Efikasiteti i pastave të reja me fluorur kallaji të stabilizuar me fosfat zinku

Nga Lara Figini

Ashtu si për pjesën më të madhe të sëmundjeve kronike edhe për periodontitin është e mundur që të shmanget fillimi dhe avancimi i tij duke mbajtur nën kontroll faktorët shkaktarë.

Kontrollimi i biofilmit dentar nëpërmjet larjes mekanike të dhëmbëve është me rëndësi thelbësore për ruajtjen e shëndetit periodontal dhe si pasojë edhe të shëndetit sistematik.

Fluoruri i kallajit (SnF2) është bakteriostatik dhe baktericid e mund të reduktojë rritjen bakteriale si edhe të kontrollojë biofilmin, megjithatë formulimi i tij me efikasitet maksimal duhet të lejojë SnF2 që të qëndrojë në një gjendje të paoksiduar.

Formulime të shumta janë paraqitur nga kompanitë e prodhimit të pastave të dhëmbëve për të shmangur oksidimin, ndër të cilët së fundmi është propozuar inkorporimi i fosfatit të zinkut.

Tipologjia e kërkimit dhe modaliteti i analizës
Në një studim që do të publikohet në faqen e JADA në prill 2019 autorët kanë krahasuar rezultatet e marra nëpërmjet larjes së dhëmbëve me një pastë me fluorur kallaji (SnF2) të stabilizuar me fosfat zinku duke e krahasuar me një pastë tradicionale me fluorur natriumi në kontrollin e pllakës dhe gingivitit me follow-up prej 6 muajsh.

Njëqind pjesëmarrës adultë janë regjistruar në këtë studim të kryer në Chengdu, në Kinë. Caktimi në njërin prej grupeve (grupi 1 ose grupi eksperimental: përdorimi i pastës me fluorur kallaji të stabilizuar me fosfat zinku; grupi 2 ose grupi i kontrollit: përdorimi i pastës me fluorur natriumi) ka qenë rastësor dhe në double blind për pacientët dhe ekzaminuesit. Pjesëmarrësit e përfshirë në studim kanë marrë instruksione rreth përdorimit të pastës së caktuar.

Në tre seanca (me kohë 0, 3 dhe 6 muaj) autorët kanë matur treguesit e ndryshëm gingivalë dhe ata të pllakës për të përcaktuar efikasitetin klinik të pastës me SnF2 të stabilizuar në krahasim me atë të pastës me fluorur.

Rezultatet
Nëntëdhjetë e tetë pjesëmarrës kanë përfunduar studimin. Të dyja grupet (ai eksperimental dhe ai i kontrollit) kanë treguar reduktime statistikisht të konsiderueshme të inflamacionit gingival dhe një përmirësim të kontrollit të pllakës për 3 dhe 6 muaj follow-up.

Për më tepër, pasta eksperimentale ka treguar reduktime statistikisht të rëndësishme për të gjithë treguesit në krahasim me ato të evidentuara për pastën e kontrollit (P < .001).

Përfundime
Nga të dhënat e nxjerra nga ky studim eksperimental, që duhet të konfirmohen më tej me rezultate të punimeve të tjera analoge, mund të dalim në përfundimin se pastat me bazë të fluorurit të kallajit të stabilizuar me fosfat zinku garantojnë rezultate të shkëlqyera mbi kontrollin e pllakës dhe të gingivitit pas gjashtë muajsh përdorimi.

Implikacionet klinike
Pasta me formulim të ri me bazë fluoruri të kallajit të stabilizuar me fosfat zinku përmirëson shëndetin gingival dhe periodontal duke ndihmuar pacientët që të arrijnë një shëndet më të mirë oral.

Për më tepër:
Deyu Hu, Xue Li, Hongchun Liu, Luis R. Mateo, Amarpreet Sabharwal, Guofeng Xu, Gregory Szewczyk, Maria Ryan, Yun-Po Zhang. Evaluation of a stabilized stannous fluoride dentifrice on dental plaque and gingivitis in a randomized controlled trial with 6-month follow-up. JADA aprile 2019:150(4 suppl):S32-7.

Përktheu: Valbona Spahia