DSD për një analizë më të parashikueshme të buzëqeshjes

A janë të krahasueshëm softuerët në treg?

Nga Lorenzo Breschi

Sot një numër në rritje i pacientëve kërkon trajtime shumë estetike dhe stomatologjia estetike po shndërrohet gjithnjë e më shumë në një shqetësim për personat që dëshirojnë të përmirësojnë buzëqeshjen e tyre.

Stomatologjia kozmetike integron të gjitha zonat e stomatologjisë; prandaj është i nevojshëm një vlerësim estetik i plotë në çdo rast klinik me qëllim që të zgjidhet trajtimi më i mirë terapeutik.

Kriteret thelbësore për analizën estetike duhet të përfshijnë estetikën faciale, dentogingivale dhe dentare.

Një analizë e detajuar e buzëqeshjeve dhe fytyrave të pacientëve mund të kryhet nëpërmjet një wax-up tradicional ose duke përdorur një softuer më modern imazhesh për të arritur të ashtuquajturin Digital Smile Design (DSD). DSD është një instrument i ri që lejon analizën estetike, planifikimin e trajtimit virtual dhe pre-vizualizimin e terapisë përfundimtare nëpërmjet ripërpunimit të fotove dhe/ose skanimit në 3D të gojës së pacientëve. Për më tepër, design dixhital i buzëqeshjes përmirëson komunikimin ndërmjet dentistit, teknikut të dhëmbëve dhe pacientit, duke garantuar kështu një rezultat më të parashikueshëm për çdo pacient.

Është e mundur që të përdoren softuerë për DSD dhe disa prej tyre janë krijuar saktësisht për qëllime stomatologjike dhe janë shitur si softuerë specifikë për projektimin dixhital të buzëqeshjes për t'u përdorur në fushën dentare.

Ndërmjet tyre, më të famshmit janë Smile Designer Pro, Aesthetic Digital Smile Design, Cerec SW 4.2, Planmeca, Romexis Smile Design, VisagiSMile dhe DSD App nga Coachman. Megjithatë, edhe programet jo specifike, si Photoshop apo Keynote, mund të përshtaten nga dentistët dhe profesionistët dentarë si programe DSD.

Tipologjia e kërkimit dhe modaliteti i analizës
Një artikull i shkruar nga Doya Omar dhe Carolina Duarte që është publikuar në Saudi Dental Journal në fund të 2017, ka krahasuar disa programe DSD që përdoren më shpesh dhe ka analizuar aftësinë e tyre për të vlerësuar dhe modifikuar në mënyrë dixhitale parametrat estetikë të fytyrës, parametrat dento-gingivalë dhe ato të buzëqeshjes.

Në rishikimin aktual të literaturës gjashtëmbëdhjetë artikuj, të publikuar nga 2007 deri në 2017, janë seleksionuar pas një kërkimi elektronik me databaza të ndryshme. Me qëllim që të krahasohet kompetenca në analizën estetike të secilit program, janë marrë në konsideratë 12 parametra facialë, 3 dento-gingivalë dhe 5 parametra të analizës dentare. Sipas këtyre parametrave, numri i karakteristikave estetike të vlerësuara nga secili prej programeve të studiuara ka qenë llogaritja me pikë mbi 20.

Pikët më të larta janë observuar për Photoshop dhe Keynote, që kanë demonstruar se është e mundur të arrihet një analizë estetike më e plotë duke përdorur këto programe edhe nëse nuk janë projektuar për analiza të rasteve komplekse që kërkojnë një trajtim tjetër përveç restaurimeve të dhëmbëve të veçantë dhe në të cilat duhet të merren në konsideratë ndërhyrjet ortodontike apo kirurgjikale. Megjithatë, disavantazhi i tyre më i rëndësishëm është që kërkon një nivel të moderuar apo të avancuar formimi nga ana e dentistit në mënyrë që të përdoren të gjitha funksionet e nevojshme të softuerit në procesin e projektimit të buzëqeshjes.

Nga ana tjetër, pjesa më e madhe e programeve specifike të projektuar për klinikën dentare duket se lënë pas dore parametrat estetikë të fytyrës në vend që të përqendrohen te karakteristikat estetike stomatologjike dhe dentare. Deri më tani i vetmi program i projektuar nga dentisti që përfshin një analizë faciale më të plotë si plotësimi i analizës dentare dhe gingivale është softueri Aesthetic Digital Smile Design. Megjithatë, ana pozitive e softuerit dixhital është prania e funksionaliteteve kyçe që përmirësojnë aplikimet klinike dhe lehtësojnë dentistët dhe teknikët e dhëmbëve si edhe ofrojnë një fluks punimi dixhital që kërkon më pak kohë dhe një kurbë më të shkurtër të të mësuarit.

Për më tepër, disa prej tyre mund të lidhen me një frezë për të plotësuar procesin CAD/CAM (Cerec SW 4.2, ADSD). Të tjerë përfshijnë konceptin e Visagism dhe projektojnë buzëqeshjen në bazë të karakteristikave të personalitetit (VisagiSMile, App DSD).

Konkluzione
Programet e DSD inkorporojnë teknologjinë dixhitale në procesin e projektimit të buzëqeshjes dhe mund të përdoren si instrumente për diagnozën, vizualizimin e planit të trajtimit dhe komunikimin me pacientin dhe teknikun e dhëmbëve.

Procesi dixhital, nëse përdoret mirë është në gjendje të rrisë rezultatet e trajtimit, parashikueshmërinë dhe pranimin përfundimtar nga ana e pacientit. Megjithatë, jo të gjithë programet DSD të disponueshme ditët e sotme ofrojnë të njëjtën kompetencë për analizën e plotë të parametrave estetikë dento-facialë.

Edhe pse ky është një nga elementet më të rëndësishëm që duhet marrë në konsideratë në zgjedhjen e një programi DSD, faktorë të tjerë si lehtësia e përdorimit, aftësia e dokumentimit të rastit, kostot, efikasiteti i kohës, fluksi i punës, organizimi sistemik dhe kompaktibiliteti me fluksin e punës CAD/CAM ose ndonjë aparature tjetër dixhitale duhet të merren në konsideratë.

Për më tepër:
Omar D, Duarte C. The application of parameters for comprehensive smile esthetics by digital smile design programs: a review of literature. Saudi Dental Journal 2017 September; 30(1).

Përktheu: Valbona Spahia