Teste të shpejta orale për diagnozën e HIV

Rëndësia e rolit të klinikave dentare

Nga Lara Figini

Për shkak të progreseve të rëndësishme në trajtimin dhe kurimin e HIV, personat sieropozitivë aktualisht kanë mundësinë që të jetojnë më gjatë dhe të kryejnë një jetë praktikisht normale. Ja përse sot më shumë se kurrë diagnostikimi i hershëm rezulton thelbësor, sepse sa më parë që të fillojë terapinë antiretrovirale (ART) pacienti aq më shumë mundësi ka që të arrijë supresionin viral. Përveç kësaj, individët në terapi antiretrovirale kanë më pak mundësi të transmetojnë HIV te të tjerët.

Vlerësohet se 30% e infeksioneve të reja nga HIV mund t'i atribuohen individëve të padiagnostikuar që transmetojnë sëmundjen te partnerët e tyre. Kryerja e testeve të shpejta për HIV në kontekste jotradicionale, siç mund të jetë klinika dentare, mund të përforcojë përpjekjet për të zgjeruar skrinimin e HIV për komunitetin në risk infeksioni duke i bërë testet më të aksesueshme dhe më të pranueshme nga ana e popullsisë.

Disa studiues mbështesin që fusha stomatologjike është një pjesë e rëndësishme por e nënvlerësuar për përdorimin e testeve të shpejta për HIV.

Tipologjia e kërkimit dhe modaliteti i analizës
Në një studim klinik të publikuar nga PLoS One në prill 2018 autorët kanë grumbulluar të dhënat e testeve të shpejta orale për HIV të kryer në klinikat dentare në jug të Floridës nga higjienistët dhe stomatologët gjatë vizitës rutinë.

Janë grumbulluar edhe të dhënat demografike, anamnestike dhe ato që lidhen me testet e shpejta të HIV te pacientët në fjalë.

Rezultate
Janë regjistruar 600 pacientë (mosha mesatare = 43 vjeç, IQR: 29-56 vjeç), 45% jo hispanikë me ngjyrë dhe 35% hispanikë/latinë, 83% me arsim të mesëm dhe 50% të papunë. Pjesa më e madhe (85%) ka pranuar me dëshirë testin e shpejtë oral për HIV dhe 14% nuk kishin kryer kurrë një testim për HIV më parë.

Motivet më të zakonshme që kanë shtyrë pacientët të pranojnë që t'i nënshtrohen testit kanë qenë dëshira për të njohur gjendjen e tyre në lidhje me HIV (56%) dhe fakti që testi ishte falas (54%). Ndërmjet 93 pacientëve (15%) që kanë refuzuar testin, 58% e ka bërë sepse e kishin kryer së fundmi një test të tillë dhe 31% sepse ishin të sigurt që ishin HIV-negativë; megjithatë, 74 pacientë (80%) që kanë refuzuar testin kanë afirmuar se ndjehen komod që të diskutojnë parandalimin e HIV me dentistin e tyre.

Nga 119 pacientë që kanë deklaruar se kanë pasur raporte seksuale me një partner sieropozitiv dhe/ose një që nuk ka qenë në dijeni të sëmundjes, 98 prej tyre (82%) e kanë pranuar këtë test.

Konkluzione
Klinikat stomatologjike mund të ofrojnë mundësi më të mëdha për të kryer teste të shpejta për HIV në një shkallë të lartë dhe kjo mund të paraqesë një potencial të madh për ndërprerjen dhe diagnostikimin e parakohshëm të virusit, duke i lejuar individëve të prekur që të fillonin terapinë antiretrovirale paraprakisht.

Nga të dhënat e nxjerra nga ky studim mund të dalim në përfundimin që testi i shpejtë oral për HIV i kryer gjatë një vizite kontrolli në klinikat dentare të jetë një procedurë e pranuar nga pacientët të cilët duket se ndjehen komod në trajtimin e kësaj tematike me dentistin e tyre.

Për më tepër:
Bradley ELP, Vidot DC, Gaul Z, Sutton MY, Pereyra M. Acceptability of oral rapid HIV testing at dental clinics in communities with high HIV prevalence in South Florida. PLoS One 2018;13(4):e0196323

Përktheu: Valbona Spahia