Aget të dobishme... por jo për anestezi

Kurat alternative mund të ndihmojnë pacientët dhe mund të ndërhyjnë pikërisht te çrregullimet "kundër" të cilave mjekësia bashkëkohore nuk mund të bëjë shumë. Argumenti është përballuar nga një studim i fundit që ka marrë në konsideratë dhimbjen temporomandibulare, një çrregullim kronik që shkakton vuajtje dhe përkeqëson në mënyrë të konsiderueshme cilësinë e jetës së pacientit. Rishikimi i këtij studimi, i publikuar në Journal of Evidence-based Dental Practice, ka vlerësuar besueshmërinë duke arritur në konkluzionin se disa lloje të kurave alternative si akupunktura, kur kryhen në mënyrën e duhur dhe të kontrolluar, mund të ndihmojnë vërtetë ata që vuajnë për shkak të kësaj patologjie me efekte anësore.
"Studimi që është marrë në ekzaminim, i publikuar nga Journal of Alternative and Complemetary Medicine, kishte përfshirë 128 gra me moshë nga 25 deri në 55 vjeç që ishin nën trajtim në qendra të specializuara për çrregullimet temporomandibulare dhe që vuanin njëkohësisht nga çrregullime sistemike kronike, sindroma e lodhjes kronike ose fibromialgjia," - përshkruan revizori Mike John, docent në Divizionin e dhimbjes temporomandibulare dhe orofaciale në Universitetin e Minnesota në Minneapolis, në Shtetet e Bashkuara. "Këta pacientë, që për shkak të gjendjes së tyre shëndetësore vuanin edhe nga një formë pak a shumë e rëndë depresioni, janë ndarë në tre grupe dhe janë përdorur tipologji të ndryshme të kurave alternative."

Por cilat janë kurat për çrregullimet temporomandibulare?
John përshkruan më pas me detaje trajtimet alternative, që të kuptojmë se çfarë efekti kanë saktësisht në dhimbjen kronike. "Pacientët e grupit të parë janë trajtuar me instrumente nga mjekësia tradicionale kineze dhe pas vizitës që ka zgjatur një orë, pacientët i janë nënshtruar seancave të akupunkturës për gjysmë ore dy herë në javë për gjashtë javët e para dhe një herë çdo shtatë ditë për 8 javët vijuese të trajtimit. Përveç akupunkturës, që pa parashikuar stimulimin në rreth 20 pika në çdo seancë, pacientët kanë marrë një mjekim bimor, kanë dëgjuar regjistrime që favorizojnë relaksimin dhe i është kryer një masazh tuina, edhe ky një masazh tipik i mjekësisë tradicionale kineze dhe që ashtu si të gjitha trajtimet është kryer nga profesionistë ekspertë të fushës me më shumë se 5 vite eksperiencë në trajtimin specifik të çrregullimeve temporomandibulare," - vijon revizori. "Pacientët e grupit të dytë janë trajtuar me mjekësinë naturopatike, një praktikë që synon rivendosjen e ekuilibrit të organizmit nëpërmjet llojeve të ndryshme të zgjedhura në bazë të nevojave specifike të çdo pacienti. Të gjithë pacientët kanë kryer nëntë vizita ku secila ka zgjatur rreth një orë, në brendësi të të cilave trajtimi ka qenë i ndryshëm sipas simptomave dhe historisë së secilit: kryesisht dy profesionistë ekspertë, me më shumë se 4 vite eksperiencë specifike, kanë këshilluar një regjim ushqimor specifik dhe strategji që synojnë reduktimin e stresit dhe tensionit."

Rezultate
Të dy trajtimet, ai që ka përdorur instrumentet e mjekësisë tradicionale kineze dhe ai që është bazuar në parimet e naturopatisë, kanë sjellë rezultate që janë konfirmuar edhe nga rishikimi. "Pas tre muajsh trajtimi, duke përshtatur një shkallë nga 0 deri në 10 për matjen e dhimbjes temporomandibulare më intensive të perceptuar nga pacientët, qoftë mjekësia tradicionale kineze qoftë naturopatia kishin reduktuar intensitetin e dhimbjes për një vlerë që përfshinte gjysmë pike ose një pikë, një vlerë kjo jo e vogël për pacientët që vuanin prej 5-9 vitesh dhe që kanë perceptuar të parët përmirësimin," - shpjegon revizori. "Ndërkohë që ai që nuk ka funksionuar, apo e thënë ndryshe i ka ndihmuar pacientët në masë shumë të vogël ka qenë trajtimi i rezervuar për grupin e tretë të emëruar 'edukimi i pacientit dhe kura'. Duke dashur të eksperimentojmë nëse ndërgjegjësimi i plotë për patologjinë mund të na vijë në ndihmë, pacientët janë dërguar të frekuentojnë një leksion prej dy orësh për njohuritë mjekësore aktuale që lidhen me çrregullimet temporomandibulare. Kura për këto gra është përdorimi i një bite dhe disponibiliteti i dy ekspertëve në lidhje me metodat e vetë-kurimit dhe strategjive të kontrollit të dhimbjes."
Rezultatet e grupit të tretë, pra, nuk kanë qenë edhe aq të kënaqshme. "Reduktimi maksimal i intensitetit të dhimbjes që merret nga ky trajtim, sipas asaj që thonë pacientët, ka qenë më së shumti me gjysmë pike nga e njëjta shkallë vlerësimi," - përfundon John. "Vëmendja pra i drejtohet kurave komplementare që kanë treguar efikasitetin më të madh, sepse efektet e tyre mund të studiohen më tej por mbi të gjitha mund të vihen në dispozicion të pacientëve. Ashtu siç është njohur tashmë disa vite më parë edhe nga një revistë rigoroze si JADA, difuzioni i mjekësive komplementare për kurën e çrregullimeve temporomandibulare nuk mund të injorohet dhe në fakt nëse kryhet nga persona të kualifikuar me një përgatitje dhe eksperiencë të përshtatshme, mund t'i vijë në ndihmë pacientëve që nuk arrijnë të reduktojnë dhimbjen në një mënyrë tjetër."

Përktheu: Valbona Spahia