Jetëgjatësia e kurorave teke

Të dhënat e një studimi retrospektiv holandez

Kurorat janë relativisht të kushtueshme dhe për këtë arsye pacienti pret një jetëgjatësi të mirë të tyre.

Rishikimet sistematike kanë treguar se kurorat metal-qeramikë (PFM) tregojnë shkallë dështimi vjetore (AFR) midis 0,8 dhe 0,9% (Pjetursson, 2007; Sailer, 2015), kurorat në qeramikë me disilikat litiumi tregojnë një FR prej 0,7% ndërsa llojet e tjera të kurorave në qeramikë integrale kanë treguar një AFR lehtësisht superiore me 1,8-2% (Sailer, 2015).

Edhe pse këto rishikime sistematike bazohen në të dhënat klinike të randomizuara, nevojitet që të kemi parasysh se kohët e survejimit të studimeve klinike të përfshira janë relativisht të shkurtra dhe që shkallët vjetore të dështimit (AFR) kanë tendencën që të rriten me shtimin e kohës së survejimit (Opdam, 2014).

Gjithashtu, në këto studime klinike shpesh janë konsideruar vetëm pacientët me risk relativisht të ulët dhe për shembull individët me bruksizëm (të konsideruar në fakt me risk të lartë) janë përjashtuar nga shumë protokolle studimi (Opdam, 2018).

Tipologjia e kërkimit dhe mënyra e analizimit
Në një studim longitudinal retrospektiv të publikuar në Journal of Dentistry, korrik 2018, vlerësohet jetëgjatësia e kurorave teke të pozicionuara nga 8 dentistë të ndryshëm holandezë dhe janë hetuar faktorët e riskut që lidhen me dështimet e kurorave relative.

Autorët kanë analizuar 3404 kurora teke në 1557 pacientë të kryera nga viti 1996 deri në 2011. Janë llogaritur shkallët vjetore të dështimit (AFR) dhe variablat e lidhura me dështimin (suksesi dhe mbijetesa e kurorave) janë vlerësuar nëpërmjet analizave të regresionit të Cox.

Rezultate
Pjesa më e madhe e kurorave teke të vlerësuara në këtë studim janë përfaqësuar nga metal-qeramika PFM (63,8%) te molarët (58,1%) dhe te dhëmbët e pa trajtuar në mënyrë endodontike (65,4%). Koha e mbikëqyrjes së restaurimeve varion nga 3 javë në 11 vjet me një mesatare prej 7 vitesh. Shkalla mesatare e dështimeve vjetore në 11 vjet ka rezultuar të jetë 2,1% dhe 0,7% për suksesin dhe për mbijetesën e kurorave respektivisht. Faktori i riskut më domethënës për dështimin e kurorave teke ka rezultuar të jetë prania e një trajtimi endodontik.

Kurorat teke të pozicionuara në dhëmbë në zonat maksilare kanë shfaqur një shkallë dështimi më të lartë në krahasim me ato të pozicionuara në mandibul. Një risk i dështimit më i madh me 25% është vërejtur në kurorat e pozicionuara te meshkujt në krahasim me ato të ndodhura te femrat.

Konkluzione
Nga të dhënat e këtij studimi mund të përfundojmë se kurorat teke garantojnë një sukses të pranueshëm dhe të kënaqshëm në distancë me shkallët e mbijetesës më afatgjatë, kryesisht që varen nga eksperienca e profesionistit. Dhëmbët e trajtuar në mënyrë endodontike përfaqësojnë një faktor risku domethënës për kurorat e vendosura sipër, me predispozitën për dështime më të mëdha.

Implikimet klinike
Kurorat protetike teke ofrojnë garanci më të mira të jetëgjatësisë qofshin ato në metal-qeramikë apo në metal-free. Pavarësisht kësaj disa studime të literaturës kanë treguar një performancë lehtësisht inferiore të disa llojeve të kurorave në qeramikë integrale në krahasim me kurorat në metal qeramikë PFM; prandaj në sektorët me ngarkesë mastikatore të lartë preferohet që të synojmë për kurorat tradicionale.

Për më tepër:
• Pjetursson BE, Bragger U, Lang NP, Zwahlen M. Comparison of survival and rates of tooth-supported fixed dental prostheses (FDPs) and implantsupported FDPs and single crowns (SCs). Clin Oral Implants Res 2007;18(3):97-113.
• Sailer I, Makarov NA, Thoma DF, Zwahlen M, Pjetursson BE. All-ceramic or metal-ceramic tooth-supported fixed dental prostheses (FDPs): a systematic review of the survival and complication rates. Part I: Single crowns (SCs). Dent Mater 2015;31(6):603-23.
• Opdam NJ, van de Sande FH, Bronkhorst E, Cenci MS, Bottenberg P, Pallesen U et al. Longevity of posterior composite restorations: a systematic revieë and meta-analysis. J Dent Res 2014;93(10):943-9.
• Opdam NJ, Collares K, Hickel R, Bayne SC, Loomans BA, Cenci MS, Lynch CD, Correa MB, Demarco F, Schwendicke F, Wilson NHF. Clinical studies in restorative dentistry: new directions and new demands. Dent Mater 2018;34(1):1-12.
• Collares K, Correa MB, Bronkhorst EM, Laske M, Huysmans MDNJM, Opdam NJ. A practice based longevity study on single-unit crowns. J Dent 2018 Jul;74:43-8.

Lara Figini

Përktheu: Erjola Taga