Efektiviteti i pastrimit mekanik të gjuhës në halitosis dhe veshjen e gjuhës: një rishikim sistemik

Nga Debora Bellinzani

Sipërfaqja e gjuhës është indi oral me ngarkesën më të madhe bakteriale. Këtë na e kanë rikujtuar disa kërkues holandezë që në një rishikim të literaturës së publikuar nga International Journal of Dental Hygiene, kanë vlerësuar efikasitetin e pastrimit manual të gjuhës për të luftuar halitosis. Nëse kryhet me instrumentet e përshtatshme, pastrimi i kurrizit të gjuhës është efikas në reduktimin e përbërjeve me squfur të paqëndrueshëm dhe mund të këshillohet si shtesë e praktikave normale të higjienës orale.
Në arkiva kërkuesit kanë gjetur tre studime klinike të randomizuar të kontrolluar dhe dy studime klinike të kontrolluar të randomizuar dhe dy studime të kontrolluar që kishin analizuar një grup vullnetarësh që kishin kryer çdo ditë larjen e dhëmbëve me furçë dhe pastrimin e gjuhës dhe një grup kontrolli që thjesht kishte larë dhëmbët me furçë.

"Pesë studimet e analizuara tregojnë se pastrimi i gjuhës është i dobishëm për reduktimin e përbërjeve me squfur të paqëndrueshëm qoftë kur kryhet me një furçë, qoftë kur kryhet me një pastrues gjuhe të përshtatshëm," - shpjegon Dagmar Else Slot nga Departamenti i periodontologjisë në Qendrën akademike të stomatologjisë në Amsterdam (ACTA), Holandë.
"Është mirë të dimë që shumë pacientë preferojnë ndërmjet dy instrumenteve pastruesin e gjuhës sepse duke pasur ekstremitetet më të sheshta në krahasim me furçën stimulon më lehtë refleksin faringeal."
Në këtë rishikim autorët kanë paraqitur rezultatet e studimeve të popullsisë për të dëshmuar që halitosis është një gjendje më e përhapur nga sa është supozuar. "Është vlerësuar se rreth 30% e popullsisë në Shtetet e Bashkuara vuan nga halitosis dhe përqindjet e ngjashme janë arritur nga kërkime të kryera në Japoni (24%), Kinë (27,5%) dhe Zvicër (32%)," - përmbledh Slot; - "pika e fillimit të rishikimit tonë ka qenë se në pjesën më të madhe të rasteve të origjinës së erës së pakëndshme është shtresa që vesh kurrizin e gjuhës, veçanërisht në pjesën posteriore. Por a ekzistojnë evidenca shkencore të faktit që pastrimi i saj sjell një përmirësim për pacientin? Përgjigjja është pozitive: pastrimi çdo ditë i gjuhës është në gjendje të reduktojë erën e pakëndshme, edhe pse për të njohur më mirë efikasitetin e kësaj praktike do të jenë të nevojshme studime më të thelluara te pacientët me halitosis kronike."

Heqja manuale e pjesëzave të ushqimeve dhe baktereve që kanë ngecur në papilat filiforme të pjesës posteriore të gjuhës është pra një veprim që mund të këshillohet te pacientët që vuajnë nga halitosis. Duke qenë se frika e stimulimit të refleksit faringeal është një nga arsyet që pengon personat për të pastruar gjuhën është mirë që të këshillojmë përdorimin e pastruesve të gjuhës në vend të një furçeje të butë në mënyrë që të sigurohet një sukses më i madh.

Përktheu: Valbona Spahia