Duhani dëmton edhe dhëmbët e fëmijëve. Rreziku për karies më i shpeshtë nëse një nga prindërit është duhanpirës

Davis Cussotto

Duhanpirja pasive rrit riskun për karies te fëmijët. Këtë e ka treguar një studim japonez i publikuar në numrin e tetorit në British Medical Journal.
Nga studimi doli se ekspozimi ndaj duhanit i fëmijëve që ishin 4 muajsh dyfishon riskun për zhvillimin e kariesit te dhëmbët e qumështit.

Dr. Koji Kawakami studiues në Universitetin e Kioto me ekipin e tij ka marrë në ekzaminim 75.000 fëmijë të lindur nga 2004 deri në 2010 me të paktën njërin nga prindërit duhanpirës që ka plotësuar një pyetësor për të vlerësuar ekspozimin ndaj duhanpirjes pasive nga shtatzënia deri në moshë tre vjeçare të fëmijës.
Fëmijët i janë nënshtruar kontrolleve shëndetësore kur ishin 4, 9, 18 dhe 36 muajsh dhe janë zbuluar 13 mijë raste me karies.

Nga të dhënat rezultuese studiuesit kanë vënë re se ekspozimi ndaj duhanpirjes dyfishon mundësinë për të zhvilluar karies në krahasim me grupin e kontrollit.
Pavarësisht se të dhënat nuk mund të përcaktojnë një raport të saktë shkak - efekt, studiuesit e vënë gishtin mbi një risk shumë të madh që lidhet me duhanpirjen pasive, për të cilën e dimë që favorizon zhvillimin e atakut kardiak dhe bronko-pulmonar te fëmija.

Sipas Rosie Roldan përgjegjëse e Nicklaus Children's Hospital në Miami, duhanpirja pasive shkakton ndryshime biokimike në përbërjen e lëngut të pështymës që redukton efektin mbrojtës te smalti i dhëmbit.
Nëse të dhënat do të konfirmohen nga studime të tjera, mund të zgjeroheshin normat aktuale për parandalimin e kariesit, si për shembull zvogëlimi i konsumit të sheqernave dhe plotësuesve të fluorit.

Përktheu: Valbona Spahia