Një studim i National Institute of Health ka verifikuar metodat e dekontaminimit për ripërdorimin e maskave FFP2

National Institute of Health (NIH) ka verifikuar ripërdorimin deri në tre herë të maskave N95 (FFP2) që i janë nënshtruar një protokolli dekontaminimi por saktëson se rezultatet ende nuk janë konfirmuar

Duke parë vështirësinë për marrjen e maskave N95 (FFP2) mund të jetë i dobishëm kërkimi i publikuar në sitin e NIH dhe i kryer nga vetë instituti, ku është treguar sesi kjo lloj maske mund të dekontaminohet në mënyrë efikase dhe të ruajë integritetin funksional për një përdorim maksimal prej 3 herësh.
Në uebsitin e NIH lexohet se studimi është kryer në një ambient laboratori të kontrolluar dhe rezultatet janë paraprake sepse ende nuk i janë nështruar një rishikimi të barabartë. Nga instituti shpjegojnë se zgjedhja është ajo që maska të shpërndahet në mënyrë të barabartë për të ndihmuar në menaxhimin e shëndetit publik në këtë emergjencë të COVID-19.

Studimi është kryer nga kërkuesit e Rocky Mountain Laboratories (RML) nga NIH në Hamilton, Montana, në bashkëpunim me Universitetin e Kalifornisë, në Los Angeles duke testuar dekontaminimin e pjesëve të vogla të filtruesit të N95 të cilat ishin ekspozuar ndaj virusit SARS-CoV2. Metodat e dekontaminimit që janë testuar përfshinin peroksidin e hidrogjenit të vaporizuar(VHP), nxehtësinë në 70 gradë, dritën ultravjollcë dhe sprajin me 70% etanol.

Të katër metodat kanë eliminuar virusin që është zbuluar në kampionet e maskës. Kërkuesit më pas kanë trajtuar të gjithë maskën me të njëjtat metoda dekontaminimi që janë përdorur në testim e më pas i janë dhënë vullnetarëve që t'i ripërdorin për dy orë për të kuptuar nëse kishin ruajtur elasticitetin dhe puthitjen e duhur në fytyrë. Dekontaminimi është përsëritur 3 herë me secilën maskë duke përdorur të njëjtën procedurë.

Shkencëtarët kanë verifikuar se spraji i etanolit ka dëmtuar integritetin e formës së maskën pas dy seksioneve të dekontaminimit dhe prandaj nuk e rekomandojnë. Maskat e trajtuara me dritën ultravjollcë dhe me nxehtësi termikisht të thatë kanë filluar të tregojnë probleme me puthitjen pas 3 dekontaminimeve, duke sugjeruar që trajtimi mund të lejojë një ripërdorim vetëm 2 herë. Ndërsa maskat e trajtuara me peroksid hidrogjeni të vaporizuar (VHP) nuk kanë pasur probleme dhe për këtë arsye kërkuesit kanë indikuar një ripërdorim të mundshëm deri në 3 herë.

Autorët kanë dalë në përfundimit se VHP do të rezultonte metoda e dekontaminimit më efikase, sepse asnjë virus nuk është zbuluar pas një trajtimi me të për 10 minuta.

Përktheu: Valbona Spahia