Stresi dhe dëmet për shëndetin e klinikës dentare

Nga eksperti amerikan këshillat se si ta parandalojmë stresin për të shmangur efektet katastrofike

Nga Davis Cussotto

I kalojmë ditët tona duke bërë diagnoza, terapi dhe duke edukuar pacientët, klientët tanë të jashtëm që na mundësojnë jetesën. Por nuk ka mbaruar, me largimin e pacientëve duhet të menaxhojmë personelin, bashkëpunuesit, pra klientët e brendshëm të cilët na takon neve t'i vlerësojmë dhe transformojmë në një burim për biznesin e vogël që menaxhojmë.

Ka shumë për të menduar dhe për të bërë: e gjitha me raste na duket e pakalueshme sikur një përrua na ka përfshirë totalisht dhe na ka lënë pa rrugëdalje. Kjo ndjesi sipas Daniel Goleman, psikolog dhe eseist autor i best seller-it (më i shituri) "Intelligenza Emotiva", (Inteligjenca emocionale), është një prej shumë shenjave me të cilat shfaqet stresi. Pra një sindromë e përgjithshme që përshtatet dhe kërkon që të stabilizojë një ekuilibër të ri në brendësi të organizmit por me efekte befasuese të dëmshme për shëndetin dhe biznesin. Dëmet e konsiderueshme në shëndet janë: pagjumësi, probleme kardiovaskulare, diabet i paqëndrueshëm, infertilitet deri në sindromën e frikshme të burnout.

Në klinikën dentare stresi në fakt gjeneron impulse negative, vendime pa qartësinë e duhur, zgjidhje pa krijimtari, raporte me kolegët shumë reaguese, e-mail që ushqejnë pakënaqësi dhe grindje dhe pasoja ekstreme në shërbimin e kurave dentare të cilat humbin cilësinë.

Selly McKenzie konsulente e menaxhimit na mundëson nëpërmjet blogut të saj sugjerime të dobishme se si të parandalojmë stresin për të shmangur efektet katastrofike në menaxhimin e bashkëpunuesve:

1) Përzgjedhja e vetëdijshme e bashkëpunëtorit. Jetojmë në një epokë në të cilën kërkesa për punë është më e madhe se oferta. Kur zgjedhim një bashkëpunëtor shpesh kemi në dispozicion më shumë se një kandidat dhe zgjedhja bëhet sipas një kriteri. Nis nga kurrikula duke kërkuar balancimin e duhur midis edukimit dhe eksperiencës për rolin. Kryej më pas një kërkim në ueb për të vlerësuar profilin social të kandidatit. Janë dy kalime që të lejojnë tashmë që të përjashtosh disa persona, e fundit, intervista. Pyet gjithmonë se cilat janë pikat e saj të forta dhe defektet, ndihmon në krijimin e profilit të personalitetit. Kërko të kuptosh përse ka ndërprerë raportin e punës së mëparshme dhe nëse është e nevojshme kërko referenca. Mos zgjidh menjëherë me intuitë por plotëso të gjitha intervistat që kishe programuar. Me shumë mundësi mund të kryesh një intervistë të dytë nëse duhet të zgjedhësh midis dy prej tyre.

2) Ndihmoje bashkëpunëtorin që të rritet dhe mundësoji udhëzimet e duhura. Shumë dentistë mendojnë se anëtarët e rinj të ekipit janë në gjendje të shquhen edhe pa udhëzime. Është një gabim i madh. Duhet t'i mundësosh atyre përshkrime të detajuara të punës që duhet të kryejnë dhe më pas t'i lësh hapësirën për rritjen autonome pa harruar një feedback të vazhdueshëm me një bazë kohore të ndryshueshme që do tentojë të rrallohet me kohën por nuk zhduket kurrë.

3) Blloko konfliktet që në fillim. Një anëtar i ri i ekipit mund të ndryshojë sjelljet e kristalizuara të kolegëve dhe të krijojë tension dhe zënka. Çdo konflikt i vogël nuk duhet lënë pas dore por duhet ballafaquar menjëherë. Pacienti, klienti ynë i jashtëm është ai që i vë re konfliktet në ekip dhe mund të vendosë që të ndryshojë dentist.

4) Mëso që t'i besosh të tjerëve dhe të delegosh. Shumë dentistë kanë zakonin e babait padron dhe duan të jenë të përfshirë në çdo vendim edhe nëse është shumë i vogël. Me shumë mundësi kanë vështirësi që t'i besojnë të tjerëve dhe nuk ndihen kurrë vërtetë rehat me veten, që t'i lejojnë të tjerëve minimumin e pushtetit. Kjo qasje provokon stres në të gjithë ekipin dhe demoralizim te bashkëpunëtorët që nuk do mund të rriten kurrë realisht. Nëse je një prej këtyre mëso që të heqësh dorë nga kontrollet e tua të përpikta. Kërko azhornime mbi punët e kryera pa u futur në detaje dhe mos u ndiej i detyruar se duhet të jesh i përfshirë. Let it be (le të jetë) thotë kënga e Paul McCartney, nuk ka asgjë më të mençur si mesazh përmbyllës.

Përktheu: Erjola Taga