Mungesa e hapësirës distale dhe fillimi i alveolitit pas ekstraksionit të molarit të tretë. Një studim italian ka hetuar lidhjen

Infeksionet e vona që pasojnë heqjen kirurgjikale të molarëve të tretë, duke pasur një incidencë relativisht të ulët (nga 0.5% në 1.8%) përfaqësojnë për kirurgun një problem të konsiderueshëm; në fakt fillimi i vonë (midis dy dhe 8 javëve pas kirurgjisë) me dhimbje dhe fryrje dhe nevoja për t'iu nënshtruar terapisë antibiotike e bëjnë pacientin që të ndihet përgjegjës ose sepse ka informacion të paktë ose sepse ka minimizuar mundësinë e shfaqjes së alveolitit.

Objektivi i këtij studimi retrospektiv është ai i evidentimit të ekzistencës së një lidhje midis mungesës së hapësirës distale (klasa IIC ose IIIC të Pell dhe Gregory) dhe fillimit të alveolitit pas ekstraksionit të molarëve të tretë mandibular të retinuar.

Materiale dhe metoda

134 pacientë (68 meshkuj dhe 66 femra) paraqisnin një ose dy embrione të molarëve të tretë mandibularë të ekstraktuar të paktën gjashtë muaj para fillimit të studimit. Janë vlerësuar 218 germektomi të kryera midis 2010 dhe 2013. Për çdo dhëmb është llogaritur vlera numerike e raportit hapësirë/gjerësi në bazë të protokollit Ganns, duke analizuar në OPT marrëdhënien midis hapësirës së disponueshme në regjionit retromolar dhe gjerësisë mezio-distale të kurorës së molarit të tretë. Një mjek i vetëm, ndryshe nga kirurgu oral, llogariste raportin e Ganss dhe regjistronte rastet e alveolitit.

Analiza statistikore
Analiza diskriminuese, modaliteti stepwise, është përdorur për të identifikuar kombinimin më të mirë të parametrave klinik parashikues të shfaqjes së alveolitit. Një total prej 62 germektomish, të ndryshme nga ato në të cilat është kryer analiza diskriminuese janë përdorur për vlerësimin e rezultateve të përftuara.

Rezultate
18 pacientë kanë paraqitur alveolit (13.4%), pa diferenca domethënëse në lidhje me moshën dhe gjininë; megjithatë raporti meshkuj/femra është shfaqur si një parashikues domethënës i infeksionit të vonë duke qenë 0.64 te pacientët me alveolit dhe 1.11 te pacientët pa alveolit (p=0.0001).
Nga parametrat demografikë (mosha) dhe klinik (kohëzgjatja e ndërhyrjes kirurgjikale, raporti Ganss) që janë analizuar, vetëm raporti Ganss është dëshmuar si një parashikues domethënës në shfaqjen e infeksionit të vonë (p=0.007). Raporti i Ganss ishte 0.40±0.20 te pacientët me alveolit dhe 0.53±0.21 te pacientët pa alveolit (p=0.004). Efikasiteti i raportit të Ganss në klasifikimin e rasteve të infeksionit të vonë vlerësuar me kurbën ROC, ka dhënë në korrespondencë të një cut-off prej 0.5 një ndjeshmëri të vlerësuar me 75% (intervali i besimit me 95%:68%-82%) dhe një specifikim prej 62% (intervali i besimit me 95%:54%-70%). Vlerësimi i rezultateve mbi kampionin e 62 germektomive ka konfirmuar rëndësinë e raportit të Ganss mbi 0.5 në parashikimin e mungesës së alveolitit (specifikimi 50%), por ka treguar një stabilitet inferior me atë të vënë re në kurbën ROC, me shumë mundësi për shkak të numrit të reduktuar të kampioneve.

Diskutim
Hipoteza që kur hapësira distale në molarin e dytë është shumë e reduktuar (raporti i Ganss<0.5) është më e mundur që të zhvillohet një infeksion i vonë shkaktuar nga prania e ushqimit, është konfirmuar. Në fakt, në 16 deri në 20 raste të alveolitit (një paciente paraqiste infeksion në njësitë kirurgjikale bilaterale) raporti i Ganss ishte nën 0.5. Incidenca e infeksioneve të vona e vënë re në këtë studim retrospektiv është më e lartë se ajo e raportuar në literaturë; në akord me kufijtë e incidencës së propozuara në udhëzimet e US National Institute of Health (5%) dhe në ato të United Kingdom's Right Honourable Justice Lawton (mundësia e infeksionit më e lartë se 1 në 100) të gjithë pacientët duhet të informohet për mundësinë e shfaqjes së këtyre komplikimeve post operatore të vona.

Konkluzione
Numri i limituar i kampioneve të këtij studimi sugjeron kryerjen e studimeve të mëtejshme për popullsi më të gjera. Megjithatë protokolli kirurgjikal i përshtatshëm mund të standardizohet në mënyrë që variabla e vetme anatomike të jetë prania e një hapësire të reduktuar distale në molarin e dytë dhe retinimi total.

Sinteza e punës origjinale nën kujdesin e: Maria Rosaria Gatto, Gian Andrea Pelliccioni dhe Giuseppe Monaco, Departamenti i Shkencave Biomjekësore dhe Neuromotore, Universiteti i Bolonjës.

Për më tepër:
Delayed onset infections after lower third molar germectomy could be related to the space distal to the second molar. G. Monaco, S. Cecchini, M.R. Gatto, G.A. Pelliccioni. International Journal of Oral and Maxillofacial Surgery

Përktheu: Erjola Taga