Shëndeti oral i nënës dhe fëmijës. Rëndësia e 1000 ditëve të para të jetës "në simbiozë"

Nga Lara Figini

Kujdesi për shëndetin oral gjatë shtatzënisë dhe në vitet e para të jetës së foshnjës shpesh neglizhohet dhe ndonjëherë është një temë për të cilën prindërit e ardhshëm dinë shumë pak.

Në realitet është një fazë shumë delikate dhe themelore, siç shpjegohet në një editorial të botuar në European Journal of Paediatric Dentistry nga prof. Luigi Paglia i cili shprehet se "1000 ditët, që kalojnë nga ngjizja në atë të vitit të dytë të jetës së fëmijës, do të ndikojnë në shëndetin e zgavrës së gojës gjatë gjithë jetës, sepse kjo është periudha në të cilen hidhen themelet për shëndetin e përgjithshëm".

Shëndeti oral, në fakt, është rezultat i parandalimit të vazhdueshëm të kryer nga mjekët obstetër, gjinekologë, pediatër, pedodontë dhe higjienistë.

Një sondazh i kryer në Itali mbi një kampion grash në moshë riprodhuese tregon keqinformim të gjerë mbi shëndetin oral të nënave dhe fëmijëve. Edhe njohuritë e profesionistëve të kujdesit shëndetësor janë në fakt të pakënaqshme, ndërsa shumica e të anketuarve e njohin rëndësinë e kujdesit gjatë shtatzënisë, ata nuk i këshillojnë pacientët që t'i nënshtrohen ekzaminimeve dentare ose nuk i pyesin nëse kanë pasur trajtim dentar në 12 muajt e mëparshëm.

Gjatë shtatzënisë ka një rrezik të shtuar ose përkeqësim të periodontitit dhe një incidencë më të lartë të erozionit dentar dhe kariesit për nënën shtatzënë dhe kjo gjithashtu mund të çojë në një rritje të sëmundjeve të lidhura me shtatzëninë si lindjet e parakohshme dhe abortet.

Ushqimi i nënës, higjiena orale dhe zgjedhja e stilit të jetesës janë elementët kryesorë që ndikojnë në shëndetin e nënës dhe foshnjës.

Marrja e niveleve të duhura të lëndëve ushqyese gjatë periudhave vendimtare të zhvillimit të fetusit mund të çojë në një fetus optimal me formimin e duhur të indeve dhe t'i japë fëmijës mbrojtje më të madhe kundër sëmundjeve kronike gjatë gjithë jetës.

Konkluzione

Me këto konsiderata, prof. Paglia thekson se është thelbësore të promovohen fushata informuese për këtë çështje për të përgatitur punonjësit e shëndetësisë dhe gratë për periudhën perinatale.
Detyra e stomatologëve dhe higjienistëve është t'u japin grave shtatzëna të gjitha udhëzimet e duhura për t'u kujdesur maksimalisht për gojën, dhëmbët dhe fëmijët e tyre të ardhshëm dhe për të ndjekur një dietë korrekte dhe të përshtatshme për periudhën, gjithashtu dhe veçanërisht në dy vitet e para të jetës së foshnjës.

Për më shumë informacion:

Paglia L. The first thousand days of mother and child: a lifelong investment in oral health! Eur J Paediatr Dent 2022 Mar;23(1):5.