Kurora në rezinë CAD/CAM

Një studim japonez ka hetuar për rezistencën ndaj frakturës te molarët

Nga Lara Figini

Kurorat në rezinë kompozitë CAD/CAM janë prodhuar nga kompresioni dhe nga polimerizimi në të nxehtë i rezinave të përbëra nga blloqe dhe më pas prodhohen këto kurora duke përdorur teknologjinë CAD/CAM. Në Japoni këto kurora përdoren gjerësisht në praktikën klinike që nga viti 2014, por janë ende të pakta studimet në literaturë që kanë hetuar vetitë mekanike dhe qëndrueshmërinë afatgjatë në kushtet intraorale.

Tipologjia e kërkimit dhe mënyra e analizës
Në një studim japonez in vitro, të publikuar në Journal of Prosthodontic Research në korrik 2018, është hetuar nëse kurorat në rezinë kompozitë CAD/CAM posedojnë një rezistencë të mjaftueshme ndaj frakturës për të përballuar ngarkesat mastikatore të krijuara në nivelin e dhëmbëve molarë. Hipoteza e pavlefshme ishte se rezistenca ndaj frakturës së kurorave në rezinë kompozitë CAD/CAM ishte më e vogël në krahasim me forcën e okluzionit maksimal mesatar të dhëmbëve molarë.

Autorët kanë përgatitur kurorat, të formuara si molari i parë superior, duke përdorur katër blloqe rezinë kompozitë CAD/CAM (blloku HC: HC, KZR-CAD HR: HR, KZR-CAD HR2: HR2; blloku Avencia: AVE). Si grup kontrolli janë përdorur kurorat CAD/CAM në xham-qeramikë në disilikat litiumi (IPS). Janë vlerësuar rezistenca e kurorave të fabrikuara ndaj frakturës dhe forca e përkuljes biaksiale.

Rezultate
Rezistenca e kurorave në rezinë kompozitë CAD/CAM ndaj frakturës, me përjashtim të HC, ka rezultuar se varion nga 3,3 kN deri në 3,9 kN, me vlera të ngjashme me ato që merren në grupin e kontrollit IPS (3,3 kN).

Në të kundërt, rezistenca ndaj përkuljes biaksiale e rezinave kompozitë CAD/CAM ndryshonte nga 175 MPa deri në 247 MPa dhe ishte në mënyrë të konsiderueshme më e ulët se ajo që merrej nga grupi i kontrollit IPS (360 MPa).

Konkluzione
Të gjithë llojet e rezinës kompozitë CAD/CAM që janë hetuar në këtë studim kanë treguar një rezistencë ndaj frakturës 3-4 herë më të lartë ndaj forcës okluzive mesatare të dhëmbit molar (700-900 N).

Nga të dhënat e nxjerra, që duhet të konfirmohen me studime të tjera të ngjashme, kurorat në rezinë kompozitë CAD/CAM garantojnë një rezistencë të mjaftueshme ndaj frakturës në sektorët posteriorë.

Implikimet klinike
Te kurorat e realizuara me rezinë kompozitë CAD/CAM frakturat observohen kryesisht në majat mezio- dhe disto-linguale, te kurorat në xham-qeramikë të disilikatit të litiumit (IPS) pas testit të rezistencës ndaj frakturës u evidentuan të çara të ndryshme por asnjë frakturë madhore.

Fraktura e qeramikës, ndryshe nga ajo e rezinave kompozitë, verifikohet me pak ose aspak deformim plastik dhe një frakturë e vogël përhapet në mënyrë të paqëndrueshme nën aplikimin e një force tërheqëse.

Për më tepër:
Okada R, Asakura M, Ando A, Kumano H, Ban S, Kawai T, Takebe J. Fracture strength testing of crowns made of CAD/CAM composite resins. J Prosthodont Res 2018 Jul;62(3):287-92.

Përktheu: Valbona Spahia