Shëndeti oral: miqtë e vërtetë dhe ata të rremë

Siç nënvizojnë Udhëzimet ministrore, higjiena orale e përditshme dhe kontrollet periodike te dentisti dhe te higjienisti dentar janë dy instrumente thelbësore parandaluese. Por për të mbajtur zgavrën e gojës në kushte të mira shëndetësore është edhe më e rëndësishme që të bëjmë kujdes ndaj masave paraprake dhe të bëjmë dallimin midis miqve të vërtetë dhe atyre të rremë të dhëmbëve dhe të gingivave.

Miqtë e vërtetë

Furça elektrike
Mundëson një pastrim më të thelluar, falë arritjes në të gjitha zonat e harkadave dentare dhe të atyre interproksimale. Gjithashtu, na bën më të vetëdijshëm për sa i përket manovrave të higjienës orale duke na ndihmuar që të kalojmë pengesa si pastrimi jo i plotë dhe presioni i tepërt që shpesh ushtrohet me furçat manuale.

Shpëlarja me ujë
Të shpëlash në mënyrë të vrullshme gojën me ujë çezme është e dobishme për një heqje fillestare të mbetjeve ushqimore interdentare (sidomos për ata që mbajnë aparate ortodontike ose proteza fikse) por këshillohet edhe pas konsumimit të ushqimeve acide. Shpëlarja, gjithashtu, duke mos pasur efekte përfituese në reduktimin e pllakës bakteriale, duket se favorizon një zvogëlim të gjakrrjedhjes gingivale.

Pastruesi i gjuhës dhe probiotikët
Për ata që vuajnë nga halitosis, përveç pastrimit të dhëmbëve, bëhet i nevojshëm dhe pastrimi i gjuhës, i preferueshëm me një pastrues gjuhe specifik. Ky objekt i vogël përdoret duke kryer lëvizje të përsëritura por delikate nga pjesa posteriore në atë anteriore e gjuhës deri në eliminimin e plotë të asaj shtrese të bardhë që ndonjëherë mund të formohet në sipërfaqen e saj. Një qasje e re parashikon gjithashtu administrimin e probiotikëve që falë tretjes së tyre të ngadaltë në gojë janë në gjendje të reduktojnë përqendrimin e baktereve dhe të përmirësojnë karakteristikat organoleptike të frymës.

Miqtë e rremë

Verë dhe kafe
Është e vërtetuar shkencërisht se disa ushqime si vera dhe kafja, në doza të moderuara kanë një efekt pozitiv në organizëm. Por kjo nuk vlen për shëndetin oral: kafja dhe vera e kuqe (ashtu si dhe duhani) mund të shkaktojnë pigmentimin e sipërfaqeve dentare, mbi të gjitha në mungesë të një larje korrekte të dhëmbëve që heq pllakën bakteriale.

Përmirësimet në kushtet e shtëpisë
Recetat e gjyshes apo medikamentet që përziejnë bashkë disa elemente si bikarbonati dhe limoni, nuk përfaqësojnë zgjidhjen e duhur për një buzëqeshje më të bardhë. Përkundrazi, favorizojnë humbjen progresive të smaltit, i cili do të rezultojë abraziv dhe eroziv.

Një pastë dhëmbësh e çfarëdoshme
Pasta e dhëmbëve që të jetë efikase duhet të jetë e përshtatshme për kushtet shëndetësore të zgavrës së gojës. Për këtë ekzistojnë pasta specifike për ata që vuajnë nga patologji të caktuara (si gingiviti apo periodontiti) që reagojnë për të parandaluar apo ndaluar këto shqetësime. Gjithashtu nëse është e mundur pasta e dhëmbëve duhet të këshillohet nga ekspertë të fushës. Pasta e dhëmbëve përmban në fakt substanca të shumta, disa prej të cilave mund të provokojnë efekte të papritura, si një reagim alergjik, ndjeshmëri të mukozave orale ose një dëmtim të smaltit.

Gjeste të vogla të zakonshme
Një mama që paraqet një risk të lartë për karies duhet të shmangë ndarjen e lugës së ushqimit ose larjen e biberonit me pështymën e saj që të mos i transmetojë bakteret nga goja e saj te ajo e fëmijës.

Claudio Buono

Përktheu: Erjola Taga