Përcaktimi in vivo i veshjes së kurorave CAD/CAM me qeramikë të re duke përdorur rreshtimin 3D

Nga Lara Figini

Me sistemin inovativ CAD/CAM është e mundur të realizohen inlay, onlay, faseta, kurora parciale dhe totale në qeramikë integrale, proteza fikse (FDP), proteza të lëvizshme, proteza maksilo-faciale dhe overdenture implantare me cilësi dhe saktësi të lartë duke reduktuar kështu kostot dhe aktivitetet e laboratorit.

Materialet për restaurimet estetike mund të jenë qeramike me matricë xhami ose hibride (me matricë rezinoze).

Në stomatologji, një material restaurimi optimal duhet të jetë rezistent ndaj ngarkesave okluzale të rëndësishme pa shkaktuar një konsumim të padëshiruar në nivelin e dhëmbëve antagonistë.

Kushtet fiziologjike dhe patologjike si mastikacioni dhe okluzioni parafunksional mund të shkaktojnë konsumimin e restaurimeve ashtu si edhe të indeve dentare antagoniste duke çuar në një humbje të anatomisë së dhëmbit.

Tipologjia e kërkimit dhe modaliteti i analizës
Në një studim klinik të publikuar në Journal of Advance Prosthodontics në prill 2019, autorët kanë hetuar konsumimin e kurorave teke te molarët (të kryera me katër materiale të ndryshme) dhe dhëmbëve antagonistë, të realizuara nëpërmjet teknikave të prodhimit të kompjuterizuar CAD/CAM që përdor rreshtimin me imazh në 3D.

Autorët kanë kryer 24 kurora teke (N=24 pacientë, me grupmoshë: 18-50 vjeç) respektivisht në disilikat litiumi (IPS E-max CAD), në silikat litiumi dhe zirkon (Vita Suprinity CAD), në qeramikë me matricë rezinoze (Cerasmart, GC) dhe në qeramikë me matricë rezinoze të dyfishtë (Vita Enamic CAD). Janë zbuluar gjurmë dixhitale (Cerec 3D Bluecam, Dentsply Sirona), pra kurorat janë projektuar dhe prodhuar nëpërmjet Cerec 3 (Dentsply Sirona).

Për cementimin është përdorur një cement rezinoz bikomponent (Variolink Esthetic DC, Ivoclar). Me një skaner intraoral është siguruar matja dhe regjistrimi ndaj konsumimit që ka ndodhur në ngarkesë të vetë kurorave dhe sipërfaqeve dentare antagoniste pas tre dhe gjashtë muajsh.

Të gjitha masat janë mbivendosur me një software (David-Laserscanner, V3.10.4). Analiza statistikore është kryer nga matje të përsëritura nëpërmjet ANOVA.

Rezultate
Pas 6 muajsh janë verifikuar konsumime të parëndësishme qoftë në ngarkesë të kurorave qoftë te dhëmbët antagonistë për materialet e matricës me xham por edhe për matricën rezinoze.

Nuk janë verifikuar diferenca të konsiderueshme ndërmjet materialeve të ndryshme të xhamit (P>.05); në fakt janë zbuluar diferenca të konsiderueshme ndërmjet materialeve në grupin e matricës rezinoze (P<0,05). Edhe pse Cerasmart dhe Enamic ishin të dyja matrica rezinoze, kanë pësuar karakteristika të ndryshme të konsumimit.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në përfundimin se materialet me matricë xhami kanë një konsumim më të vogël dhe prodhojnë konsumim më të vogël të sipërfaqeve dentare antagoniste në krahasim me materialet qeramike me matricë rezinoze.

Implikimet klinike
Veçanërisht te pacientët me bruksizëm ose me okluzione që predispozojnë ndaj konsumimit është e këshillueshme që dentisti të preferojë materiale qeramike me matricë xhami për të realizuar kurora teke me CAD/CAM sepse këto materiale rezultojnë të konsumohen më pak në një follow-up prej 6 muajsh.

Për më tepër:
Aladað A, Oðuz D, Çömlekoðlu ME, Akan E. In vivo wear determination of novel CAD/CAM ceramic crowns by using 3D alignment. J Adv Prosthodont 2019 Apr;11(2):120-7.

Përktheu: Valbona Spahia