Materialet bioaktive në silikat trikalcik dhe biokompaktibiliteti i tyre: analiza histologjike

Nga Lara Figini

Materialet në silikat trikalcik që janë sot në treg janë të ndryshëm dhe përdoren për procedurat e mbushjes së kanalit radikolar, për mbushjet apikale, në riparimet e perforimeve, në apeksifikime, në pulpotomi ose në mbulimin direkt dhe indirekt pulpar dhe në endodoncinë rigjenerative.

Edhe pse literatura numëron një sasi të konsiderueshme të studimeve mbi këto materiale, ato që kanë hetuar përgjigjen pulpare dhe periapikale pas përdorimit të këtyre materialeve dhe që lidhen me aspektet histologjike të indeve në kontakt për fat të keq janë të rrallë.

Tipologjia e kërkimit dhe modaliteti i analizës
Në një studim të fundit, të publikuar në Journal of Endodontics në shkurt 2020, autorët kanë kryer analizat histologjike dhe histobakteriologjike në 3 dhëmbë humanë që i janë nënshtruar pulpotomisë, ritrajtimit ortograd dhe apicektomisë, me mbushje respektive me material me bazë silikati trikalcik.

Dhëmbët i janë nënshtruar ekstraktimit pas 34 ditësh, 7 javësh dhe 20 muajsh, respektivisht. Dhëmbët e ekstraktuar janë inkorporuar në parafinë, janë ndarë në seksione, janë ngjyrosur me hematoksilinë-eozinë ose me teknikën e modifikuar të Brown dhe Brenn dhe janë ekzaminuar me mikroskopinë optike.

Rezultate
Observimi i përsëritur për të 3 rastet e paraqitur ka qenë mungesa e reaksioneve inflamatore, ose e trupave të huaj në ngarkim të indeve pritëse në kontakt me materialin me bazë silikat trikalcik, edhe pas periudhave të gjata dhe pavarësisht identifikimit të baktereve në tubulat dentinalë pranë pjesës së trajtimit.

Shërimi i plagëve ka qenë i shpejtë dhe është observuar riparimi/rigjenerimi i indeve të humbura me formimin e cementit të ri dhe trabekulave të reja kockore.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, duke pasur parasysh numrin shumë të limituar të kampioneve të analizuar, për shkak të natyrës anektodike të episodeve të paraqitura, mund të dalim në konkluzionin se materialet e përcaktuara si bioaktive me bazë silikati trikalcik janë shumë biokompaktibël.

Implikime klinike
Biokompaktibiliteti dhe bioaktiviteti i materialeve me bazë silikati trikalcik lejon mjekun që t'i përdorë me besim edhe kur duhet të vendoset në kontakt të ngushtë pulpar apo me indet periapikale.

Për më tepër:
Ricucci D, Grande NM, Plotino G, Tay FR. Histologic response of human pulp and periapical tissues to tricalcium silicate-based materials: a series of successfully treated cases. Journal of Endodontics 2020 Feb;46(2):307-17.

Përktheu: Valbona Spahia