Pijet e lehta janë "fajtorët më të mëdhenj të gërryerjes së dhëmbëve"

Pijet e lehta janë faktori më i rëndësishëm në ashpërsinë e gërryerjes së dhëmbëve, sipas një studimi të publikuar te Journal of Public Health Dentistry. Gërryerja e dhëmbëve ndodh kur smalti – veshja mbrojtëse e dhëmbit – konsumohet nga ekspozimi në acid.

Pijet e lehta janë faktori më i rëndësishëm në ashpërsinë e gërryerjes së dhëmbëve, sipas një studimi të publikuar te Journal of Public Health Dentistry.
Gërryerja e dhëmbëve ndodh kur smalti - veshja mbrojtëse e dhëmbit - konsumohet nga ekspozimi në acid. Gërryerja e smaltit mund të shkaktojë dhimbje - veçanërisht gjatë konsumimit të ushqimeve të ngrohta ose të ftohta - sepse ekspozohet pjesa e ndjeshme e dentinës.
Smalti te dhëmbët bëhet më i butë dhe humbet mineralet kur hamë ose pimë diçka që përmban acid. Sidoqoftë, ky aciditet fshihet nga pështyma, e cila vendos dalëngadalë balancën natyrale në gojë. Por nëse gojës nuk i jepet koha e nevojshme për të riparuar veten - për shkak se këto sulme acidi ndodhin shumë shpesh - sipërfaqja e dhëmbit gërryhet.
Gjithçka që përmban vlera të pH (matësi i aciditetit) më të ulëta se 5.5 mund të dëmtojë dhëmbët. Ushqimi dhe konsumimi i sodave (pije), pijeve të gazuara, ujërave të gazuar me aromatizues, pijeve sportive, frutat dhe lëngjet e frutave njihen si të dëmshëm për dhëmbët nëse konsumohen shumë shpesh.
Studimi tregon se një pjesë e konsiderueshme e të rriturve kanë gërryerje të dhëmbëve, rastet më të rënda janë te personat që konsumojnë shpesh pije të lehta me shumë sheqer dhe lëngje frutash.
Duke ekzaminuar 3773 pjesëmarrës, studimet kanë zbuluar se 79% ka gërryerje të dukshme të dhëmbëve, 64% ka një zbutje të smaltit, 10% ka një smalt të moderuar dhe 5% ka shenja të smaltit në gjendje të rëndë. Pjesëmarrësit në studim me smalt të moderuar dhe të ashpër konsumojnë më shumë pije të lehta dhe lëngje frutash çdo ditë në krahasim me grupet e tjera.
Te pjesëmarrësit me nivele të ulëta të smaltit, studimet kanë zbuluar se qumështi ishte pije më popullore se soda apo lëngu i frutave.
Gjithashtu meshkujt ishin dy herë më shumë në rrezik për gërryerjen e dhëmbëve në krahasim me femrat dhe smalti gërryhej më shpejt me kalimin e moshës.
Dr. Nigel Carter OBE, shef ekzekutiv i Shoqatës Britanike të Shëndetit të Dhëmbëve, tha se ndërkohë që lëngu i frutave mund të jetë i shëndetshëm, përqendrimet e larta të sheqerit dhe acidit mund të çojë në dëmtim të rëndë të dhëmbëve nëse këto pije konsumohen shumë shpesh gjatë ditës.
"Uji dhe qumështi janë zgjidhjet më të mira, jo vetëm për të mirën e shëndetit tonë oral por edhe për shëndetin tonë të përgjithshëm," - tha dr. Carter.
"Mbani mend se është shpeshtësia e marrjes së ushqimeve dhe pijeve të sheqerosura që shkakton probleme kaq të rëndësishme prandaj duhet të përpiqemi të reduktojmë shpeshtësinë e konsumimit."
Ai shton: "Gërryerja e dhëmbëve nuk ka nevojë gjithmonë për trajtim. Me check-up - e të rregullta dhe duke këshilluar ekipin tuaj të dentistëve mund të parandaloni çdo problem që të mos përkeqësohet. Rastet më të rënda të smaltit të dhëmbëve mund të rezultojnë shpesh invazive dhe me trajtime të kushtueshme ndaj është e nevojshme të mbahet një higjenë e mirë orale dhe të sigurohemi që këto probleme nuk do të rëndohen te pacientët."

Shumë lloje të sodave dhe lëngjeve të frutave përmbajnë të paktën gjashtë lugë sheqer, që është një dozë më e lartë se ajo që rekomandohet dhe mund të çojnë në prishjen e dhëmbëve apo gërryerjen e tyre.

Përktheu: Valbona Spahia