Si ndryshon nga pijet ngjyra dhe tejdukshmëria e materialeve CAD/CAM

Simona Chirico

Përdorimi i blloqeve të kompozitave të rezinës CAD/CAM është një alternativë e vlefshme ndaj kompozitave qeramike në dentistrinë restorative dhe atë protetike. Në fakt, ne mund të shohim në të gjitha studimet e viteve të fundit se blloqet e kompozitave të rezinës CAD/CAM kanë veti mekanike dhe estetike të ngjashme me ato qeramike. Për më tepër, vetitë mekanike të këtyre materialeve janë shumë pranë atyre të smaltit. Por nëse marrim në konsideratë qëndrueshmërinë e ngjyrës dhe tejdukshmërinë a mund të themi se ato reagojnë njësoj si smalti dhe dentina? Barutçugil et al në studimin e tyre të publikuar në Journal of Prosthetic Dentistry, kanë hetuar sesi qëndrueshmëria e ngjyrës dhe tejdukshmëria mund të ndryshojnë kompozitën rezinë CAD/CAM pas zhytjes në ujë, verë të kuqe dhe kafe për më shumë se 30 ditë.

Materiale dhe metoda
Janë përdorur 3 lloje blloqesh kompozite rezinë CAD/CAM: 3M Lava Ultimate(LU), GC Cerasmart(CS), VITA Enamic(VE).
Nga secili produkt janë përgatitur 45 kampione katrore (me trashësi 1.5 mm). Kampionet janë ndarë në 3 nëngrupe (n=15 në secilin grup) sipas zhytjes në pije. Kampionet më pas janë zhytur në ujë të distiluar, verë të kuqe dhe kafe për 30 ditë. Parametrat e ngjyrës (DE00), parametri i tejdukshmërisë dhe raporti i kontrastit janë përcaktuar pas 24 orësh dhe pas 1 muaji.
Testet Kruskal-Wallis dhe Mann-Whitney U, Wilcoxon, Freidman dhe matjet e përsëritura me testet ANOVA janë përdorur për analizën statistikore (a=.05).

Rezultate
Asnjë nga materialet nuk ka shfaqur ndryshime në ngjyrë pas zhytjes në pije, me përjashtim të kampioneve GC cerasmart (CS) që ishin zhytur në kafe për 24 orë.
Materialet e zhytura në verë të kuqe dhe kafe për 1 muaj kanë treguar çngjyrosje më të madhe sesa ata që ishin zhytur në ujë (P<.05).
Lava Ultimate (LU) që janë zhytur në verë të kuqe kanë treguar ndryshimet më të mëdha në tejdukshmëri. VITA Enamic (VE) ishin më rezistente ndaj ndryshimeve të tejdukshmërisë, krahasuar me materialet e tjera të testuara.
Raporti i kontaktit të materialit Lava Ultimate (LU) ishte më i lartë sesa ai i materialeve GC Cerasmart (CS) dhe Vita ENAMIC (VE) në të gjitha pijet.

Konkluzione
Pas 24 orësh nga zhytja në kafe dhe verë të kuqe, të gjitha blloqet e kompozitave rezinë CAD-CAM nuk regjistronin ndonjë ndryshim në ngjyrë dhe tejdukshmëri. Ndërsa pas 1 muaji kishin çgjyrosje të lartë dhe shtim të opacitetit.
Prandaj është shumë e rëndësishme që të pastrojmë në mënyrën e duhur sipërfaqet e këtyre restaurimeve dhe të shmangim grumbullimin e substancave të pigmentuara.

Për më shumë informacione: Discoloration and translucency changes of CAD-CAM materials after exposure to beverages.

Përktheu: Valbona Spahia