Rimodelimi gingival i zonës edentule para realizimit të urave anteriore maryland me ngjitje

Udhëzimet operative

Nga Daniele Stefano

Kriteret e estetikës së buzëqeshjes në sektorët frontalë kanë të bëjnë si me një estetikë të përkufizuar si "estetika e të bardhës" që nënkupton formën dhe ngjyrën e dhëmbëve por gjithashtu dhe me një estetikë të përcaktuar si "estetika e rozës". Kjo e fundit shfaqet shumë e rëndësishme në harmoninë e buzëqeshjes për një profil gingival me një arkitekturë të duhur për të lartësuar karakteristikat e një dhëmbi të këndshëm.

Për këtë arsye në zëvendësimin e elementit të vetëm anterior dentar, nëpërmjet një ure Maryland me ngjitje, nuk mund të anashkalojmë përftimin e një profili gingival korrespondues adekuat dhe që respekton kriteret anatomike të diktuara nga periodontologjia. Shpesh në zonat teke pa dhëmbë profili periodontal shfaqet i ndryshuar nga ekstraktimi i elementit dentar të kryer shumë kohë më parë ose nga prania e mbetjeve radikolare ose nga prania e elementeve dentare të qumështit (në moshë adulte) që kanë një profil emergjent, komplet të ndryshëm nga elementet dentarë të përhershëm.

Rimodelimi korrekt i profilit gingival - në vijim i quajtur parabola periodontale - ndodh shumë thjeshtë në rastin e rehabilitimit me një urë me fiksim klasik në shtylla dentare duke qenë e mundur që të modelojmë indet e buta nëpërmjet elementit të ndërmjetëm të provizorit në rezinë të fiksuar në monkonet proksimale.

Në rastin kur zgjedhja protetike shkon për një urë Maryland me fiksim me ngjitje, nuk është e mundur që t'i drejtohemi një provizori në rezinë klasike (për mungesë të mbajtjes së ekstremiteteve të fiksimit) dhe kështu rimodelimi i parabolës periodontale - si ndërhyrje parapërgatitore në urën përfundimtare - duhet të ndodhë nëpërmjet një pajisje të lëvizshme parciale. Në vitet e fundit me pajisjet klasike të lëvizshme parciale me kapëse me fill (wire clasps) janë shoqëruar pajisje të ndërtuara në një bllok të vetëm (nënkuptuar si bazë e protezës, element që duhet zëvendësuar dhe kapëse mbajtëse) me bazë najloni, të quajtur zakonisht proteza parciale të lëvizshme në valplast. Pajisje të tilla janë të pajisura me kapëse të bashkuara në bazën e protezës në ngjyrë transparente/rozë dhe veçanërisht mbajtëse.

Pajisja në fjalë duket jo vetëm më estetike në krahasim me ato të mëparshmet me kapëse me fill por edhe më pak e ndjeshme ndaj grumbullimit të biofilmit bakterial, duke lehtësuar shërimin e indeve periodontale në të gjithë ato rastet ku rimodelimi i tyre kalon nëpërmjet një ndërhyrje kirurgjikale ekstraktive ose të kirurgjisë muko-gingivale për të shtuar trashësinë e indeve të buta. Rasti klinik i prezantuar tregon se si nëpërmjet konfeksionimit të një pajisje të lëvizshme në najlon është bërë i mundur rimodelimi i parabolave gingivale në korrespondencë të zonave të kaninëve superiorë që paraqisnin mbetje radikolare të elementeve dentarë të qumështit 5.3 dhe 6.3. Pacienti për kushte sistematike të kompromentuara të shëndetit dhe me dëshirën e tij ka shprehur kërkesën që të heqë dorë nga terapia implantare për të zgjidhur mungesën e lindur të elementeve të përhershëm 1.3 dhe 2.3 (Fig. 1-2).

Fig. 1-2: Situata fillestare që tregon praninë e mbetjeve në njësinë radikolare të 5.3 dhe 6.3 dhe rasti klinik i përfunduar pas vendosjes së urave Maryland me ngjitje në qeramikë qelqi me zëvendësim të 1.3 dhe 2.3 (pamja në vizitën pas 3 vitesh)

Shkurtimisht, në vijim janë treguar, hap pas hapi, procedurat që kanë çuar në përftimin e një profili korrekt periodontal në korrespondencë të zonave të kaninëve superiorë dhe që më pas kanë lejuar futjen e dy urave Maryland me ngjitje në qeramikë për të zëvendësuar 1.3 dhe 2.3.

FAZA 1: Merren 2 gjurmë preliminare që do të shërbejnë për studimin e rastit për të udhëhequr wax-up dhe për të konfeksionuar pajisjen parciale të lëvizshme në najlon. (Fig. 3-4).

