Efikasiteti i krioterapisë në menaxhimin e dhimbjes dhe ënjtjes në kirurgjinë ekstraktive të molarëve të tretë

Nga Lara Figini

Ekstraksioni i molarëve të tretë është një procedurë rutinë për kirurgët oralë dhe maksilo-facialë; por për fat të keq është lidhur shpesh me komplikacionet post-operative si dhimbja, ënjtja dhe trismus.

Këto komplikacione vijnë nga një përgjigje inflamatore, që është pasojë e drejtpërdrejtë dhe e menjëhershme e procedurës kirurgjikale dhe që mund të limitojë funksionet ditore të pacientëve në fazën e shërimit, duke dëmtuar cilësinë e jetës së tyre.

Administrimi i barnave anti-inflamatore dhe analgjezike pas operacionit është metodika e përdorur më gjerësisht për të kontrolluar dhimbjen dhe inflamacionin post-operativ, por këto barna mund të kenë efekte anësore në nivelin e traktit gastrointestinal dhe mund të prokurojnë çrregullime kardiovaskulare.

Në kirurgjinë orale dhe maksilo-faciale, krioterapia është një ndërhyrje jo farmakologjike popullore, e përdorur në menaxhimin e komplikacioneve inflamatore post-operative të menjëhershme dhe ka si qëllim kryesor heqjen e nxehtësisë së trupit për qëllime terapeutike.

Tipologjia e kërkimit dhe modaliteti i analizës
Në një rishikim sistematik të publikuar në JADA në prill 2019, autorët kanë dashur të vlerësojnë hetimin e efikasitetit të krioterapisë në reduktimin e dhimbjes, trismus dhe ënjtjes së fytyrës te pacientët që i nënshtrohen kirurgjisë ekstraktive të molarëve të tretë.

Autorët kanë kryer një kërkim të studimeve klinike të randomizuara mbi këtë argument nëpërmjet PubMed, Web of Science, SCOPUS, Cochrane Central Register of Controlled Trials, ClinicalTrials.gov, Google Scholar dhe OpenThesis.

Kriteret e pranueshmërisë paraqiteshin nga studime që do të analizonin pacientët që i ishin nënshtruar heqjes së molarëve të tretë te të cilët do të krahasoheshin trajtimet e krioterapisë post-operative me trajtimet pa krioterapi si ndihmë. Rezultati primar paraqitej nga dhimbja post-operative dhe rezultatet sekondare paraqiteshin nga dhimbja faciale dhe trismus.

Pas marrjes së të dhënave dhe vlerësimit të cilësisë së studimeve, autorët kanë kryer meta-analizën.

Rezultate
Gjashtë studime janë përfshirë në rishikimin përfundimtar dhe në meta-analizë. Diferenca statistikisht të rëndësishme janë ndeshur në intensitetin e dhimbjes ditën e dytë dhe të tretë pas operacionit.

Asnjë provë nuk është gjetur rreth efikasitetit të krioterapisë në reduktimin e trismus dhe ënjtjes së fytyrës. Cilësia e studimeve është klasifikuar nga autorët si e ulët.

Konkluzione
Nga të dhënat e nxjerra nga ky rishikim, që duhet të konfirmohen nga studime të tjera analoge, mund të dalim në përfundimin se evidenca sugjeron që krioterapia mund të ofrojë një përfitim të vogël në reduktimin e dhimbjes pas trajtimit ekstraktiv të molarit të tretë në ditët e para pas ndërhyrjes, por nuk është efikase në ënjtjen e fytyrës dhe të trismus.

Implikime klinike
Në të ardhmen e afërt është e nevojshme që të kryhen studime cilësore dhe të bazuara në protokollet e standardizuara rreth aplikimit të të ftohtit (krioterapia) për të kuptuar më mirë nëse kjo terapi ofron një ndihmë të rëndësishme në menaxhimin e dhimbjes dhe në ënjtjen pas ndërhyrjes për ekstraktimin e molarëve të tretë.

Për më tepër:
do Nascimento-Júnior EM, Dos Santos GMS, Tavares Mendes ML, Cenci M, Correa MB, Pereira-Cenci T, Martins-Filho PRS. Cryotherapy in reducing pain, trismus, and facial swelling after third-molar surgery: systematic review and meta-analysis of randomized clinical trials. J Am Dent Assoc 2019 Apr;150(4):269-77.

Përktheu: Valbona Spahia