Studimi anatomik: lëvizshmëria e mundshme e nervit alveolar inferior

Nga Lara Figini

Lezionet e nervit alveolar inferior (IAN) janë për fat të keq komplikacione të papërfillshme në kirurgjinë orale dhe maksilo-faciale e mund të ndodhin gjatë trajtimeve siç është heqja e molarit të tretë inferior, kirurgjia ortognatike, heqja e tumoreve beninje dhe malinje, pozicionimi i implanteve, trajtimet endodontike dhe në rastet e frakturave mandibulare.

Lezioni i IAN mund të influencojë shumë në cilësinë e jetës së një pacienti, duke çuar në parestezi apo dhimbje për një kohë të gjatë. Megjithatë, është e mundur të përdoret si trajtim i ripozicionimit të IAN, duke përfshirë zhvendosjen e IAN (IANT) dhe lateralizimin (IANL) për të shmangur lezionet. Për fat të keq shpesh hapësira kirurgjikale është e kufizuar dhe lëvizshmëria e IAN në brendësi të mandibulës është e pamjaftueshme gjatë këtyre procedurave.

Një metodikë e propozuar nga kirurgët është heqja e pjesës së kockës përreth foramen të mjekrës për të ofruar një lëvizshmëri më të madhe të IAN.

Tipologjia e kërkimit dhe modaliteti i analizës
Në një studim të bërë te kufomat, që është publikuar në Oral Surgery Medicine, Oral Pathology and Oral Radiology në tetor 2019, autorët kanë ekzaminuar sesi lëvizshmëria e pjesës neurovaskulare alveolare inferiore (IAN) ndryshon me ose pa lëvizur kockën përreth foramen të mjekrës (MF). Në këtë studim janë seleksionuar gjashtë kufoma të ngrira së fundmi (11 anë).

Osteotomia në kockën kortikale vestibulare është kryer 5 mm poshtë MF deri në kufirin distal të molarit të dytë me një frezëmbajtës me shpejtësi të lartë dhe një osteotome. Më pas është matur distanca nga sipërfaqja laterale e kockës kortikale bukale deri në IAN të tërhequr me dhe pa heqjen e kockës përreth MF.

Rezultate
Distanca nga sipërfaqja laterale e kockës kortikale bukale deri në IAN të tërhequr pa hequr kockën përreth MF ka rezultuar 0 mm në të gjitha anët. Pasi është hequr kocka përreth MF distanca mesatare është ndryshuar në 4,71±1,41 mm (intervali 2,83-7,90).

Nuk janë ndeshur diferenca statistikisht të konsiderueshme ndërmjet pjesës së djathtë dhe asaj të majtë.

Konkluzione
Nga të dhënat e nxjerra nga ky studim mbi kufomat, që duhen konfirmuar me punime të tjera analoge, mund të dalim në përfundimin se heqja e kockës përreth foramen të mjekrës garanton një lëvizshmëri më të madhe të nervit alveolar inferior, duke lehtësuar manovrat në trajtimin e zhvendosjes ose ripozicionimit të nervit të nevojshëm, në disa raste, në kirurgjinë orale ose implantologji.

Implikime klinike
Zhvendosja dhe ripozicionimi i nervave IAN janë procedura që përdoren për trajtimin dhe shmangien e lezioneve në nervat e lartpërmendur gjatë kirurgjisë orale dhe maksilo-faciale.

Metodika e paraqitur në këtë studim mund t'i vijë në ndihmë kirurgut për të shtuar lëvizshmërinë e nervit alveolar inferior duke reduktuar risqet e lezioneve ose dëmtimeve.

Për më shumë informacione: Kikuta S, Iwanaga J, Kusukawa J, Tubbs RS. Anatomical study: the potential movability of the inferior alveolar nerve. Oral Surg Oral Med Oral Pathol Oral Radiol 2019 Oct;128(4):353-6.

Përktheu: Valbona Spahia