Dita Botërore e Shëndetit Oral, Prof.asoc. Dorjan Hysi: Shëndeti oral neglizhohet, njerëzit harrojnë se shumë patologji të trupit janë të lidhura me ato të zgavrës së gojës 

Ekziston një lidhje e vërtetuar mes shëndetit oral dhe atij të përgjithshëm: sipas një studimi mbi 40% e njerëzve me sëmundje të rënda të gojës, vuajnë gjithashtu nga një ose më shumë sëmundje të tjera kronike. Prandaj edhe qëllimi i Ditës Botërore të Shëndetit Oral që celebrohet çdo 20 mars, është ndërgjegjësimi i njerëzve, familjeve, komuniteteve dhe institucioneve që të veprojnë për të reduktuar patologjitë orale. Më 20 mars, mbi një milionë dentistë nga 130 shtete të ndryshme i bashkohen Federatës Dentare Botërore (FDI) për të shënuar Ditën Botërore të Shëndetit Oral. Në këtë kontekst, Shoqata Dentare Shqiptare bashkë me Shoqatën Shqiptare të Dentistrisë Pediatrike dhe Shoqatën Dentare të Studentëve të Shqipërisë do të organizojë të shtunën, më 19 mars konferencën me të njëjtën temë. Presidenti i SHDSH-së, prof.asoc. Dorjan Hysi, i mëshon mesazhit se një shëndet i mirë i gojës shkon përtej të pasurit të një buzëqeshjeje të këndshme dhe se në thelb ai është i ndërthurur me mirëqenien e përgjithshme. Ndërsa kreu i Shoqatës Dentare të Studentëve, z.Cristian Cura, tregon për Dentist33.al mbi organizimin e Konferencës së Parë Kombëtare të Studentëve të Stomatologjisë.

Prof. Hysi, cili është fokusi i këtij viti në Ditën Botërore të Shëndetit Oral?

Prej disa vitesh FDI, Shoqata Botërore e Dentistëve, ka shpallur 20 marsin si Ditën Botërore të Shëndetit Oral. Në pjesën më të madhe të vendeve të botës, shëndetit të gojës nuk i kushtohet rëndësia e duhur, njerëzit përqendrohen më tepër te mjekësia duke lënë pak mënjanë shërbimin dentar. Në fakt shëndeti oral nuk duhet parë i ndarë nga ai i organizmit në tërësi, problemet që mund të ketë zgavra e gojës mund të bëhen shkak për probleme të tjera në organizëm dhe e anasjellta. Të tilla janë për shembull sëmundjet e zemrës, të pankreasit apo të mushkërive. Për të të dhënë idenë e gjithë fushatës nuk ka ndërrim sloganesh, por  fokusi mbetet ai i kahershmi: një gojë e shëndetshme në  organizëm të shëndetshëm.

Na tregoni diçka më shumë për eventin?

Me rastin e kësaj dite, aktivitetin do ta zhvillojmë të shtunën më datë 19 mars, meqë edhe mjekët stomatologë, të përgjithshëm e specialistë, e kanë më të lehtë për të ardhur e për ta ndjekur. Temat do të trajtohen nga lektorë shqiptarë, pra nuk do të kemi të ftuar të huaj dhe kolegët do të asistojnë në leksione që lidhen me profilaksinë e fëmijëve, profilaksinë e kancerit të gojës, patologjitë në moshën e tretë, invalidët, autikët. Sigurisht që fokusi mbetet te parandalimi në grupmosha të ndryshme për patologji të ndryshme, duke filluar që nga fëmijëria, mosha e adoleshencës, adultët e deri te mosha e tretë. Ditën e aktivitetit mjekëve stomatologë do t'iu ofrojmë fletëpalosje të përgatitura nga Shoqata Dentare Shqiptare me informacione të ndryshme për patologjitë e zgavrës së gojës, të cilat mund t'i vendosin në ambientin e pritjes së klinikave.

    
Z.Cura, Shoqata e Studentëve të Stomatologjisë zhvillon në të njëjtën ditë konferencën e saj të parë?

Po, katër muaj pas krijimit Shoqata Dentare e Studentëve të Shqipërisë, zhvillon konferencën e saj të parë, ku studentë nga Fakulteti i Mjekësisë Dentare, Universiteti Zonja e Këshillit të Mirë, Universiteti Aldent dhe Albanian University do të prezantojnë punimet e tyre të realizuara me ndihmën e pedagogëve udhëheqës.
Shqipëria nuk ka pasur më parë shoqatë studentësh të stomatologjisë, ndërsa të tilla gjen në çdo vend të zhvilluar, si në BE, SHBA, Kanada, Australi etj. Shoqata e studentëve do të aktivizohet në evente të edukimit në vazhdim, në projekte komunitare, si dhe do t'i kushtojë vëmendje interesave të studentëve në tërësi. Pra, pak a shumë ka një funksion dhe angazhime të ngjashme me ato të Shoqatës Dentare Shqiptare ndaj anëtarëve të saj.

