Ruajtja e kreshtës alveolare pas një ekstraksioni dentar

Nga Lara Figini

Ekstraksioni i një elementi dentar, përveçse ka një impakt direkt në cilësinë e jetës, fillon edhe një kaskadë eventesh biologjike që rezultojnë si ndryshime të homeostazës dhe të konfigurimit strukturor të indeve periodontale ekzistuese, duke çuar në një atrofi progresive të kreshtës alveolare, siç tregojnë studimet klinike të Chappuis et al. (2015) dhe Discepoli et al. (2013).
Ky fenomen fiziologjik i është atribuar kryesisht përgjigjes inflamatore lokale pas një traume kirurgjikale, që sjell një mbi-rregullim kalimtar të osteoklastogjenezës, të kombinuar me një privim të plotë ndaj stimulimit biomekanik të kockës alveolare.
Mungesat e vëllimit të kreshtës alveolare mund të interferojnë në terapinë pasuese të zëvendësimit të dhëmbëve nëpërmjet protezës dentare fikse ose me rehabilitimet e mbështetura nga implantet.

Tipologjia e kërkimit dhe modaliteti i analizës
Në një studim të fundit të randomizuar të kontrolluar, të publikuar në Journal of Dental Research në prill 2020, autorët kanë vlerësuar efikasitetin e terapisë konservative të kreshtës alveolare ARP në krahasim me shërimin e alveolës post-ekstraktive. Një objektiv sekondar ka qenë ai i vlerësimit të efektit të fenotipit lokal dhe i faktorëve që luajnë një rol të rëndësishëm në reduktimin volumetrik të kockës alveolare.
Një total prej 53 individësh ka plotësuar studimin. Individët janë ndarë rastësisht në grupin e kontrollit, që parashikonte ekstraksionin e dhëmbit (EXT n = 27), ose në grupin eksperimental, në të cilin është kryer ekstraksioni i menjëhershëm i dhëmbit nëpërmjet terapisë së ruajtjes së kreshtës alveolare ARP, me një teknikë që parashikonte kombinimin e një grafti me një mbushës të veçantë kockor me pjesëza dhe ngjitjen me një membranë të paabsorbueshme (dPTFE) (ARP n = 26) në alveolën post-ekstraktive.
Janë vlerësuar një seri rezultatesh klinike, lineare, volumetrike dhe janë sjellë nga pacienti në periudhën 14 javore pas shërimit.

Rezultate
Të gjitha vlerësimet lineare të kockës (reduktimi horizontal, mezio-bukal dhe mezio-lingual) janë zbuluar se janë më të mira në grupin ARP në krahasim me grupin EXT. Edhe rezorbimi i kockës volumetrike ka rezultuar shumë më i lartë në grupin e kontrollit (mesatarja ± DS: EXT = −8,83% ± 4,48%; ARP = -8,36% ± 3,81%, P <0,0001).
Analizat e regresionit linear kanë zbuluar se trashësia e kockës vestibulare në kohën bazë është një parashikues i fortë i rezorbimit kockor alveolar te të dy grupet. Nuk janë observuar diferenca të konsiderueshme në termat e ndryshimit të konturit të indeve të buta në të dyja grupet. Ka qenë e nevojshme një rritje kockore për të lehtësuar pozicionimin e implantit në një pozicion të pranueshëm nga ana protetike në 48,1% të pjesëve post-ekstraktive në grupin EXT dhe vetëm në 11,5% të pjesëve post-ekstraktive në grupin ARP.
Vlerësimi i shqetësimeve post-ekstraktive që perceptohen nga pacientët pas çdo vizite follow up-i ka zbuluar një zvogëlim progresiv në kohë, që mund të krahasohet ndërmjet grupeve.

Konkluzione
Nga të dhënat e nxjerra nga ky studim i randomizuar, që duhet të konfirmohen me punime të tjera analoge, mund të dalim në konkluzionin se terapia me ARP garanton një ruajtje më efikase të kockës alveolare pas një ekstraksioni dentar, duke reduktuar nevojën për një shtim të kockës në momentin e pozicionimit të implantit.

Implikime klinike
Ky studim ofron informacione shumë të rëndësishme për shërimin dhe rezorbimin e kreshtës alveolare pas ekstraksioneve të dhëmbëve me një rrënjë, informacione që mund të përdoren për të marrë vendime të bazuara në evidencën e praktikës klinike të përditshme për një menaxhim efikas të pjesës së ekstraksionit dhe optimizimin e terapisë zëvendësuese të dhëmbëve.

Për më tepër:
Chappuis V, Engel O, Shahim K, Reyes M, Katsaros C, Buser D. Soft tissue alterations in esthetic postextraction sites: a 3-dimensional analysis. J Dent Res 2015;94(9):187S-93S.
Discepoli N, Vignoletti F, Laino L, de Sanctis M, Munoz F, Sanz M. Early healing of the alveolar process after tooth extraction: an experimental study in the beagle dog. J Clin Periodontol 2013:40(6):638-44.
Avila-Ortiz G, Gubler M, Romero-Bustillos M, Nicholas CL, Zimmerman MB, Barwacz CA. Efficacy of alveolar ridge preservation: a randomized controlled trial. J Dental Research 2020 Apr;99(4):402-9.

Pëktheu: Valbona Spahia