Përmirësimi i shëndetit oral te të moshuarit

Organizata Botërore e Shëndetësisë ka propozuar një plan veprimi dhjetëvjeçar “Dhjetëvjeçari i plakjes së shëndetshme 2021-2030”, me qëllim inkurajimin e shteteve në botë, që të...

Organizata Botërore e Shëndetësisë ka propozuar një plan veprimi dhjetëvjeçar "Dhjetëvjeçari i plakjes së shëndetshme 2021-2030", me qëllim inkurajimin e shteteve në botë, që të zhvillojnë dhe zbatojnë politika dhe programe mbështetëse për promovimin e plakjes së shëndetshme dhe për përmirësimin e jetës së të moshuarve.

Të moshuarit do të jenë në qendër të këtij plani, i cili do të përfshijë palët politike, shoqëritë prodhuese, shoqatat profesionale kombëtare, akademikët dhe të gjithë operatorët shëndetësorë, të cilët duhet të bashkëpunojnë me njëri-tjetrin për të përmirësuar jetën e të moshuarve, të familjarëve të tyre dhe të komuniteteve në të cilat jetojnë.

Shëndeti oral dhe ai sistemik lidhen me njëri-tjetrin
Sëmundjet orale dhe sëmundjet jo të transmetueshme ndajnë disa faktorë rreziku të përbashkët, të tillë si: konsumi i sheqerit, përdorimi i duhanit dhe sjellje të caktuara shoqërore të lidhura me shëndetin. Për shembull, shëndeti periodontal lidhet me disa sëmundje sistemike kronike, si diabeti dhe sëmundjet kardiovaskulare, duke qenë se kanë një rrugë inflamatore të përbashkët. Gjendja e shëndetit oral lejon disa funksione themelore të përditshmërisë, të tilla si: të ngrënit, e folura dhe e qeshura.

Rënia e dhëmbëve, hiposalivimi dhe kanceri oral bllokojnë funksionin e duhur oral dhe ndikojnë negativisht në oreks, në ndërveprimin shoqëror dhe si pasojë, në cilësinë e jetës.

Rënia e funksionit oral lidhet me rënien e përgjithshme të funksioneve dhe me dobësinë te të moshuarit dhe mund të çojë më shpejt në paaftësi dhe humbje të pavarësisë për ta. Prandaj, OBSH dhe FDI World Dental Federation e kanë përcaktuar thelbësore rëndësinë e ruajtjes së shëndetit dhe të funksionalitetit oral në fazat e plakjes së të moshuarve.

Plakja e shëndetshme ndikon pozitisht te vetë të moshuarit, te familjet e tyre dhe te shoqëria. Përmirësimi i jetës së të moshuarve përforcon lidhjet familjare dhe redukton kërkesat për "ndihmë" dhe për burime nga shoqëria. Ruajtja e shëndetit dhe e funksionit oral është thelbësore për plakjen e shëndetshme të një individi. Shëndeti oral ndikon në shëndetin sistemik, në shëndetin konjitiv dhe në atë psikologjik. Funksionet orale, si të ngrënit, garantojnë shëndetin ushqimor te të moshuarit. Pjesa më e madhe e sëmundjeve orale janë të parashikueshme dhe rënia e funksionit oral mund të ripërtërihet përmes ndërhyrjeve stomatologjike. Fatkeqësisht, sëmundjet orale mbeten mbizotëruese dhe rënia e funksionit oral neglizhohet nga pacientët.

Si përfundim, ruajtja e shëndetit të mirë oral te të moshuarit përmirëson jetën e tyre dhe raportet e tyre shoqërore dhe familjare. Shëndeti oral dhe funksionalitetet e mira orale ndikojnë në plakje përgjithësisht të shëndetshme. Megjithatë, nevojiten reforma politike për reduktimin e pabarazive botërore në shëndetin oral te të moshuarit. Parandalimi në nivel popullsie duhet të jetë i aksesueshëm, me leverdi dhe i disponueshëm për të moshuarit. Mbulimi shëndetësor oral është thelbësor për përfshirjen e shëndetit oral në kujdesin e përgjithshëm shëndetësor.