Funksionaliteti mastikator te pacientët me proteza të lëvizshme

Humbja e dhëmbëve përgjithësisht rritet me rritjen e moshës. Për të rikthyer funksionin mastikator te pacientët edentulë janë të disponueshme lloje të ndryshme trajtimesh protetike si proteza fikse, të lëvizshme dhe implantologjia.

Pacientët që kanë proteza totale të lëvizshme shumë shpesh kanë vështirësi që të mësohen me to dhe gjatë muajve të parë shfaqin shqetësime gjatë ngrënies për shkak të reduktimit të funksionalitetit mastikator.

Një trajtim protetik i kombinuar me një ndërhyrje dietetike mund të jetë efikas për të përmirësuar konsumimin e ushqimit dhe nutrientëve sidomos në muajt e parë të vendosjes së protezës totale të lëvizshme.

Tipologjia e kërkimit dhe modaliteti i analizës

Në një studim të publikuar në "Journal of Oral Rehabilitation", autorët kanë dhënë disa këshilla të thjeshta dietetike mbi funksionin mastikator tek individët të cilët kishin vendosur proteza të reja dentare totale.

Pjesëmarrësit u ndanë në mënyrë rastësore në:
• Grupi 1, apo grupi i ndërhyrjes, i përbërë nga 15 burra dhe 15 gra, me moshë mesatare 74-80 vjeç, të cilëve përveç dorëzimit të një proteze totale të lëvizshme iu dhanë edhe këshilla të thjeshta dietetike (duke i dhënë edhe një broshurë, versionin geriatrik të guidës ushqimore japoneze Spinning Top të nxjerrë nga ministria japoneze, që përmban informacione të dobishme sesi të praktikojnë një dietë të balancuar, "çfarë" të hamë dhe "sa" vakte duhen konsumuar në ditë) përveç këshillave mbi ruajtjen dhe pastrimin e protezës së re;
• Grupi 2, apo ai i kontrollit, i përbërë nga 15 burra dhe 14 gra, me moshë mesatare 78 vjeç, të cilëve përveç dorëzimit të protezës së re totale iu dhanë vetëm disa këshilla rreth kujdesit për të.

Funksioni mastikator u analizua duke përdorur një çamçakëz që ndryshon ngjyrë sipas aftësisë së përzierjes dhe prerjes. Aftësitë e përzierjes dhe prerjes u vlerësuan në kohën 0 (pre-trajtim) dhe 3 apo 6 muaj pas trajtimit.

Në çdo moment të vlerësimit, aftësia e përzierjes është krahasuar duke përdorur testin t të Student dhe aftësia e prerjes është krahasuar duke përdorur testin U të Mann-Whitney. Diferencat në brendësi të grupit në aftësinë e përzierjes u analizuan duke përdorur analizën e variacionit njëdrejtimësh me matje të përsëritura dhe ato rreth aftësisë së prerjes janë analizuar duke përdorur testin e Wilcoxon me korrigjime nga Bonferroni.

Rezultatet

Në Grupin 1 aftësia e përzierjes dhe prerjes rezultoi të ishte më e mirë në mënyrë të konsiderueshme pas 3 dhe 6 muajsh trajtimi.

Në Grupin e kontrollit aftësia e përzierjes rezultoi të ishte më e madhe në mënyrë të konsiderueshme pas 6 muajsh trajtimi.

Nga rezultatet e studimit, Grupi i ndërhyrjes, në të cilin pjesëmarrësit morën një protezë të re totale dhe këshilla dietetike, regjistroi një konsumim në mënyrë të konsiderueshme më të lartë të ushqimeve të caktuara (për shembull, mishi i pulës) dhe substanca nutritive (për shembull, proteinat) që në muajt e parë pas dorëzimit të protezës së re totale në krahasim me Grupin e kontrollit.

Konkluzionet

Nga të dhënat e nxjerra nga ky studim, që duhet të konfirmohen me punime të tjera analoge, autorët arritën në konkluzionin se ndjekja e protokolleve të thjeshta dietetike të një ushqyerje të shëndetshme me vakte të rregullta dhe me orare fikse mund të ndihmojë pacientët që të kenë një funksion mastikator më të përshtatshëm menjëherë pas vënies së një proteze të re totale të lëvizshme (3-6 muaj).

Implikimet klinike

Për të ndihmuar pacientët që të mësohen me një protezë të re totale të lëvizshme dhe të arrijnë një mastikacion më të mirë për një kohë të shkurtër, stomatologu (përveç këshillave mbi kujdesin dhe mirëmbajtjen e protezës së re) duhet të japë edhe informacione mbi përçueshmërinë e një ushqyerje të shëndetshme dhe të rregullt.

Për më shumë informacione:

Suzuki H, Kanazawa M, Komagamine Y, Iwaki M, Amagai N, Minakuchi S. Influence of simplified dietary advice combined with new complete denture fabrication on masticatory function of complete denture wearers. J Oral Rehabil 2019 Dec;46(12):1100-6.