Turizmi stomatologjik, fenomen global

Një kërkim i Zelandës së Re është përpjekur që të identifikojë shkaqet kryesore të mos suksesit

Turizmi stomatologjik është një fenomen që prek vendet kryesore të industrializuara të Botës. Sipas të dhënave të kohëve të fundit, çdo vit rreth 50.000 pacientë nga Mbretëria e Bashkuar kërkojnë kura stomatologjike jashtë vendit. Ndër arsyet, sigurisht, janë kërkimi i kurave me tarifa më ekonomike por edhe ai për të bashkuar kurat stomatologjike me pushime në një vend të këndshëm, të paktën kjo ndodh për shumë pacientë të Shteteve të Bashkuara por edhe për ata të Zelandës së Re që i drejtohen kryesisht dentistëve rezidentë në Azi: kryesisht Tailandë (90%).

Një kërkim i universitetit të Ontago në tokën e Kiwi, ka kërkuar të analizojë problemet e hasura nga pacientët pasi janë kthyer në shtëpi. Kërkimi është publikuar në Tourism Management nga profesor Brent Lovelock i Departamentit të Turizmit, nga doktor Kirsten Lovelock i Departamentit të shëndetit publik dhe nga profesori i stomatologjisë Karl Lyons.

Kërkimi ka hetuar 337 dentistë të Zelandës së Re që kishin pasur të paktën një herë rastin të vizitonin pacientë që i ishin nënshtruar kurave jashtë vendit, kur i nevojiteshin kura korrigjuese. Problemet kryesore të treguara nga dentistët ishin shkaktuar nga mungesa e kontrolleve nga kurat e kryera kryesisht ato protetike dhe implantologji, por edhe mungesa e planifikimit të ndërhyrjes shpesh e kryer në kohë shumë të reduktuara.

"Pacientët nuk janë të vetëdijshëm për cilësinë e dobët të punës që marrin dhe të ndryshimeve në standardin e kurave në krahasim me stomatologun e Zelandës së Re", nënvizon një dentist i përfshirë në kërkim. "Janë trajtuar shpesh me kura jo të nevojshme dhe në mënyrë jo të përshtatshme me dëmtime ireversibël".

Ndërsa, rreth gjysma e dentistëve të përfshirë në kërkim njeh se turizmi dentar lejon aksesin ndaj kurave me kosto të reduktuara, 6% mendon se kurat jashtë vendit përmirësojnë shëndetin oral të pacientëve ndërsa (sigurisht) vetëm 1,9% do t'i këshillonte pacientëve të tij që të shkonin dhe të kuroheshin jashtë vendit.

Për presidentin e New Zealand Dental Association, David Crum, turizmi stomatologjik ka të bëjë vetëm me një pjesë të vogël të banorëve të Zelandës së Re dhe risqet për shëndetin janë për më tepër "të lidhura me nevojën për të kryer me shpejtësi rehabilitimin dhe nga fakti që për ta kuruar është një profesionist i panjohur për pacientin". Shoqata mendon se kurat më efikase janë ato në të cilat vendoset "një marrëdhënie afatgjatë asistence me një dentist që të kënaqë standardet e detyrueshme të parashikuara në Zelandën e Re".

Në frontin e konkurrencës 15% e dentistëve të intervistuar ka deklaruar se konsideron që turizmi stomatologjik ka një impakt negativ në ekonominë e vetë klinikës ndërsa 6% mendon se rrit numrin e pacientëve duke parë se ata të kuruar jashtë kanë më pas nevojë për ndërhyrje të mëtejshme.

Përktheu: Erjola Taga