Ruajtja e kreshtës alveolare nëpërmjet PRF pas ekstraktimeve dentare

Nga Lara Figini

Pas ekstraktimeve dentare kreshta alveolare pëson një riabsorbim të konsiderueshëm tridimensional. Një rishikim sistematik ka kuantifikuar ndryshimet, pas ekstraktimit si reduktimi i gjerësisë nga 2,6 deri në 4,6 mm dhe reduktimi i lartësisë nga 0,4 deri në 3,9 mm.

Ka rrethana në të cilat është thelbësore që të ruhen sa më shumë të jetë e mundur dimensionet e kreshtës alveolare pas ekstraktimit të dhëmbit, siç janë trajtimet implantare. Metodat për të rikthyer arkitekturën origjinale të kreshtës alveolare pas ekstraktimit të dhëmbit janë të ndryshme dhe parashikojnë përdorimin e autotransplanteve, allotransplanteve, alloplasteve, ksenotransplanteve dhe faktorët e rritjes me ose pa membranat që mund të jenë të bioriabsorbueshme ose të pariabsorbueshme.

Fibrina e pasuruar me trombocite (platelet rich fibrin - PRF) është gjenerata e dytë e koncentrateve trombocitare të zhvilluara nga Choukroun dhe kolegët në 2001 dhe mund të favorizojë shërimin dhe rigjenerimin e indeve të buta dhe të forta.
Aktualisht përdorimi i saj është zgjeruar në shumë fusha të stomatologjisë: përdoret në ngritjet e sinusit të nofullës, në korrigjimin e defekteve intrakockore, në implantologji, për të trajtuar recesionet gingivale, në kirurgjinë e molarit të tretë, në defektet e furkacionit dhe në ruajtjen e kreshtës alveolare.

Tipologjia e kërkimit dhe modaliteti i analizës
Në një rishikim sistematik, të publikuar te JADA në shtator 2019, autorët kanë kryer kërkime për të vlerësuar potencialin e PRF për të ruajtur kreshtën alveolare pas ekstraktimit të dhëmbëve. Kanë kryer një kërkim bibliografik të plotë nëpërmjet Medline, Cochrane Central Register dhe Embase. Janë përfshirë vetëm studimet e randomizuara të kontrolluara.

Janë analizuar dhimbja post-operative, shërimi i indeve të buta, densiteti kockor, ndryshimet e dimensionit të kreshtës horizontale dhe vertikale dhe analizat histologjike. Për meta-analizën është përdorur software Review Manager Version 5.3.

Rezultate
Nga 588 artikuj të identifikuar në kërkimin fillestar, 7 studime të publikuara nga 2012 deri në 2019, janë përfshirë në rishikimin përfundimtar. Analiza cilësore e autorëve ka treguar që PRF mund të kryejë një rol pozitiv në reduktimin e dhimbjes post-operative dhe variacionet e dimensioneve të kreshtës pas ekstraktimit dentar.

Nga 7 studime, vetëm 2 kanë vlerësuar efektin e PRF tek osteiti alveolar, mbi variacionet e lartësisë së kockës meziale dhe distale po edhe mbi mbushjen kockore.

Rezultatet e meta-analizës kanë treguar variacionet në lartësitë inferiore të kockës meziale dhe një përqindje të mbushjes kockore më të lartë në grupin ku është përdorur fibrina e pasuruar me trombocite (PRF).

Konkluzione
Nga të dhënat e këtij rishikimi, që duhet të konfirmohen me studime dhe punime të tjera analoge, mund të dalim në konkluzionet se përdorimi i PRF ka një potencial pozitiv në ruajtjen e dimensioneve të kreshtës alveolare dhe është e këshillueshme që të merret në konsideratë pas ekstraktimeve dentare, sidomos kur është e nevojshme që të ruhet sa më shumë të jetë e mundur arkitektura origjinale e kreshtës alveolare.

Për më shumë informacione:
Pan J, Xu Q, Hou J, Wu Y, Liu Y, Li R, Pan Y, Zhang D. Effect of platelet-rich fibrin on alveolar ridge preservation: a systematic review. J Am Dent Assoc 2019 Sep;150(9):766-78.

Përktheu: Valbona Spahia