Infeksionet orale në shtatzëni

A mund të nxisin komplikime që lidhen me shtatzëninë?

Nga Figini Lara

Çdo vit, 32 milion fëmijë lindin prematurë ose shumë të vegjël për moshën e tyre të gestacionit (Lee et al., 2013). Janë identifikuar faktorë të ndryshëm risku për lindjen e parakohshme (PTB) dhe reduktimin e rritjes intrauterine (IUGR) dhe midis tyre infeksionet te nëna janë shkaqet më të rëndësishme.

Ndër infeksionet e ndryshme te nëna janë për t'u numëruar dhe ato orale/periapikale të cilat edhe këto mund të kontribuojnë në fillimin e PTB dhe IUGR përmes një rruge direkte, në të cilën bakteret orale përhapen nëpërmjet fluksit të gjakut në indet e placentës dhe atyre të fetusit ose një rruge indirekte ku bakteret në brendësi të kavitetit oral mund të nxisin një përgjigje inflamatore sistemike që mund të influencojë indirekt në shtatzëni.

Megjithëse studime të mëparshme kanë dëshmuar se bakteret mund të transferohen nga goja në placentë (Aagaard et al., 2014) dhe njihet se infeksioni periapikal akut i nënës (PAI) mund të çojë në një inflamacion sistemik (Gomes et al., 2013), sërish kjo nuk është një provë që PAI mund të çojë në komplikime të shtatzënisë.

Tipologjia e kërkimit dhe mënyra e analizimit
Në një studim të publikuar në Oral Disease të korrikut 2018, autorët kanë krahasuar të dhënat e përftuara nga lindja te nënat malawian-e me dhe pa infeksione periapikale.

Si markatorë të një rruge direkte, autorët kanë identifikuar bakteret e placentës që përdorin një qasje rADN 16S dhe kanë vlerësuar provën histologjike të inflamacionit në placentën dhe në membranën amniotike. Kanë matur proteinën C-reaktive, alfa-1-glikoproteinën acide dhe kortizolin salivar si shënues të një rruge indirekte. Kanë përdorur gjithashtu modele të regresionit për të lidhur variablat parashikuese me kohëzgjatjen e shtatzënisë dhe dimensionet e të porsalindurit.

Rezultate
Në 1024 femra, 23,5% ka pasur një infeksion periapikal. Autorët nuk kanë hasur asnjë lidhje direkte midis infeksionit periapikal dhe ADN-së bakteriale ose inflamacionit histologjik prezent në placentë apo membranën amniotike.

Infeksioni periapikal është lidhur me një rritje të proteinës C-reaktive, të alfa-1-glikoproteinës acide dhe të përqendrimeve të kortizolit sistemik.

Konkluzione
Rezultatet e këtij studimi sugjerojnë se infeksioni periapikal (PAI) mund të shkaktojë komplikime në shtatzëni nëpërmjet një rruge indirekte, për sa është në gjendje që të nxisë një inflamacion sistemik, por PAI nuk mund të shkaktojë infeksionin e placentës nëpërmjet një rruge direkte. Studime të mëtejshme janë të nevojshme për të konfirmuar këto të dhëna.

Implikimet klinike
Në bazë të të dhënave të këtij studimi, stomatologu duhet t'i rekomandojë femrave shtatzënë që të ruajnë një gjendje optimale të shëndetit oral në nivelin e zgavrës së gojës. Për sa i përket infeksioneve orale mund të sigurojnë indirekt një inflamacion sistemik me rritjen e proteinës C-reaktive, të alfa-1-glikoproteinës acide dhe të përqendrimeve të kortizolit sistemik që mund të çojë në komplikime që lidhen me shtatzëninë.

Për më tepër:
• Aagaard K, Ma J, Antony KM, Ganu R, Petrosino J, Versalovic J. The placenta harbors a unique microbiome. Science Translational Medicine 2014;6(237):237ra65.
• Gomes MS, Blattner TC, Sant'Ana Filho M, Grecca FS, Hugo FN, Fouad AF, Reynolds MA. Can apical periodontitis modify systemic levels of inflammatory markers? A systematic review and meta-analysis. Journal of Endodontics 2013;39(10):1205-17.
• Lee AC, Katz J, Blencowe H, Cousens S, Kozuki N, Vogel JP et al. National and regional estimates of term and preterm babies born small for gestational age in 138 low-income and middle-income countries in 2010. The Lancet Global Health 2013;1(1):e26-e36.
• Harjunmaa U, Doyle R, Järnstedt J, Kamiza S, Jorgensen JM, Stewart CP, Shaw L3, Hallamaa L, Ashorn U, Klein N, Dewey KG, Maleta K, Ashorn P. Periapical infection may affect birth outcomes via systemic inflammation. Oral Dis 2018 Jul;24(5):847-55.

Përktheu: Erjola Taga