Prof. Hysi dispononi të dhëna si Shoqatë lidhur me patologjitë orale në nivel global dhe kombëtar?

Sipas statistikave të FDI-së patologjitë orale prekin 3.9 miliardë njerëz në të gjithë botën, ku 60 - 90% e fëmijëve vuajnë nga prishja e dhëmbëve. Mungesa e trajtimit të dhëmbëve është gjendja më e përhapur mes sëmundjeve të studiuara, ndërsa ato të rënda periodontale hasen në 15% - 20% të personave në moshë të mesme (35-44 vjeç). Trajtimi i sëmundjeve orale mund të jetë i kushtueshëm, por nga ana tjetër është fakt se në vendet ku ka investim më të madh në kujdesin parandalues oral, ka një reduktim të sëmundjeve orale dhe si rrjedhojë edhe kursime më të mëdha në kujdesin dentar. Pra një ndërgjegjësim më i madh në parandalim ka një impakt pozitiv në shpenzimet ekonomike.
Sa i takon Shqipërisë, të dhënat më të fundit që kemi i përkasin vitit 2012, pasi edhe studimet statistikore bëhen një herë në 5 vjet. Ato i referohen një studimi të ndjekur në grupmoshën 12 vjeçare, në të cilën prevalenca e kariesit dentar rezultoi diku te  83%, ndërsa indeksi i sëmundshmërisë karioze ishte me 3.7. Që do të thotë se mesatarisht një individ në këtë grupmoshë i prekur nga kariesi, ka 3.7 dhëmbë të prishur, të hequr ose të mbushur, një shifër goxha e lartë kjo krahasuar me vende të Bashkimit Evropian, ku normat luhaten mes 0.7 dhe 1.2.

Përpos organizimit të këtij aktiviteti, a ka nisma te tjera të SHDSH-së drejtuar popullatës për të promovuar shëndetin oral, si për shembull konsulta apo trajtime falas?

I gjithë muaji mars është muaji i shëndetit të gojës dhe ne kemi zhvilluar aktivitete, me studentët e Fakultetit të Mjekësisë Dentare kryesisht, në një shtëpi të moshuarish, në  një institucion me fëmijë autikë, po ashtu në komunitetin rom dhe në qendrën "Zyber Hallulli". Aktivitete të tjera janë organizuar nga Shoqata e Studentëve, të tilla si në fshatin Reps me korpusin e paqes (projekt i cili do të vazhdojë) apo në bashkëpunim me Kryqin e Kuq në disa shkolla të Tiranës lidhur me edukimin dentar. Kemi zgjedhur një grup studentësh që ndryshon dhe që i shoqëron çdo herë një pedagog i ndryshëm. Por sigurisht kemi dhe projekte të tjera në plan realizimi. Ajo që dua të nënvizoj është se nuk ka asnjë lloj financimi për to, pra gjithçka bëhet në mënyrë vullnetare nga studentët dhe pedagogët.

Kur vjen puna te aktivitetet e akredituara, gjëja e parë që duan të dinë profesionistët është numri i krediteve. Me sa të tilla është vlerësuar konferenca?

Ne si Shoqatë kemi aplikuar paraprakisht në Qendrën Kombëtare të Edukimit në Vazhdim, e cila na ka dhënë një përgjigje zyrtare se numri i krediteve është 5, por duhet pasur parasysh se vlerësimi përfundimtar i çdo aktiviteti nga QKEV jepet mbas zhvillimit të aktivitetit, sepse e tillë është edhe procedura. Pra ai vlerësohet paraprakisht në bazë të dokumentacionit që i dorëzojmë, një vlerësim tjetër bëhet gjatë zhvillimit të aktivitetit dhe në fund bëhet relacioni përfundimtar ku përcaktohet edhe numri i krediteve. Shoqata Dentare Shqiptare si ofruesi kryesor i aktiviteteve për stomatologët ka pasur gjithnjë interesin e madh të tyre për t'i ndjekur, madje shpesh herë na është dashur të mbyllim regjistrimet për shkak të plotësimit të numrit të pjesëmarrësve duke qenë se synimi ynë është ofrimi i një aktiviteti sa më cilësor.

Përgatiti: Dorina Gjuzi
 

Për të votuar duhet të vendosni kredencialet tuaja në Medikey

Interesant ( 172 votim / mesatar 3 )