Menaxhimi i urgjencave stomatologjike gjatë emergjencës së koronavirusit: këshillat dhe rekomandimet nga një studim kinez

Në një studim të publikuar në Journal of Dental Research në mars 2020, autorët paraqesin njohuritë thelbësore për COVID-19 dhe ofrojnë protokolle të menaxhimit për dentistët në rastet e trajtimeve të emergjencave

Nga Lara Figini

Epidemia nga koronavirusi 2019 (COVID-19), që u shfaq fillimisht në Wuhan, në Kinë, dhjetorin e kaluar është kthyer tashmë në një pandemi duke paraqitur një problematikë të jashtëzakonshme të shëndetit publik jo vetëm për Kinën por edhe për vendet e tjera në të gjithë botën.
Për shkak të karakteristikave intrinsike të profesionit stomatologjik, që parashikon raporte të ngushta ndërmjet profesionistit dhe kavitetit oral të pacientëve, risku i infektimit në këtë sektor mund të jetë i lartë për fat të keq.
Për klinikat dentare (në vendet që janë të prekur nga COVID-19) janë të nevojshme protokolle rigoroze dhe efikase kontrolli të infeksioneve.

Tipologjia e kërkimit, modaliteti i analizës dhe rezultatet
Në një studim të publikuar në Journal of Dental Research në mars 2020, autorët paraqesin njohuri thelbësore për COVID-19 dhe ofrojnë protokolle të menaxhimit të emergjencave stomatologjike.
Trajtimet e emergjencës që nuk mund të shtyhen mund të jenë:
-menaxhimi i pulpiteve ose periodontitit periapikal akut;
-menaxhimi i frakturave dentare ose ekstraktimeve.

Hapat për trajtimet e emergjencës stomatologjike në situata të epidemisë nga koronavirusi janë:
-vlerësimi i pacientit me matjen e temperaturës përpara trajtimit;
-dezinfektimi i duarve të pacientit dhe i sipërfaqeve me të cilat ka pasur kontakt ai;
-veshja e pajisjeve mbrojtëse qoftë nga profesionisti qoftë nga asistenti/asistentja (maska, syze, përparëse një përdorimshe, doreza të dyfishta);
-kryerjen e shpëlarjes pre-operative me një kolutor antimikrobial nga ana e pacientit sepse ndihmon në reduktimin e mikrobeve në kavitetin oral;
-të shmangen procedurat që mund të induktojnë kollë ose të kryhen me shumë kujdes (OBSH, 2020);
-procedurat që gjenerojnë aerosol, si përdorimi i shiringës me ajër dhe ujë apo i frezëmbajtëseve motorike dhe me ultratinguj, duhet të minimizohen sa më shumë që të jetë e mundur.

Shumë shpesh në trajtimet e urgjencës stomatologjike, përballemi me dhimbje intensive, ënjtje, etj. dhe për të dhënë diagnozën e saktë nevojitet ekzaminimi radiografik intraoral, por teknika radiografike mund të stimulojë sekretimin e përshtymës apo kollitjen; prandaj, në këto rrethana preferohet kryerja e radiografive dentare ekstra-orale, si radiografia panoramike ose CBCT.
Në trajtimet e rasteve të emergjencave rekomandohet që të përdoret gjithmonë, sigurisht nëse është e mundur, diga e gomës dhe aspiratorët e pështymës me shpejtësi të lartë që mund të ndihmojnë në minimizimin e aerosolit ose spërkatjeve. Mbrojtëset e fytyrës dhe syzet janë thelbësore kundër nebulizimit.
Ndërsa menaxhimi i trajtimit të frakturave të mundshme, luksimet apo trauma të tjera që shkaktojnë avulsion të dhëmbit varen nga mosha, nga shkalla e rëndesës traumatike, nga formimi i apeksit dhe nga parashikimi i kohëzgjatjes së ndërhyrjes.
Nëse dhëmbi duhet të hiqet, preferohet një suturë e riabsorbueshme. Këshillohet që të lahet me kujdes plaga dhe të përdoret një aspirator i përshtymës me grykë të gjerë për të shmangur spërklat.

Për më tepër:
Meng L, Hua F, Bian Z. Coronavirus disease 2019 (COVID-19): emerging and future challenges for dental and oral medicine. J Dent Res 2020 Mar 12:22034520914246.

Përktheu: Valbona Spahia