Diabeti tek adultët mund të jetë i 5 llojeve të ndryshme

Ja klasifikimi i propozuar

Sipas një studimi të publikuar në Lancet Diabetes & Endocrinology, një sistem i ri i klasifikimit për diabetin që fillon në moshë adulte dhe ndahet në 5 nëngrupe, është në gjendje që të përfaqësojë progresionin unik të sëmundjes dhe riskun e komplikimeve që lidhen me të.

"Kjo metodë grupimi e llojit të diabetit mund të aplikohet lehtësisht te pacientët si në praktikën klinike ashtu dhe në studime", shprehet Emma Ahlqvist e Lund Unviversity në Suedi.

Kërkuesit kanë analizuar të dhënat e 8.980 pacientëve suedezë në moshë jo më të vogël se 18 vjeç me diagnozë të re të diabetit dhe i kanë klasifikuar në bazë të karakteristikave klinike, përfshirë praninë e antitrupave anti-dekarboksilase të acidit glutaminik (GADA), moshën e diagnostikimit të diabetit, indeksin e masës trupore (BMI), hemoglobinën e glikuar dhe vlerësimet e modelit homeostatik 2 (HOMA2) ose funksionin e qelizave beta dhe rezistencën ndaj insulinës.

6,4% e grupit binte në grupin e parë, që mblidhte pacientët me diabet të përcaktuar si autoimun i rëndë. Karakteristikat klinike të këtyre pacientëve përfshinin debutimin e hershëm të sëmundjes dhe pozitivitetin ndaj GADA, një BMI më e ulët, një kontroll i dobët metabolik dhe deficit i insulinës. Në këtë grup ka qenë përqindja më e lartë e individëve me përshkrim të insulinës (42%).

Grupi i dytë, përfshinte pacientë me një diabet insulino-deficient të rëndë dhe paraqiste karakteristika klinike të ngjashme me grupin e parë, përveç negativitetit ndaj GADA, por kishte përqindjen më të lartë të përshkrimeve të metforminës dhe riskun më të lartë të retinopatisë diabetike.

Grupi i tretë përfshinte pacientë me diabet insulino-rezistent të rëndë, të barabartë me 15,3% të grupit dhe karakterizohej nga një shkallë e lartë e insulino-rezistencës kombinuar me një BMI të lartë, paraqiste pak përshkrime të metforminës dhe një risk në mënyrë domethënës më të lartë për sëmundjen renale diabetike.

Rreth një e pesta e pacientëve ishin grumbulluar në grupin e katërt, me një diabet të lehtë të lidhur me obezitetin, përcaktuar nga një prani e obezitetit pa insulino-rezistencë.

Grupi i pestë, ai që kishte të bënte me rreth 40% të pacientëve, kishte një diabet të lehtë të lidhur me moshën, karakterizuar nga një fillim më i avancuar, pa një profil metabolik të dobët si në rastet e grupeve të tjera. "Në studimet e ardhshme, do të jetë thelbësore të hetojmë nëse klasifikimi i caktuar për një pacient të vetëm evoluon me moshën", shkruan Rob Sladek, i McGill University në Montreal, në një koment ndaj studimit.

Për më tepër:

Lancet Diabetes Endocrinol 2018. Novel subgroups of adult-onset diabetes and their association with outcomes: a data-driven cluster analysis of six variables
Lancet Diabetes Endocrinol 2018. The many faces of diabetes: addressing heterogeneity of a complex disease

Përktheu: Erjola Taga