Proteza të lëvizshme të realizuara me një përzierje të teknikës CAD-CAM dhe teknikës tradicionale

Metodologjitë konvencionale për realizimin e protezave totale të lëvizshme nuk kanë pësuar ndryshime dhe inovacion në 50 vitet e fundit dhe kërkojnë më shumë seanca dhe procedura më të gjata laboratorike, përveç ndërhyrjeve të konsiderueshme dhe manipulimeve nga ana e profesionistëve (stomatolog dhe teknik dentar) dhe përdorimit të materialeve të ndryshme, të gjitha këto pasazhe që mund të çojnë në gabime të punimit, pasaktësi, kohë e gjatë dhe kosto të larta.
Në mënyrën tradicionale kërkohen të paktën 5 takime për të përfunduar një protezë totale konvencionale nga gjurma preliminare deri në dorëzimin e protezës. Në vitet e fundit projektimi i kompjuterizuar (CAD-CAM) që ka sjellë një frymë inovative dhe revolucionare në sektorin e protezave dentare fikse, ka gjetur rrugë dhe në sektorin e protezave të lëvizshme duke u shfaqur premtues dhe duke ofruar avantazhe si për dentistin si për pacientin.
Teknika CAD-CAM në fushën e protezave të lëvizshme parashikon marrjen e gjurmës virtuale nëpërmjet skanerit intraoral që mundëson të dhëna për softuerin që mundëson krijimin e një skice virtuale të protezës së ardhshme të lëvizshme (CAD) që do të realizohet më pas nëpërmjet frezimit të materialit të përzgjedhur me CAM. Por duhet që dhe të themi se shpesh profesionistët e mësuar me metodologjinë tradicionale hasin vështirësi në përdorimin e skanerit dhe softuerit përkatës duke mos pasur eksperiencë me këto sisteme të kompjuterizuara.

Në një studim të publikuar në Journal of Prosthetic Dentistry, gusht 2017 propozohet një teknikë për realizimin e protezave totale të lëvizshme që kombinojnë teknikën CAD-CAM me teknikat konvencionale, duke kaluar me bypass fazën e gjurmës virutale me skaner që mund të vendosë në vështirësi operatorët që nuk janë mësuar me sistemet e kompjuterizuara.
Në këtë studim në fakt gjurmët dhe matjet e parametrave të marrëdhënies maksilo-mandibulare janë përftuar duke përdorur teknikat konvencionale dhe protezat e lëvizshme janë në fakt të punuara duke përdorur softuer dhe njësi frezimi të sistemit CAD-CAM.

Metodika e propozuar nga autorët është si më poshtë:
• marrja e gjurmës maksilare dhe mandibulare tradicionale nëpërmjet hidrokoloidit të pakthyeshëm dhe rrjedhjes së modelit në shkumës
• ndërtimi i lugëve individuale
• krahasimi i lugëve individuale të përftuara me gojën e pacientit dhe kryerja e korrigjimeve të duhura dhe krijimi i bordurës me pastë termoplastike (Impression compound; Kerr Corp), pra ribazimi i lugës individuale me pastë me oksid zinku eugenol (Impression Paste; S. S. White Group)
• identifikimi, përcaktimi i: margos posteriore të qiellzës së fortë, planit okluzal, dimensionit vertikal, linjës së buzëqeshjes, pozicionet e kaninëve, linjës së mesit dhe kufijve incizalë të dhëmbëve anteriorë për suportin e buzëz, marrëdhënie qendrore;
• dërgimi i gjurmëve përfundimtare dhe i parametrave të regjistruar në laborator për skanimin dhe dixhitalizimin.
Nëpërmjet softuerit duke futur të gjitha të dhënat e nevojshme do të krijohet skica e protezës së lëvizshme virtuale që mund të modifikohet nga tekniku dentar në bazë të kërkesave në të gjithë parametrat e saj drejtpërdrejt me softuerin, më pas do të kalohet në realizimin e protezave reale me CAM nëpërmjet frezimit të bllokut në rezinë të zgjedhur më parë. Së fundi proteza e frezuar do të përfundohet dhe lustrohet nëpërmjet metodave tradicionale. Më pas proteza do të provohet në gojën e pacientit dhe do t'i nënshtrohet të gjitha korrigjimeve të nevojshme që mund të nevojiten.
Ky kombinim i metodës tradicionale dhe asaj të kompjuterizuar CAD CAM propozuar nga autorët mund të reduktojë kostot e studimit dhe të thjeshtojë realizimin e parametrave okluzalë dhe të raporteve mandibulo-maksilare që mund të rezultojnë të vështira në të kundërt për operatorët që nuk kishin përdorur pajisjet e kompjuterizuara dhe softuerin.
Nuk ka pasur akoma rezultate afatgjata të publikuara për këtë metodikë për të cilën është i nevojshëm një feedback klinik për këtë protokoll.

Nën kujdesin e: Lara Figini, Koordinatore Shkencore e Odontoiatria33

Për më tepër:
Use of CAD-CAM technology for the fabrication of complete dentures: An alternative technique. Burak Yilmaz, Aysen Nekora Azak, Gülce Alp, e Hilal Eks J Prosthet Dent 2017;118:140-143)

Përktheu: Erjola Taga