Parandalimi i gingivitit: furça manuale apo elektrike?

Nga Giulia Palandrani

Tashmë dihet se prania e niveleve të larta të pllakës dentare shkaktojnë gingivit. Furçat elektrike janë konsideruar përgjithësisht më efikase sesa ato manuale në heqjen e pllakës dhe ruajtjen ose përmirësimin e gjendjeve gingivale.

Tipologjia e kërkimit dhe modaliteti i analizës
Objektivi i studimit të propozuar nga Rosema et al., të publikuar në Journal of Periodontology, ishte vlerësimi i efektit të një furçeje me kokë rrotulluese/pulsuese për parandalimin e pllakës dhe gingivitit për një periudhë 9 mujore.
Janë përfshirë në total 122 pacientë me moshë ≥18 vjeç dhe me shëndet të mirë gjeneral e me të paktën 5 dhëmbë për kuadrant pa xhepa ≥5 mm.
Fillimisht, pas një faza pre-eksperimentale prej 3 javësh, me objektivin e motivimit dhe përmirësimit të nivelit të shëndetit të tyre gingival, individët janë ndarë në mënyrë rastësore në 3 grupe:
- grupi me furçë manuale pa pastrim interdentar (MB);
- grupi me furçë manuale dhe fill interdentar (MBF);
- grupi me furçë elektrike pa asnjë pastrim interdentar (PB).

Gjendja gingivale është vlerësuar duke përdorur indeksin e gjakrrjedhjes në sondimin marginal (BOMP); mungesa ose prania e gjakrrjedhjes është vlerësuar brenda 30 sekondash nga sondimi me një shkallë nga 0 deri në 2 (0 = pa gjakrrjedhje; 1 = gjakrrjedhje e pakët; 2 = gjakrrjedhje e tepërt). Ngjyra e dhëmbëve në pjesët vestibulare është vlerësuar në bazë të modifikimit të Gründemann të Indeksit të ngjyrosjes (GMSI).
Pllaka është vlerësuar duke përdorur indeksin e pllakës Quigley dhe Hein (QHPI) të modifikuar; mungesa ose prania e pllakës është regjistruar në një shkallë me 6 pikë (nga 0 deri në 5; 0 = pa pllakë 5 = pllaka ka mbuluar më shumë se dy të tretat e sipërfaqes së dhëmbit).
Lezionet nga abrazioni gingival(GAS) janë vlerësuar sipas metodës së përshkruar nga Van der Weijden dhe Versteeg. Diametri më i madh i lezionit është regjistruar duke përdorur një sondë periodontale të pozicionuar në aksin e gjatë të lezionit.
Ekzaminimet klinike janë kryer në ditën 0, pas 10 javësh, pas 6 muajsh dhe pas 9 muajsh. Në ditën 0, takimet pas 10 javësh dhe 6 muajsh, të gjithë individët kanë marrë një kokë të re furçeje dhe fill interdentar.

Rezultate
Vlerat e BOMP në vizitën e fundit për grupin MB ishin 0,65 dhe për grupet MBF dhe PB, respektivisht 0,58 dhe 0,57. Prandaj nuk është zbuluar ndonjë diferencë e rëndësishme ndërmjet grupeve.
Në fakt, grupi MB kishte 1,57 pikë dhe grupet MBF dhe PB kishin pikë respektivisht 1,44 dhe 1,16.
Nuk ka pasur lezione nga abrazioni gingival dhe nuk ka pasur diferenca statistikisht të rëndësishme të pikëve GAS ndërmjet grupeve.
Koha e larjes me furçë që është regjistruar për 6 muaj ka qenë 129, 5 sekonda për grupin PB, 121,6 sekonda për grupin MBF dhe 111,3 sekonda për grupin MB. Kjo ka sjellë një diferencë statistikisht të rëndësishme ndëmjet grupeve PB dhe MB (P = 0,006).

Konkluzione
Të gjitha grupet, me qëllim që të monitorohen kanë ruajtur nivele të ulëta të pllakës dhe gjakrrjedhjes në krahasim me nivelet e regjistruara në ditën 0. Megjithatë, furça elektrike ka ruajtur nivele më të ulëta të pllakës për 9 muaj në mënyrë më efikase dhe një gjendje më të mirë gingivale për ≥6 muaj në krahasim me furçën manuale me apo pa përdorimin e fillit interdentar.

Për më tepër:
Rosema NAM, Timmerman MF, Versteeg PA, van Palenstein Helderman WH, Van der Velden U, Van der Weijden GA. Comparison of the use of different modes of mechanical oral hygiene in prevention of plaque and gingivitis. Journal of Periodontology 2008;79(8):1386-94.

Përktheu: Valbona Spahia