Efektiviteti i përdorimit të shpëlarësve të gojës dhe fillit dentar

Nga Lara Figini

Kontrolli i biofilmit të pllakës orale mbështetet në një sërë metodash praktike, përfshirë edhe mjetet mekanike, të tilla si larja e dhëmbëve dhe mjetet kimike.

Filli dentar është klasifikuar nga Administrata e Ushqimit dhe e Barnave si një pajisje mjekësore e klasit të parë për heqjen e pllakës dhe grimcave ushqimore ndërmjet dhëmbëve dhe gjithashtu për të reduktuar kariesin dhe sëmundjen periodontale.

Megjithatë, ruajtja e standardeve të higjienës orale dhe zotërimi i kontrollit mekanik të pllakës mbeten ende sfiduese për shumë individë.

Tipologjia e kërkimit dhe modaliteti i analizës

Në një studim me përzgjedhje rastësore të botuar në Journal of Dental Hygiene, autorët hetuan efektet e shpëlarjes orale të bërë dy herë në ditë me një shpëlarës goje i cili ka në përmbajtjen e tij një kombinim të katër vajrave esencialë (4EO) dhe efektet e përdorimit të fillit dentar të kontrolluar ditor krahasuar me shpëlarësit të cilët përmbajnë 5% hidroalkool (NC) (grupi i kontrollit negativ), për parandalimin dhe reduktimin e pllakës, gengivitit dhe gjakderdhjes gengivale.

Pjesëmarrësit vullnetarë, të cilët plotësonin kriteret e përfshirjes, u ndanë rastësisht në grupet e mëposhtme:

Grupi 1, në të cilin pjesëmarrësit përdorën shpëlarës goje me përmbajtje 5% hidroalkooli (Grupi NC) për 30 sekonda me 20 ml të produktit;
Grupi 2, në të cilin pjesëmarrësit përdorën shpëlarës goje me përmbajtje 4EO për 30 sekonda me 20 ml të produktit;
Grupi 3, në të cilin pjesëmarrësve iu përdor një fill në mënyrë profesionale nga një higjenist dentar (FBH);
Grupi 4, në të cilin pjesëmarrësit e përdorën fillin të mbikëqyrur nga një higjienist dentar (FUS).

Të gjithë pjesëmarrësit morën një seancë të higjienës orale dhe profilaksisë profesionale dentare përpara fillimit të studimit.

Në mëngjeset e ditëve të javës, pjesëmarrësit lanë dhëmbët në vendin e studimit dhe, pas larjes, Grupet e shpëlarjes përdorën produktet e tyre nën mbikëqyrjen e higjienistit dentar; Grupi 3 iu nënshtrua përdorimit të fillit dentar nga higjenisti, ndërsa në Grupin 4 pjesëmarrësit përdorën fillin nën mbikëqyrjen e higjienistit dentar.

Pjesëmarrësit kryenin manovrat e higjienës orale të përcaktuara nga grupi i detyrave të studimit dy herë në ditë, në mbrëmje dhe në fundjavë, në shtëpinë e tyre në mënyrë të pavarur.

Në javën e 4-rt dhe të 12-të, nga i njëjti ekzaminues u krye vlerësimi individual i indeve të forta dhe të buta të zgavrës së gojës, i pllakës së pranishme, gengivitit dhe i gjakderdhjes gingivale gjatë studimit.

Rezultatet

Nga 156 pjesëmarrësit e përzgjedhur në mënyrë rastësore, vetëm 149 prej tyre arritën deri në fund të studimit. Përdorimi i shpëlarësve të gojës në grupin 4EO pas 12 javësh çoi në një reduktim të pllakës, gengivitit dhe gjakderdhjes gengivale gjatë studimit, në një mënyrë statistikisht domethënëse krahasuar me grupin e shpëlarjeve NC.

Një reduktim statistikisht i rëndësishëm i gengivitit interproksimal dhe gjakderdhjes gengivale në javën e 12-të u gjet në të dy grupet të cilët përdorën fillin dentar në krahasim me të dhënat e marra në Grupin 1 (NC); asnjë nga dy ndërhyrjet me fill dentar nuk reduktoi ndjeshëm pllakën interproksimale pas 12 javësh në krahasim me grupin NC.

Konkluzionet

Nga të dhënat e këtij studimi, të cilat duhen konfirmuar edhe në punime të tjera të ngjashme, mund të konstatohet se përdorimi i një shpëlarësi me përmbajtje 4EO përmirëson ndjeshëm shëndetin oral në javën e 12-të dhe se përdorimi i fillit dentar nën mbikëqyrjen e profesionistit përmirëson shëndetin e gengivave.

Implikimet klinike

Higjenisti dentar dhe dentisti duhet të bindin pacientët e tyre se përdorimi dy herë në ditë i një shpëlarësi goje i cili ka në përbërjen e tij katër vajra esencialë (mentol, timol, eukaliptol dhe metil salicilat), i kombinuar me larjen e dhëmbëve dy herë në ditë, mund të reduktojë ndjeshëm pllakën, gengivitin dhe gjakderdhjen gengivale.

Është gjithashtu e rëndësishme për shëndetin e gengivave që pacientët të përdorin fillin dentar në mënyrë korrekte dhe të vazhdueshme, prandaj është thelbësore të jepen shpjegimet dhe indikacionet e nevojshme gjatë seancave profesionale të higjienës orale për të kryer manovrat më të mira orale në shtëpi, veçanërisht për përdorimin e fillit dentar në mënyrë korrekte dhe efektive.

Për më shumë informacion:

Mary Lynn Bosma, James A. McGuire, Anusha Sunkara, Pamela Sullivan, Abbie Yoder, Jeffery Milleman, Kimberly Milleman. Efficacy of flossing and mouthrinsing regimens on plaque and gingivitis: a randomized clinical trial. J Dent Hyg 2022;96(3):8-20.