Pacientë në kurim me barna antitrombocitare: çfarë duhet të bëjmë në rastin e ekstraksioneve dentare dhe kirurgjisë orale

Pacientët në kurë të vazhdueshme me barna antitrombocitare janë gjithmonë e më të shumtë. Këto barna administrohen si për parandalimin dhe menaxhimin e trombozës arteriale, ashtu dhe në vijim të patologjive kardiovaskulare si: ngjarje ishemike me ngarkesë të arterieve koronare, pas sëmundjeve të arterieve cerebrovaskulare dhe periferike, pas infarktit të miokardit dhe pas ndërhyrjeve të angioplastikës me pozicionim të "stentit" dhe pas ndërhyrjeve të "bypass-it" koronar.

Konsumi i barnave antitrombocitare i ekspozon pacientët ndaj një risku për gjakrrjedhje, të tillë që duhet t'ia bëjnë të ditur stomatologëve.

Këto risqe shpesh nxisin, gabimisht, që të ndalohen kurat nga frika e një gjakrrjedhje të tepërt gjatë ekstraksioneve dentare apo trajtimeve të kirurgjisë orale.

Kjo frikë duhet konsideruar e pabazë.

Në një studim retrospektiv të kohëve të fundit të publikuar në Journal of American Dental Association të shkurtit 2018, përmbyllet se përdorimi i barnave antitrombocitare - përfshirë skemën e kundër pllakëzimit të dyfishtë (DAPT) me bazë të aspirinës (ASA) dhe clopidogrel, (CLO) - nuk duhet të ndërpritet kurrë nga avulsioni i vetëm apo i shumëfishtë dentar, apo nga ndërhyrjet e vogla kirurgjikale. Edhe pacientët që konsumojnë antitrombocitarin e ri TICA mund t'i nënshtrohen qetësisht procedurave kirurgjikale dentare pa e ndërprerë terapinë. Nga ky studim rikonfirmohet se në pacientët me terapi antitrombocitare janë verifikuar episode të gjakrrjedhjes postoperatore të kontrollueshme thjesht me manovra lokale.

Autorët kanë vlerësuar gjakrrjedhjen intra dhe postoperatore sipas një shkalle me 4 nivele, duke kategorizuar gjakrrjedhjen si normale, të lehtë, të moderuar dhe të rëndë. Pas procedurës dentare sipas protokollit është aplikuar një tampon me garzë në njësinë e ekstraksionit ose në zonën kirurgjikale për 10 min. Normale, është vlerësuar një gjakrrjedhje e menaxhuar në harkun kohor prej 10 minutash. E lehtë, një gjakrrjedhje e menaxhuar brenda 30 minutash nëpërmjet kompresimit me garza. E moderuar, nëse do të kalonte 30 minutat dhe do të kërkonte aplikimin e sfungjerit të kolagjenit apo celulozës së oksiduar, qepje, djegie apo kompresim me një garzë të njomur në acid traneksamik (Transamina 10%, 25 miligram / 2,5 mililitra, Actavis). E rëndë, kur gjakrrjedhja do të vazhdonte për më shumë se 12 orë apo me formimin e hematomave të indeve të buta që do të kërkonin shtrimin në spital, një operacion tjetër apo transfuzion gjaku. Pas procedurës pacientët janë ekzaminuar sërish për t'u siguruar se hemorragjia ishte nën kontroll para largimit nga klinika. Pacientët që i janë nënshtruar një kirurgjie më të vogël orale kanë marrë gjithashtu 1.000 mg amoksicilinë çdo 12 orë për 5 ditë dhe 500 mg paracetamol (acetaminofene) nga 4 në 6 herë në ditë, që i janë rekomanduar të gjithë pacientëve (përfshirë pacientët që i janë nënshtruar ekstraksioneve dentare) si analgjeziku. Të gjithë pacientët janë ekzaminuar dhe kontrolluar pas 7 ditësh.

Rezultatet e studimit kanë qenë si më poshtë:

• 168 pacientë (75,7%) kanë kryer 1 apo më shumë ekstraksione dentare dhe 54 pacientë (24,3%) i janë nënshtruar procedurave të tjera kirurgjikale orale të vogla.
• Terapia antitrombocitare e regjistruar më shpesh ishte ajo me aspirinë (n = 123; 55,4%), ndjekur nga clopidogrel (n = 22; 9,9%) dhe ticagrelor (n = 17; 7,7%).
• 60 pacientë (27%) ishin në terapi me dy barna antitrombocitare.
• Gjakrrjedhja postoperatore është regjistruar në 4,9% të rasteve (11 në 222).
• Përqindjet e gjakrrjedhjes postoperatore në grupet e terapisë me aspirinë, clopidogrel, ticagrelor dhe dyfish antitrombocitar kanë qenë respektivisht me 3,2%, 4,5%, 5,9% dhe 8,3% (P ¡Ý 0,5).
• Asnjë nga pacientët nuk ka pasur episode të gjakrrjedhjes të zgjatura në kohë.

Nga të dhënat e këtij studimi mund të konfirmohen më tej udhëzimet e mbështetura deri më tani dhe që barnat antitrombocitare, përfshirë DAPT, nuk duhet të ndërpriten për shkak të ekstraksioneve dentare të vetme apo të shumëfishta ose nga ndërhyrjet e vogla kirurgjikale. Edhe pacientët që konsumojnë agjentin e ri antitrombocitar TICA mund t'i nënshtrohen qetësisht procedurave kirurgjikale dentare pa e ndërprerë terapinë.

Nën kujdesin e: Lara Figini, Koordinatore Shkencore Odontoiatria33

Për më tepër:
Bleeding frequency of patients taking ticagrelor, aspirin, clopidogrel, and dual antiplatelet therapy after tooth extraction and minor oral surgery. Ozge Doganay, Belir Atalay, Erhan Karadag, Ugur Aga, Mehmet Tugrul. The Journal of the American Dental Association Volume 149, Issue 2, February 2018, Pages 132¨C138

Përktheu: Erjola Taga