Laboranti dentar - në bazë të njohurive të profileve korrekte gingivale dhe në bazë të vëzhgimit të progresit të tyre në dhëmbët ngjitur - do të modelojë zonën edentule në model, në mënyrë që të prodhojë një element dentar zëvendësimi - të bashkuar me protezën parciale - që do të ketë një formë cervikale në gjendje që të "drejtojë" rritjen e indeve të buta periodontale dhe kështu të përftojë profilin e dëshiruar para se të marrë gjurmën përfundimtare për konfeksionimin e urës Maryland me ngjitje.

Fig. 3-4: Pajisja parciale e lëvizshme në najlon (valplast) realizuar mbi bazën e një vlerësimi preliminar nëpërmjet wax-up dhe modelimit të profileve gingivale të modelit në zonat e zëvendësimit të 1.3 dhe 2.3. Pamja superiore frontale (Fig. 3)

Fig. 4: Pamja palatale me protuberancave të projektuara për të modeluar profilet gingivale në korrespondencë të elementeve për zëvendësim

FAZA 2: Në rastin specifik ka qenë e mjaftueshme të kryejmë thjesht ekstraktimin e mbetjeve radikolare të elementeve të qumështit 5.3 dhe 5.6, të praktikojmë një heqje të lehtë të indit të keratinizuar periferik në alveolën e ekstraktimit nëpërmjet një freze të dedikuar por asnjë ndërhyrje kirurgjikale e mukozës gingivale nuk ka qenë e nevojshme me qëllimin për të rritur vëllimin gingival.

Fig. 5: Ekstraktimi dentar i 5.3 dhe heqja e lehtë e indit të keratinizuar periferik në njësinë e ekstraktimit.

FAZA 4: Pajisja e lëvizshme në najlon është futur, kontrolluar dhe rregulluar dhe i janë mundësuar pacientit të gjitha instruksionet për sa i përket mirëmbajtjes dhe pastrimit të pajisjes në kushtet e shtëpisë. Pacienti është vënë në regjim me klorheksidinë 0.12% për 15 ditë për të shmangur shfaqjen e komplikimeve infektive në pjesët post-ekstraktim.

FAZA 5-6: Në distancë prej 4 javësh nga futja e pajisjes, indet e buta periodontale të zonave edentule dukeshin të shëndetshme, me ngjyrë rozë dhe me pamjet tipike të lëkurës së portokallit, karakteristike e epitelëve oralë të keratinizuar. Parabolat periodontale shfaqeshin në morfologjinë e dëshiruar dhe të përcaktuar gjatë fazave diagnostikese të wax-up. Është programuar një takim javën vijuese për përgatitjen e sipërfaqeve të ngjitjes së urave Maryland me një vlerësim paraprak të karakteristikave kromatike të dhëmbëve ngjitur. Është marrë një gjurmë përfundimtare nëpërmjet gomës me polieter. Ndërkohë pacienti ka vijuar që të mbajë pajisjen e lëvizshme në najlon.

Fig. 6: Shërimi i njësisë së ekstraktimit 5.3 (katër javë) dhe kondicionimi i parabolës gingivale nëpërmjet pajisjes së lëvizshme në najlon.

Fig. 7: Detaje të gjurmës së precizionit pas përgatitjes së sipërfaqeve të ngjitjes së urës Maryland me ngjitje

FAZA 7: Cementimi adeziv i urave maryland - në këtë rast të realizuara në qeramikë qelqi me bazë të dislikatit të Litiumit - ka imponuar izolimin e fushës operatore nëpërmjet digës së gomës dhe është proceduar me fazat e ngjitjes së qeramikës në smaltin dentar paraprakisht të kondicionuar në mënyrën e duhur nga sipërfaqet respektive.

Fig. 8: Urat Maryland me ngjitje në qeramikë qelqi me bazë të disilikatit të Litiumit me zëvendësimin e 1.3 dhe 2.3.

Fig 9: Faza e cementimit me ngjitje nëpërmjet izolimit të fushës operatore me digë gome.

FAZA 8: Pacienti është rishikuar në distancën prej një jave dhe me takime të mëtejshme në vijim. Imazhet në vijim i referohen takimit pas tre vitesh.

Fig. 10-11: Aspekti cervikal i tranzicionit midis elementit të zëvendësimit 1.3 (Fig. 10) dhe 2.3 (Fig. 11) të urave Maryland me ngjitje me indin periodontal të rimodeluar nëpërmjet pajisjes së lëvizshme në najlon si fazë propedeutike.

Përktheu: Erjola Taga