Dr.Fejzi Keraj: Testimi i ricertifikimit do të përfshijë vetëm fushën klinike, jo gjithë literaturën stomatologjike

Viti i kaluar dhe muajt në vijim janë shoqëruar me zhvillime vendimtare për stomatologjinë në vend. Së pari është krijuar Urdhri i Stomatologut me funksionin e entit rregullator në mbrojtje të të drejtave e detyrimeve të profesionistëve.

Dorina Gjuzi

Së dyti është përmbyllur Programi i parë 5-vjeçar i Ricertifikimit si një njësi matëse e përgatitjes së dentistëve dhe shtysë nxitëse e kualifikimit të tyre në vazhdim. Së treti është limituar numri i pranimeve në Fakultetin e Mjekësisë Dentare duke marrë parasysh mbipopullimin e tregut stomatologjik shqiptar. Dentist33.al zhvilloi një intervistë me dekanin e Fakultetit të Mjekësisë Dentare, Dr. Prof. Fejzi Keraj, i cili cek disa nga çështjet kyçe të situatës nëpër të cilën po kalon tregu stomatologjik shqiptar.

Dr. Keraj me ç'vështirësi përballet sot sistemi universitar stomatologjik duke përfshirë atë privat?

Duke marrë në konsideratë numrin madh të stomatologëve dhe në pamundësi për të realizuar procesin mësimor, si atë teorik edhe atë praktik në kushte normale, kemi dy vite që jemi munduar të shkurtojmë numrin e studentëve nga 150 që ka pasur çdo vit Fakulteti i Mjekësisë Dentare. Gjatë vitit të kaluar kemi marrë 60 studentë të cilët kanë ardhur me një nivel shumë të lartë nga gjimnazet, po ashtu edhe këtë vit kemi bërë një kërkesë që të drejtën për të studiuar në fakultetin tonë ta fitojnë 55 kandidatë nga Shqipëria dhe 5 nga trojet. Kësisoj edhe ne pedagogëve na jepet mundësia për t'u marrë konkretisht me çdo student duke krijuar kushtet e duhura teorike dhe praktike për secilin. Ndërsa në të shkuarën kemi qenë disi të cunguar sepse grupet praktike kanë pasur mbi 25-30 studentë secili. Lidhur me universitetet private objeksioni im është se ata duhet patjetër të shkurtojnë numrin e studentëve, pra duhet të mos jenë me tendencë vetëm fitimprurës por të përmirësojnë kushtet në përgatitjen e stomatologëve të ardhshëm.

Prej disa javësh është ngritur Urdhri i Stomatologut. Ç'ndikim mund të ketë, sipas jush, në monitorimin e punës së profesionistëve që përfaqëson?

Mendoj se sot ka ardhur koha që të ketë një kërkesë më të lartë lidhur me bazën materiale dhe punën që bëjnë stomatologët, me licencimin e tyre, si dhe në realizimin e krediteve gjë që përkon me rritjen e tyre profesionale. Prandaj është kërkuar Urdhri i Stomatologut, i cili ligjërisht është ngritur dhe në mënyrë graduale do të jetë efiçent në realizimin e këtyre kërkesave. Ky urdhër në bashkëpunim me Shoqatën Dentare Shqiptare dhe Fakultetin e Mjekësisë Dentare, shpresoj që të përmbushë çdo kërkesë në lidhje me mjekët, por edhe me pacientët. Gjithashtu shpresoj që me krijimin e institucioneve të reja siç është rasti në fjalë, do të përmirësohet marrëdhënia e shtetit me stomatologët dhe me pacientët. Në thelb Urdhri këtë funksion ka, bën rregullimin ndërmjet mjekut dhe pacientit dhe penalizon të gjithë ata që abuzojnë.

QKEV ka nxjerrë listën e dentistëve me 0 kredite, janë rreth 400 të tillë, ndërsa 850 nuk kanë plotësuar 100 kreditet për ciklin 5-vjeçar te ricertifikimit. Ç'qëndrim keni për këtë situatë?

Ne kemi bashkëpunuar me Ministrinë e Shëndetësisë dhe kemi përgatitur programin në lidhje certifikimin e këtyre stomatologëve që do futen në një testim. Problemi është se është hera e parë në stomatologji që ndiqet çështja e krediteve. Ndoshta teorikisht është kërkuar plotësimi i tyre, ndërsa tani po zbatohet ligjërisht dhe duke marrë në konsideratë këtë, ne kemi përgatitur një program, i cili është më tepër i nivelit teoriko-praktik. Pra po përgatitemi për certifikimin e stomatologëve që nuk kanë plotësuar kreditet pikërisht nëpërmjet këtij testimi. Ky fakt i bën të ndërgjegjshëm të gjithë stomatologët që brenda vitit duhet të plotësojnë 20 kredite dhe brenda 5-vjeçarit 100 kredite. Si rrjedhojë në ciklet e tjera këta profesionistë do të jenë më të përgjegjshëm ndaj kërkesave për përditësimin e njohurive të tyre dhe ndjekjen e programeve të edukimit në vazhdim.

Në rast se nuk e kalojnë testimin ju pezullohet licenca dhe do humbasin vendin e punës...

Janë institucionet shtetërore dhe Urdhri i Stomatologut që merren, unë nuk mund të jap asnjë version lidhur me këtë, por bashkë me stafin pedagogjik të fakultetit jemi të ndërgjegjshëm që duhet të krijojmë mundësitë dhe kushtet që këta stomatologë të bëjnë testin dhe të kenë mundësi për ta kaluar. Testimi do të ketë karakter klinik. Ne nuk po kërkojmë që të bëjmë një rishikim të të gjithë literaturës stomatologjike, por atë të fushës klinike me të cilën stomatologu përballet çdo ditë dhe kjo do të jetë kërkesa jonë fillestare ndaj këtyre profesionistëve. Pastaj, në ciklet e tjera shpresojmë të jenë më të ndërgjegjësuar me plotësimin e krediteve dhe nëse nuk do të jenë, atëherë duhet të merren masa më të rrepta.

Ç'mendim keni për edukimin në distancë pra kurset online, të cilat prej vitesh ndiqen nga profesionistët në vendet perëndimore?

Fakulteti bashkë me Shoqatën Dentare Shqiptare janë munduar që vazhdimisht të organizojnë programe të edukimit në vazhdim, por çdo stomatolog ka mundësi që dhe në mënyrë individuale të plotësojë kreditet nëpërmjet literaturës që studion. Megjithatë mendoj se një pjesë e rëndësishme e krediteve duhet të plotësohen nëpërmjet konferencave e kongreseve, ku kanë mundësi bashkëveprimi dhe pjesëmarrjeje aktive në evente të drejtuara shpesh edhe nga profesorë të huaj që japin ndihmesën e tyre nëpërmjet temave të ndryshme.

Një koment të fundit mbi nismën e LIFE për të hapur portalin e parë informativ dedikuar stomatologëve në Shqipëri?

Mendoj që është një nismë shumë pozitive, një risi që besoj se do të jetë një suport për të gjithë stomatologët, e veçanërisht për ata që kanë më pak mundësi për të marrë pjesë në konferenca. Do t'ju vijë në ndihmë dentistëve, që nëpërmjet këtij portali do të informohen mbi problematikat e stomatologjisë shqiptare, por edhe të vendeve të BE-së e më gjerë, si dhe të marrin informacion mbi risitë më të fundit të shkencës sa i takon këtij profili.