Ekstraksionet dentare te pacientët me veshkë të transplantuar

Nga Lara Figini

Udhëzimet dhe tekstet shkollore rekomandojnë që trajtimi dentar i zgjedhur te pacientët me transplant organesh, si për shembull veshkat, të kryhet afërsisht të paktën 6 muaj pas transplantimit.

Për shkak të marrjes së barnave imunosupresive pas transplantimit të veshkave, shumë protokolle përfshijnë depistimin për kancerin oral, kontrollin e higjienës orale dhe profilaksinë me antibiotikë përpara se t'i nënshtrohen procedurave më invazive dentare.

Është e zakonshme që dentistët të përshkruajnë në mënyrë empirike antibiotikë për pacientët e transplantuar përpara se të kryejnë ekstraktime të thjeshta, edhe kur subjektet janë klinikisht të qëndrueshme. Arsyeja e kësaj sjelljeje është se shumë nga agjentët imunosupresues që këta pacientë marrin pas transplantimit reduktojnë në mënyrë specifike numrin e qelizave të bardha të gjakut dhe ndërhyjnë me fagocitozë.

Megjithatë, marrësit stabilë të transplantit të veshkave në përgjithësi kanë një sasi dhe funksion adekuat të neutrofileve, gjë që nuk i bën më të ndjeshëm ndaj infeksioneve bakteriale ose sepsës pas ekstraktimit të dhëmbëve.

Tipologjia e kërkimit dhe modaliteti i analizës

Në një studim prospektiv, të botuar në Journal of the American Dental Association, autorët u përpoqën të përcaktonin nëse pacientët me veshkë të transplantuar mund të kishin një rrezik më të lartë të zhvillimit të komplikimeve - të tilla si infeksioni akut lokal, alveoliti, rritja e gjakderdhjes, dhimbjes dhe shërimi të vonuar pas ekstraktimit të dhëmbëve.

U zgjodhën pacientët mbi 18 vjeç që i ishin nënshtruar transplantit të veshkave të paktën 6 muaj më parë (grupi i studimit) dhe pacientë të shëndetshëm (grupi i kontrollit) që kishin nevojë për ekstraktim të dhëmbëve të dalë.

I njëjti kirurg oral kreu të gjitha ekstraktimet e dhëmbëve nën anestezi lokale. Një tjetër studiues ekzaminoi pacientët 3, 7 dhe 21 ditë pas ekstraktimit të dhëmbëve. U vlerësua shfaqja e komplikimeve (infektive akute lokale, alveoliti, gjakderdhja e shtuar) dhe riepitelializimi i alveolës në ditën e 21-të.

Rezultatet

Dyzet e pesë ekstraktime dhëmbësh u kryen në 38 pjesëmarrës në grupin e studimit dhe 61 ekstraktime në 57 pacientë në grupin e kontrollit. Nuk u gjet asnjë ndryshim domethënës statistikor midis dy grupeve në lidhje me incidencën e ndonjë ndërlikimi ose për epitelizimin e vonuar të plagës.

Konkluzionet

Nga të dhënat e këtij studimi pilot, të cilat duhet të vërtetohen edhe në punime të tjera të ngjashme, mund të konstatohet se nuk ka dallim në shërimin postoperativ pas nxjerrjes së dhëmbëve midis pacientëve me veshkë të transplantuar dhe pacientëve të shëndetshëm të kontrollit.

Implikimet klinike

Bazuar në rezultatet e këtij studimi prospektiv, profilaksia me antibiotikë nuk rekomandohet në funksion të ekstaktimit të thjeshtë të dhëmbëve në marrësit e transplantit të veshkave. Studime të mëtejshme prospektive duhet të kryhen me mostra më të mëdha të pjesëmarrësve duke edhe përfshirë ekstraktimin kirurgjikal të dhëmbëve të impaktuar.

Për më shumë informacion:

Caliento R, Sá Fernandes K, Silva Andrade N, de Santana Sarmento DJ, Pontello Cristelli M, Ortega KL, Gallottini M. Extractions in kidney transplant recipients. A prospective observational pilot study. JADA marzo 2022:153(3):233-40.