Protezat fikse adezive me cantilever me zirkon në sektorin anterior mbijetesa rreth 10 vjet

Dhëmbët në rajonin estetik anteriorë përfaqësojnë pothuajse gjithmonë një nevojë urgjente për pacientin që t'i drejtohet ndërhyrjeve dentare duke rikthyer si aspektin estetik si atë funksional. Mungesa e një apo më shumë dhëmbëve anteriorë mund të jetë e llojit kongjenital ose mund të verifikohet si pasojë e aksidenteve traumatike, kariesit dhe periodontitit.
Në këto situata trajtimet e mundshme për të zgjidhur problematikën janë:
• Mbyllja ortodontike e hapësirës
• Proteza dentare fikse adezive me cantilever (RBFDP)
• Implantologjia
• Protezat dentare fikse konvencionale (FDP) me urë
• Autotransplanti i dhëmbëve të qumështit apo të përhershëm

Proteza dentare fikse adezive (RBFDP) me cantilever, mbi të gjitha me materialet më të fundit në treg, janë konsideruar një trajtim minimalisht invaziv për zëvendësimin e dhëmbëve tekë anteriorë që mungojnë dhe mundësojnë rezultate shumë të mira klinike, shkallë të larta të mbijetesës dhe kënaqësi të madhe të pacientit. Këto lloje protezash ofrojnë shumë avantazhe. Këto kërkojnë një përgatitje të thjeshtë dhe konservative, kosto të ulëta dhe janë një opsion trajtimi reversibël pa dashur të sakrifikojnë dhëmbët ngjitur duke i devitalizuar dhe duke i bërë në formë koni si në rastin e protezave tradicionale me urë, përgatitja e tyre është shumë e limituar dhe me risk të ulët për të dhënë inflamacion pulpar, nuk kërkon anestezi dhe ka riskun minimal për të zhvilluar karies.
Këto lloj restaurimesh kanë dëshmuar një shkallë të lartë mbijetese deri në 81,8% pas 18 vitesh shërbimi klinik.
Protezat dentare fikse adezive RBFPD mund të realizohen ose në kompozitë me fibër të përforcuar (ofrojnë një rezultat të mirë estetik por konsiderohen proteza afatshkurtër) ose mund të realizohen në metal-qeramikë duke mundësuar një opsion afatgjatë dhe të suksesshëm kur janë projektuar si proteza me një njësi të vetme me cantilever [Bothelo 2016]. Në vitet e fundit janë paraqitur dhe proteza dentare fikse adezive RBFDP me cantilever me qeramikë integrale si me qeramikë alumini me xham dhe me qeramikë me zirkon që kanë treguar rezultate optimale klinike për sa i përket kohëzgjatjes, suksesit, estetikës dhe funksionit [Kem 2017, Sailer 2014].

Në një studim klinik të publikuar në Journal of Dentistry tetor 2017 është vlerësuar shkalla e mbijetesës afatgjatë e këtyre protezave dentare fikse adezive me cantilever (RBFDPs) me zirkon për të rivendosur incizivët mungues. Është hetuar gjithashtu që shkaku i mungesës së incizivëve kishte një influencë mbi jetëgjatësinë e RBFDPs ose jo.
Autorët e këtij studimi kanë marrë në konsideratë 108 raste të RBFDP me zirkon në 87 pacientë. 75 RBFDP që kanë të bëjnë me incizivët maksilarë dhe 33 incizivë mandibularë. Restaurimet janë klasifikuar më pas në 3 grupe sipas rajoneve të mungesës së elementeve dentare (që mungojnë në mënyrë kongjenitale, nga traumat dhe për motive të tjera). Pacientët janë kontrolluar çdo vit dhe restaurimet janë vlerësuar nga ana funksionale dhe estetike. Koha mesatare e vëzhgimit të RBFDP ka qenë 92,2 ± 33 muaj.
Përgatitja e dhëmbit ngjitur me atë që mungon konsistonte në një fasetë linguale në smalt të përgatitur në shpatull duke përfunduar në marginën incizale dhe me chamfer në marginën cervikale linguale me një box rreth 2 x 2 x 0,5 mm proksimale.

Restaurimet RBFDPs janë projektuar dhe realizuar nëpërmjet teknikës CAD/CAM.
RBFDPs në qeramikë me zirkon kanë prodhuar një shkallë mbijetese prej 10 vitesh me 98,2% dhe një shkallë suksesi prej 92,0%. Nga 108 rastet 6 janë që i është hequr cementimi (i pari pas 11 muajsh, i dyti pas 22 muajsh dhe i treti pas 54 muajsh etj.) dhe një është humbur. Nga 6 rastet që i është hequr cementimi tre raste kanë qenë për motive traumatike. Nga 6 rastet që i është hequr cementimi në 4 raste është përdorur Panavia 21 TC si cement dhe në 2 raste Multilink Automix.
Nga rezultatet e zbuluara nga ky studim mund të përfundojmë se protezat dentare fikse adezive me cantielever me zirkon mundësojnë një jetëgjatësi të shkëlqyer klinike dhe arsyet e mungesës së incizivëve nuk influencojnë jetëgjatësinë e RBFDP me cantilever.

Nën kujdesin e: Lara Figini, Koordinatore Shkencore Odontoiatria33

Përktheu: Erjola Taga