Gripi dhe shëndeti oral

Këto janë 5 sugjerimet e thjeshta që dr. Romo këshillon t'u jepen pacientëve, duke i inkurajuar që t'i zbatojnë ato për të ruajtur higjienën e mirë orale edhe kur janë të sëmurë...

5 këshilla të thjeshta nga ADA për pacientët, gjatë kujdesit për shëndetin oral kur janë të sëmurë

"Është e rëndësishme të kujdesesh për shëndetin oral përgjatë gjithë vitit e sidomos kur je sëmurë", thotë dr. Gene Romo në faqen e internetit të ADA-s, duke treguar këshillat që duhet t'u jepni pacientëve tuaj në këto muaj dimri kur rreziku për të qëndruar në shtëpi me temperaturë dhe të ftohtë është më i lartë.

Këto janë 5 sugjerimet e thjeshta që dr. Romo këshillon t'u jepen pacientëve, duke i inkurajuar që t'i zbatojnë ato për të ruajtur higjienën e mirë orale edhe kur janë të sëmurë.

Praktikoni një higjienë të mirë orale dhe jo vetëm
Sipas Qendrave për Kontrollin dhe Parandalimin e Sëmundjeve (CDC), virusi i gripit mund të jetojë në sipërfaqe të lagështa për 72 orë. Rregulli nr. 1 është të mos e ndash asnjëherë me dikë tjetër furçën e dhëmbëve, sidomos kur je sëmurë. Nëse e keni mbajtur furçën për disa muaj, pas përfundimit të sëmundjes, do të ishte e dobishme ta zëvendësoni atë, duke sjellë ndërmend që furça duhet ndërruar pas 3-4 muajsh.

Shurup dhe tableta pa sheqer
Kur të zgjidhni shurupin ose tabletat për kollën, kërkojini farmacistit të kontrollojë nëse produkti që ju është këshilluar është pa sheqer, duke shmangur përbërës të tillë si fruktoza apo shurupi i misrit. Mbajtja e një shurupi me sheqer në gojë për një kohë të gjatë, si dhe e karameleve kundër dhimbjes së fytit, shton rrezikun për karies.

Tregoni kujdes pas të vjellave
Fatkeqësisht, një nga efektet e disa infeksioneve gjatë dimrit janë të vjellat. Këshilla e dr. Romo për pacientët është të mos i lajnë menjëherë dhëmbët. "Kur vjellim, acidet e stomakut prekin dhëmbët dhe i mbulojnë ata. Larja e dhëmbëve menjëherë më pas, shton rrezikun për përhapjen e acidit në të gjithë sipërfaqen e dhëmbëve", kujton ai. Preferohet shpëlarja me ujë ose gargarë për të larguar acidin.

Konsumoni pije për të shmangur thatësinë e gojës
Kur jemi sëmurë, këshillohet të konsumojmë shumë pije, edhe për të parandaluar thatësinë e gojës. Për më tepër, medikamentet që mund të merren për të trajtuar një ftohje ose grip mund të nxisin kserostominë. Prandaj, rekomandohet të pini shumë ujë dhe të përdorni karamele pa sheqer.

Kujdes me pijet
Do të ishte mirë të rikujtoni se uji është gjithmonë pija e këshilluar edhe për të shmangur problemet me dhëmbët. Gjatë kohës që jeni sëmurë, këshillohet të konsumoni me kujdes pijet ripërtëritëse, të cilat përmbajnë shpesh doza të larta sheqeri. I njëjti kujdes duhet treguar edhe për pijet e përdorura për "ngrohje", si çaji. Rekomandohet të mos përdorni sheqer ose limon, ose t'i konsumoni në doza të vogla, "rregull ky, që duhet të aplikohet edhe kur të ketë kaluar gripi", përfundon dr. Romo.