Zbulimi i ngjyrës së dhëmbëve. Cila është metoda më e besueshme?

Nga Lara Figini

Zbulimi i ngjyrës së dhëmbëve është një manovër jo e thjeshtë, ndryshe nga ajo që mund të duket dhe varet shumë nga kompetenca e mjekut, nga lodhja vizuale dhe nga burimi i dritës përreth. Gjithashtu duhet të nënvizojmë se pritshmëritë estetike të pacientëve rreth restaurimeve konservative dhe protetike janë gjithmonë e më të larta.
Zbulimi i ngjyrës mund të kryet nga stomatologu duke përdorur metodën vizuale klasike me apo pa ndihmën instrumentale të një spektrofotometri ose një kolorimetri apo, të pajisjes së blerë së fundmi, skanerit dixhital intraoral.
Por a japin rezultate të mbivendosura këto tre metoda apo ndonjëra prej tyre dëshmon se e zbulon ngjyrën në mënyrë më të besueshme dhe reale?

Tipologjia e kërkimit dhe mënyra e analizimit
Në një studim të publikuar në Journal of Prosthetic Dentistry, në shkurt 2019 autorët kanë konfirmuar besueshmërinë e metodave të ndryshme vizuale dhe instrumentale për zbulimin e ngjyrës së dhëmbëve në fushën stomatologjike.
Korrespondenca kromatike vizuale është kryer nga 3 mjekë ekspertë që kanë përdorur 2 shkallë të ndryshme ngjyrash (VITA Classical A1-D4 dhe VITA Toothguide 3D-MASTER me 29 master; VITA Zahnfabrik) me dhe pa ndihmën e një pajisje korrigjuese të dritës (Smile Lire, Smile Line).
Gjithashtu edhe një skaner intraoral (TRIOS; 3Shape A/S) edhe një spektrofotometër (VITA Easyshade Advance 4.0; VITA Zahnfabrik) janë përdorur për korrespondencën e ngjyrave.
Të gjitha zbulimet instrumentale janë përsëritur 3 herë për të përcaktuar përsëritshmërinë. Seksionet e zbulimit të ngjyrës për secilën metodë janë kryer me të njëjtin ndriçim të kontrolluar në një të tretën meziale të incizivit qendror të djathtë superior të 28 pjesëmarrësve.
Testi statistikor kapa i Fleiss është përdorur për të vlerësuar besueshmërinë e secilës metodë. Testi statistikor kapa i ponderuar është përdorur për të vlerësuar akordin midis sfumaturave të kombinuara me metodat e ndryshme (a = 0.5).

Rezultate
Metodat instrumentale kanë rezultuar më të sakta se ato vizuale. Performanca më e mirë është hasur me skanerin intraoral të konfiguruar për shkallën 3D-MASTER dhe me spektrofotometrin e konfiguruar për shkallën VITA Classical.
Metoda më e mirë e kombinimit të ngjyrës vizuale ka rezultuar të jetë shkalla VITA Classical lidhur me pajisjen e korrigjimit të dritës. Shkalla klasike pa pajisjen e korrigjimit të dritës ka dëshmuar besueshmërinë më të ulët.

Konkluzione
Nga të dhënat e zbuluara nga ky studim që duhet të gjejnë konfirmim me punë të tjera analoge, mund të përmbyllim se metodat instrumentale janë më të besueshme se ato vizuale për zbulimin e ngjyrës së dhëmbëve.

Implikimet klinike
Besueshmëria e metodave instrumentale i sugjeron fortësisht stomatologut përdorimin suplementar të instrumenteve për zbulimin e ngjyrës dentare në praktikën e tij klinike si shtesë e metodës klasike vizuale.
Për më tepër:
Walleska Feijó Liberato, Isadora Carvalho Barreto, Priscila Paganini Costa, Cristina Costa de Almeida, Welson Pimentel, Rodrigo Tiossi. A comparison between visual, intraoral scanner, and spectrophotometer shade matching: a clinical study. J Prosthet Dent feb 2019;121:271-5.

Përktheu: Erjola Taga