Teknologjia 3D në shërbim të autotransplantit

Nga Alessandra Abbà

Autotransplantimi i molarëve të tretë është konsideruar një alternativë e vlefshme terapeutike për zëvendësimin e dhëmbëve që mungojnë. Teknologjia 3D mund të jetë një ndihmë e vlefshme në këto raste.

Autotransplantimi është ripozicionimi i një dhëmbi nga pjesa e origjinës në një pjesë edentule. Kjo teknikë mund të zgjidhë shumë raste në të cilat është i nevojshëm zëvendësimi i dhëmbëve që nuk mund të rikuperohen pa përdorur implantologjinë dhe është vlerësuar si një trajtim i vlefshëm, veçanërisht për pacientët në moshë të re.

Në fushën orale dhe maksilofaciale, modelet 3D kanë një numër të gjerë aplikimesh, për shembull komunikimi me pacientin, planifikimi i trajtimit, simulimet kirurgjikale dhe shumë të tjera.

Tipologjia e kërkimit dhe modaliteti i analizës
Në një raport rasti, të publikuar në Bull Tokyo Dent Coll në 2019, autorët përshkruajnë një rast autotransplantimi të një molari të tretë mandibular të impaktuar me përdorimin e një modeli 3D.

Një vajzë 27 vjeç i është nënshtruar një vizite në Departamentin e endodoncisë në Tokyo Dental College Chiba Hospital për kura konservative të elementit 37. Ekzaminime radiografike, CBCT dhe radiografi intraorale kanë evidentuar një kanal në formën e shkronjës C në rrënjën meziale dhe një rezorbim të rrënjës distale për shkak të impaktimit të kurorës së molarit të tretë horizontalisht.

Pra është programuar ekstraktimi i elementit 37 dhe autotransplantimi i 38 në vendin e 37 është marrë në konsideratë si alternativë terapeutike. Më pas janë përgatitur modelet 3D të harkadave dentare me metodën CAD duke përdorur të dhënat e marra nga CBCT dhe duke përdorur një printues 3D.

Ndërhyrja është ilustruar te pacienti duke shfrytëzuar modelet nëpërmjet një simulimi kirurgjikal. Në fund, ndërhyrja është kryer. Elementi 38 është fiksuar përkohësisht nëpërmjet një rezine adezive në elementin 36 për një stabilitet më të madh.
Pas dy muajsh dhëmbi i transplantuar nuk kishte shenja vitaliteti prandaj është kryer një trajtim endodontik.

Rezultate
Pas një viti follow-up, elementi 38 i transplantuar nuk paraqet ndonjë anomali dhe pacientja është në gjendje të përtypë pa pasur shqetësime.

Radiografitë dhe ekzaminimi objektiv indikojnë një dekurs të mirë post-operativ dhe sukses të trajtimit të përfunduar.

Konkluzione
Autotransplantimi i një molari të tretë në një pjesë tjetër edentule mund të ketë shumë përfitime për pacienten dhe mund të jetë një procedurë me normë të lartë suksesi.

Teknologjia 3D është një ndihmë e madhe dhe një instrument i vlefshëm komunikimi për profesionistin dhe për pacientin qoftë në fazën diagnostikuese qoftë në fazën kirurgjikale. Veçanërisht, ky instrument ka rezultuar shumë i dobishëm në procedurat e autotransplantit.

Për më tepër:
Takashi Kamio, Hiroshi Kato. Autotransplantation of impacted third molar using 3D printing technology: a case report. Bull Tokyo Dent Coll 2019;60(3):193-9.

Përktheu: Valbona Spahia