Efikasiteti i laserit në reduktimin e komplikimeve post-operative pas heqjes së molarëve të tretë

Procedurat kirurgjikale për të hequr molarët e tretë (dhëmbët e pjekurisë) shpesh lidhen me komplikime intra dhe post-operative të papëlqyeshme nga pacientët. Pjesa më e madhe e komplikimeve dhe e shqetësimeve post-operative si dhimbja, ënjtja dhe trismus janë të nxitur nga përgjigjja inflamatore e shkaktuar si pasojë e traumës kirurgjikale.
Metoda të ndryshme janë përdorur për të reduktuar në minimum komplikimet post-operative si për shembull administrimi i kortikosteroidëve lokalë apo sistemikë, barnave anti-inflamatorë dhe terapisë me laser me nivel të ulët (LLLT).
LLLT është një teknikë e favorshme dhe në bazë të dozës, të gjatësisë së valës dhe të kushteve të sipërfaqes ku do të aplikohet, mund të nxisë një shumëllojshmëri përgjigjesh biologjike. Përdorimi i LLLT ka treguar se ka efikasitet kundra ënjtjes, e shkaktuar nga veprimi direkt mbi enët limfatike (rritje e numrit) dhe në enët e gjakut (zvogëlim i përshkueshmërisë).
Në një studim klinik të publikuar në "International Journal of Oral and Maxillofacial Surgery" mars 2016, tregohet se përdorimi i terapisë me laser me nivel të ulët dhe me një dozë të vetme pas heqjes së molarëve të tretë, është efikase për të reduktuar komplikimet post-operative si ënjtja, dhimbja dhe trismus.

Ky studim i kryqëzuar ka përfshirë 22 pacientë të shëndetshëm me moshë më të madhe se 17 vjeç, me nevojën për të hequr të dy molarët e tretë mandibularë, me pozicion radiografik të ngjashëm. Menjëherë pas heqjes, në anën e djathtë apo të majtë të përzgjedhura në mënyrë të rastësishme është ndjekur terapia me laser me një dozë të vetme LLLT (grup eksperimental). E njëjta procedurë heqjeje është kryer 21 ditë më pas për molarin tjetër të tretë inferior, pa aplikim të LLLT (grup kontrolli). Terapia me laser LLLT është aplikuar në 10 pika: katër intraorale në afërsi me alevolën pas heqjes (bukale, distale, linguale, në qendër të alveolës post-operative) dhe gjashtë ekstraorale përgjatë rrjedhës së muskulit masseter.
Intensiteti i dhimbjes është vlerësuar nëpërmjet shkallës analogjike VAS, ndërkohë që ënjtja është matur si distanca nga tragusi në mesin e bazës së mjekrës. Trismus është vlerësuar nëpërmjet gradës së hapjes së gojës.

Të dhënat janë mbledhur me katër intervale kohe:
- para ndërhyrjes kirurgjikale, (T0)
- menjëherë pas ndërhyrjes (T1)
- 48 orë pas ndërhyrjes, (T2)
- 7 ditë pas ndërhyrjes, (T3)

Nga rezultatet e përftuara nga ky studim është zbuluar se krahasuar me grupin e kontrollit, grupi i studimit i trajtuar me LLLT ka treguar një reduktim domethënës të dhimbjes, ënjtjes dhe trismus në 48 orë dhe 7 ditë pas ndërhyrjes.

Nën kujdesin e : Lara Figini, Koordinatore Shkencore e Odontoiatria33

Bibliografia:
Efficacy of a single dose of low-level laser therapy in reducing pain, swelling, and trismus following third molar extraction surgery. A.Landucci, A.C. Wosny, L.C. Uetanabaro, A. Moro, M.R. Araujo. International Journal of Oral and Maxillofacial Surgery. Volume 45, Issue 3, March 2016, Pages 392-398

Përktheu: Erjola Taga