Si ndikojnë trajtimet e higjienës orale profesionale në shëndetin oral dhe të përgjithshëm të të moshuarve

Nga Lara Figini

Një numër në rritje i të moshuarve jetojnë në ambiente të kujdesit afatgjatë dhe një ekzaminim i shëndetit të tyre oral ka zbuluar një situatë të keqe në aspektin dentar, periodontal, pastrimit të protezave, shëndetit të gjuhës dhe kavitetit oral. Ky reduktim i shëndetit oral ndikohet nga probleme të shumta si demenca, dobësia, çrregullimet mendore ose kequshqyerja dhe terapia e shumëfishtë me barna.

Megjithatë, shëndeti i dobët oral mund të ndikojë në gjendjen e përgjithshme të shëndetit, dhe në veçanti mund të ndikojë në statusin e të ushqyerit, të përkeqësojë sëmundjet kardiovaskulare ose të shkaktojë pneumoni aspirative. Për shkak të problemeve vizuale, sarkopenisë, demencës ose problemeve financiare, kujdesi shëndetësor oral fatkeqësisht neglizhohet nga këta të moshuar, pa lënë pas dore aspektin kufizues që përfaqësojnë kujdestarët e tyre, të cilët shpesh tregojnë mungesë njohurish dhe aftësish për t'u marrë me problemet dentare (kontrollimi dhe pastrimi i protezave, etj.), aftësi e dobët dhe prioritet i ulët për shëndetin oral.

Do të nevojiteshin ndërhyrje për përmirësimin e kësaj situate nëpërmjet trajnimit arsimor të infermierëve dhe kujdestarëve për higjienën dhe shëndetin oral duke rritur numrin e seancave profesionale të higjienës orale në këto ambiente spitalore.

Tipologjia e kërkimit dhe modaliteti i analizës

Në një studim të botuar në Clinical and Experimental Dental Research, autorët kanë shqyrtuar ndikimin e ndërhyrjeve tremujore profesionale të higjienës orale në shëndetin oral dhe të përgjithshëm të të moshuarve që jetojnë në shtëpitë e kujdesit afatgjatë. Janë ekzaminuar 152 pjesëmarrës (mosha mesatare 84 vjeç) nga dy shtëpi banimi për të moshuarit.

Parametrat e përgjithshëm të shëndetit, një pyetësor për kujdestarët e tyre dhe parametrat e shëndetit oral janë vlerësuar në fillim dhe pas 1 viti. Të gjithë kujdestarëve iu dha një leksion në lidhje me higjienën orale në kohën fillestare. Në shtëpinë e të moshuarve (B), higjiena profesionale orale kryhej çdo 3 muaj. Analizat statistikore u kryen me anë të testit Chi2 për të dhënat nominale dhe me anë të testit T për të dhënat numerike.

Rezultatet

Tridhjetë e nëntë persona humbën jetën gjatë ndjekjes. Nuk u gjetën dallime statistikore midis banorëve të shtëpive A dhe B në kohën fillestare dhe në rivlerësimin 1-vjeçar për moshën, gjininë dhe indeksin e masës trupore BMI. Nuk u gjetën dallime domethënëse midis rezultateve të marra nga dy shtëpitë e ndryshme të të moshuarve në lidhje me shëndetin e përgjithshëm.

Disa parametra oral u ndikuan pozitivisht nga ndërhyrja tremujore si thellësia e xhepit, indeksi i higjienës së protezës dhe ndryshimet në mukozë. Edentulizmi dhe DMFT (indeksi që vlerëson dhëmbët e prishur [D], të humbur [M], të mbushur [F], numri i dhëmbëve [T]) nuk ndryshuan midis dy shtëpive të pleqve ose me kalimin e kohës.

Thellësia e xhepit u vlerësua në mënyrë meziale dhe distale në 338 dhëmbë në shtëpinë A dhe 428 dhëmbë në shtëpinë B. Vetëm grupi i dhëmbëve me thellësi xhepi > 4 mm tregoi ulje të ndjeshme pas ndërhyrjeve tremujore profesionale të kujdesit oral në shtëpinë B gjatë periudhës së vëzhgimit.

Konkluzionet

Nga të dhënat e këtij studimi, të cilat duhen vërtetuar edhe në punime të tjera të ngjashme, mund të konstatohet se higjiena profesionale tremujore nuk mund të ndikojë në shëndetin e përgjithshëm të të moshuarve që banojnë në shtëpitë e të moshuarve dhe ka efekte të lehta pozitive në shëndetin oral.

Implikimet klinike

Frekuenca e trajtimit tremujor profesional të kujdesit oral duket realiste, por jo aq e shpeshtë sa për të dhënë rezultate bindëse me efekte pozitive në shëndetin oral dhe të përgjithshëm. Kjo nënvizon nevojën për të rritur procedurat ditore të higjienës orale.

Jo vetëm që është e nevojshme t'u jepen kujdestarëve udhëzime për higjienën orale, por edhe të përmirësohet politika shëndetësore e shtëpive të të moshuarve për të lejuar, për shembull, higjienën profesionale orale të kryer nga higjienistët dentarë në kohën e duhur dhe të personalizuar dhe mbulimin e kostove nga një pjesë e sigurimit shëndetsor.

Për më shumë informacion:

Peroz I, Klein C. Influence of professional dental hygiene on oral and general health of retirement home residents: a comparative study. Clin Exp Dent Res Febbraio 2022;8:45-53.