Paraqitja estetike e zirkonit monolitik me tejdukshmëri të lartë

Kur ndërhyjnë ngjyra dhe trashësia e cementit apo e restaurimit poshtë

Nga Lara Figini

Për të përmbushur nevojat e pacientëve, aktualisht restaurimi i dhëmbëve duhet të ketë karakteristika të biokompatibilitetit, rezistencës dhe estetikës. Faktorët si forma, përmasat, struktura e sipërfaqes, ngjyra dhe tejdukshmëria janë të rëndësishëm për restaurimet estetike.

Ngjyra përfundimtare e një materiali të tejdukshëm mund të ndikohet nga tonaliteti i cementit, nga ngjyra e dhëmbit poshtë tij dhe nga trashësia e materialit të restaurimit poshtë kurorave në qeramikë integrale.

Tipologjia e kërkimit dhe modaliteti i analizës
Në një studim in vitro, të publikuar në Journal of Prosthetic Dentistry në janar 2020, autorët kanë vlerësuar ndikimin e ngjyrës së cementit dhe të trashësisë së materialit në ngjyrën përfundimtare të restaurimeve monolotike në zirkon. Kanë përdorur si zirkon monolitik Katana High Translucent (Kuraray).

Janë realizuar 80 disqe si kampione (me diametër 10 mm) në 4 trashësi të ndryshme: 0,5 mm, 1 mm, 1,5 mm dhe 2 mm (n=20 për trashësi). Ngjyrat e kampioneve janë regjistruar (sipas kritereve të Commission Internationale de l'Eclairage-CIE vlerat L*, a*, b* ku L* paraqet ndriçueshmërinë dhe a* dhe b* paraqesin ndryshimet nga bluja/e gjelbërta në të kuqe/lejla dhe nga lejla/blu në të verdhë, respektivisht) përpara dhe pas cementimit nëpërmjet një spektrofotometri.

Kampionet për çdo trashësi janë ndarë më tej në 2 grupe:
• transparentë (n=10);
• opakë (n=10).

Një cement rezinoz autoadeziv transparent apo opak (Panavia V5) është aplikuar në çdo kampion. Pas cementimit është matur ngjyra sërish.

Parametri i tejdukshmërisë (TP) dhe diferenca e ngjyrës (DE) janë llogaritur dhe vlerësuar me matjet e ngjyrës duke përdorur statistika përshkruese, analiza të korrelacionit, testin T në çdo kampion, me anë të dy rrugëve ANOVA dhe testin Tukey Honestly Significant Difference (HSD).

Rezultate
Ndryshime statistikisht të rëndësishme (P<.0001) janë gjetur me trashësitë në rritje të kampioneve të zirkonit me tejdukshmëri të lartë. Vlerat TP, L* dhe b* kanë rezultuar më të ulëta, ndërsa vlerat a* janë rritur. Në të dy grupet e cementit të përdorur, ai transparent dhe ai opak, vlerat L*, a* dhe b* kanë rezultuar në mënyrë të konsiderueshme më të larta dhe është ndeshur një reduktim i konsiderueshëm i TP me cementimin.

Vlera DE më e ulët është observuar (1,19 për 2 mm) për cementin monolitik në zirkon të tejdukshëm. Vlera DE më e lartë (8,05 për 0,5 mm) është observuar për kombinimin monolitik të zirkonit dhe cementit opak.

Konkluzione
Në bazë të rezultateve të këtij studimi in vitro, që duhet të konfirmohen me punime të tjera analoge, mund të dalim në konkluzionet e mëposhtme:
• ngjyra përfundimtare dhe vlerat e TP-së së kurorave në zirkon monolitik me tejdukshmëri të lartë janë kushtëzuar nga trashësia e materialit dhe nga tonaliteti i cementit;
• vlerat e TP rriten në mënyrë të konsiderueshme me zvogëlimin e trashësisë së zirkonit monolitik (nga 2,0 mm në 0,5 mm);
• variacionet e ngjyrës së cementit të rezinës së restaurimeve poshtë kurorave, përveç trashësisë së materialit të restaurimit sjellin variacione në ngjyrë që mund të perceptohen dhe janë afër ose mbi pranueshmërinë klinike.

Implikime klinike
Suksesi i restaurimit protetik kërkon gjithnjë e më shumë vëmendje për rezultate estetike optimale. Mjeku duhet të marrë në konsideratë që kur kryen kurorat në zirkon monolitik me tejdukshmëri të lartë ngjyra dhe trashësia e restaurimit poshtë ndikojnë në rezultatin kromatik përfundimtar dhe në transparencën e restaurimeve të realizuara.

Për më tepër:
Bayindir F, Koseoglu M. The effect of restoration thickness and resin cement shade on the color and translucency of a high-translucency monolithic zirconia. J Prosthet Dent 2020 Jan;123(1):149-54.

Përktheu: Valbona Spahia