Furçat elektrike, dentistët dhe higjienistët i rekomandojnë por nuk i përdorin

AltroConsumo ka treguar se cilat janë më të mira

"Doktor, është më mirë të përdor furçë elektrike apo furçë manuale?" Kjo është një pyetje me të cilën dentisti haset shumë shpesh.
Odontoiatria33, nëpërmjet një sondazhi të kryer me lexuesit e saj vitin e kaluar, është munduar të kuptojë se cila ishte përgjigjja që jepet. 53% e stomatologëve dhe higjienistëve dentarë të cilët janë lexues të faqes online dhe që kanë marrë pjesë në sondazh, kanë indikuar që i rekomandojnë pacientëve një furçë elektrike edhe pse më pas deklarojnë se nuk e përdorin atë për higjienën e tyre orale (58% e tyre). Ndërsa nga ana tjetër, përdorimi i furçës elektrike mbetet ende jo shumë i zhvilluar sipas përgjigjeve që kanë dhënë pacientët në një sondazh të zhvilluar me lexuesit e Dica33, portali që i dedikohet shëndetit të qytetarëve nga Grupi Editorial EDRA.

Sipas të dhënave të marra 29% e pacientëve përdorin një furçë elektrike. Femrat janë më të shumta në numër në përdorimin e furçës elektrike (30% e tyre ka deklaruar se përdor një furçë të tillë) në krahasim me meshkujt (19%). Më pak jo-homogjene është diferenca sipas nivelit arsimor të personave që përdorin furçën elektrike: e përdorin 26% e zyrtarëve, 30% e të diplomuarve dhe 23% e atyre me diplomë në shkollën e mesme. Më pak të rëndësishme janë diferencat ndërmjet profesioneve: 25% janë të papunë, 31% janë të punësuar, 24% janë sipërmarrës, 29% janë të vetëpunësuar, 25% janë punëtorë dhe 27% janë pensionistë. Mosha mund të jetë një faktor kushtëzues në zgjedhjen e kësaj furçe duke parë që personat mbi 50 vjeç janë ato që kanë deklaruar më së shumti se përdorin një furçë elektrike, në krahasim me grupmoshat më të reja, me një rënie drastike te të rinjtë: 88% e studentëve përdor furçë manuale.

"Ende në ditët e sotme shumë persona e lidhin përdorimin e furçës elektrike me vështirësitë manuale ose paaftësitë, duke menduar kështu në mënyrë të gabuar", shpjegon për Odontoiatria33 Antonella Abbinante, presidente e AIDI. "Ashtu siç kanë treguar shumë kërkime, për këdo është shumë më e vështirë të përdorë një furçë manuale, duke rrezikuar që të dëmtojë edhe më shumë gingivat, në krahasim me përdorimin e një furçe elektrike; pa llogaritur efikasitetin më të vogël të pastrimit. Megjithatë është e gabuar të mendohet që me furçën elektrike zgjidhen të gjitha problemet, pasi në të dyja rastet, thelbësore është që të mësohet përdorimi që demonstron higjienisti dentar ose stomatologu në momentin e rekomandimit të saj. Për një higjienë orale të suksesshme përcaktues është motivimi i pacientit", vijon presidentja Abbinante duke shpjeguar sesi pacientët që i afrohen furçës elektrike ndjehen më të motivuar, "ana tjetër e medaljes është që pacienti beson se me furçën elektrike i kushtohet më shumë kohë larjes së dhëmbëve sesa me furçën manuale."
Përsa i përket evidencës që stomatologu dhe higjienisti dentar janë rekomandues të furçës elektrike por jo përdorues të saj, presidentja Abbinante pranon që profesionistët e shëndetit shpesh supozohet se përdorin në mënyrë të suksesshme furçën manuale. "Sigurisht ne e dimë se cilat janë teknikat që duhen përshtatur dhe kemi një lëvizshmëri të mirë manuale, por a jemi të sigurt se po ndjekim një pastrim të kujdesshëm?", shtron pyetjen presidentja e AIDI duke shtuar, "duhet të dimë edhe që në disa zona të gojës është vërtetë e vështirë të arrijmë të pastrojmë me saktësi me furçën manuale, ndërkohë që me furçën elektrike rezultatet janë vërtetë të kënaqshme."

Por cilat furça elektrike janë më të mira?
Shoqata AltroConsumo është marrë me këtë dhe në numrin e marsit në revistën e saj ka testuar 17 modele të pranishme në treg. Ndërmjet vlerave të marra në konsideratë ishin sasia e pllakës që është hequr, ndërrimi i baterisë, tipologjia e kokës, aksesorët e ndryshëm që janë të pranishëm dhe kosto vjetore e përdorimit. Për të "klasifikuar" furçat elektrike janë vlerësuar efikasiteti, lehtësia e përdorimit, bateritë dhe kosto vjetore. Për më tepër i janë dërguar edhe 20 vullnetarëve për të njohur përshtypjen mbi këtë "fushë". Nëse mbi aspektet e tjera çdo profesionist, stomatolog dhe higjienist dentar, di të vlerësojë mirë efikasitetin e çdo produkti të vetëm - pra për të mos u zgjatur - është interesant vlerësimi që AltroConsumo ka propozuar mbi bazën e "kostos së menaxhimit" të çdo furçe elektrike të testuar.

"Kemi llogaritur koston vjetore të çdo furçe elektrike të testuar" - shpjegojnë persona nga AltroConsumo - "duke marrë në kosnideratë çmimin e blerjes dhe numrin e kokave të përfshira në konfeksion." Për testin, AltroConsumo ka marrë në konsideratë amortizimin e kostos së blerjes së "dorezës" për 5 vjet dhe që kokat duhet të zëvendësohen çdo 3 muaj. Modeli me koston më të mirë vjetore është ai me 6 euro në vit ndërsa më i kushtueshme ndërmjet atyre që janë testuar arrin 55 euro në vit. Philips Sonicare Healthy White+ HX8911/02 ka rezultuar produkti më i mirë i testit, Oral B Vitality si blerja më e mirë ndërsa produkti me çmimin më të mirë ishte Nevadent (LIDL).

Përktheu: Valbona Spahia