaninës në epitel për shkak të një hiperaktiviteti të melanociteve në shtresat qelizore bazë dhe ato mbi bazën e epitelit.

Kjo mund të shfaqet në çdo grupmoshë, por më shpesh në dekadën e parë dhe të dytë dhe është proporcionale në mënyrë direkte me shkallën e errësimit të epitelit. Nuk është një fenomen i limituar te njerëzit me ngjyrë, por mund të verifikohet në të gjitha grupet etnike, ndërmjet 0 dhe 89%, edhe pse është më e zakonshme në popullsitë afrikane, aziatike dhe mesdhetare.

Ndonjëherë këto pigmentime, veçanërisht nëse janë të pranishme në sektorët estetikë (si në gummy-smile), i sigurojnë pacientëve problematika estetike që i detyrojnë të kërkojnë ndihmën e stomatologut për heqjen e tyre.

Janë të shumta trajtimet e mundshme ndërmjet të cilëve: abrazioni me bisturi ose frezë të diamantuar, gingivektomi, elektrokirurgji, kriokirurgji, trajtime me agjentë kimikë me bazë 90% fenol ose 95% alkool, grafte gingivale të marrë nga zonat më pak të pigmentuara me laser.

Metoda e fundit është përshkruar si një metodë e sigurt dhe efikase, shumë pak invazive dhe e mirëpritur nga pjesa më e madhe e pacientëve.

Tipologjia e kërkimit dhe modaliteti i analizës
Në një studim të fundit të publikuar në Oral Surgery në nëntor 2018, autorët kanë krahasuar përdorimin e laserit Nd:YAG me një laser me dioda në trajtimin e GMP në bazë të periudhës së shërimit, recidivave të verifikuara më pas dhe pranueshmërinë nga pacienti. Njëzet individë me GMP të moderuar ose të rëndë janë përfshirë në këtë studim.

Me laserin Nd:YAG me pulsim të rrjedhshëm dhe gjatësi vale 1064 nm, janë trajtuar me GMP të dy kuadrantët djathtas dhe me laser me dioda me modalitet të rrjedhshëm, gjatësi vale 980 nm, janë trajtuar GMP në anën e majtë.

Vlerësimi klinik i kuadrantëve të ndryshëm është kryer në një distancë prej 1 jave, 1, 3, 6 dhe 9 muajsh pas ndërhyrjes.

Rezultate
Nga ekzaminimi klinik është parë që shërimi i plotë i gingivave është verifikuar në një periudhë nga 1 javë (30% dioda, 40% Nd:YAG) deri në 4 javë (70% dioda, 60% Nd:YAG).

Pas 9 muajsh nga ndërhyrja pjesa më e madhe e pacientëve kanë qenë të kënaqur nga procedura edhe pse recidiva ishte me 35%.

Analizat statistikore nuk kanë treguar diferenca të konsiderueshme ndërmjet laserit Nd:YAG dhe atij me dioda përsa i përket të gjitha variablave të hetuara (P>0,05).

Konkluzione
Nga të dhënat e nxjerra nga ky studim, që në fakt duhet të konfirmohen me punime të tjera analoge, mund të dalim në përfundimin se qoftë laseri Nd:YAG qoftë ai me dioda janë konsideruar efikasë për menaxhimin e pigmentimeve gingivale fiziologjike, edhe pse recidiva është ende e pranuar.

Implikacione klinike
Profesionistët e shëndetit mund të zgjedhin lirisht përdorimin e laserit Nd:YAG ose të atij me dioda në bazë të aftësive financiare personale dhe disponueshmërisë së pajisjeve, sepse të dy garantojnë rezultate të kënaqshme në heqjen e pigmentimeve gingivale të melaninës.

Për më tepër:
Rahaf Salahi Alasbah, Omar Hamadah. A comparative clinical study between the efficacy of Nd:YAG laser and diode laser in the management of physiologic gingival melanin pigmentation. Oral Surgery 2018;11:282-90.

Përktheu: Valbona Spahia