Të vaksinohen adoleshentët për të parandaluar tumorin orofaringeal

ECHNO rihedh propozimin për vaksinën kundër Papilloma virus

Tumoret kokë-qafë, në vitet e fundit janë në rritje, në veçanti ato orofaringeal. Nëse një kontribut i rëndësishëm vjen nga stilet e jetesës, vlerësohet se 50% e rasteve, në Europë mund t'i atribuohet edhe infeksioneve nga HPV. Për këtë është thelbësore që adoleshentët t'i nënshtrohen vaksinimit kundër Papilloma virus: nëse kryhet në të dy gjinitë kjo profilaksi mjekësore mund të reduktojë në mënyrë drastike infektimet dhe kështu edhe riskun onkologjik.

Është ky kuadri në qendër të Kongresit Europian të Shoqatës së Onkologjisë Cerviko-Faciale (ECHNO 2018) që është zhvilluar në Romë. "Tumoret kokë-qafë përfaqësojnë tashmë 20% të të gjithë tumoreve mashkullore" afirmon prof. Giuseppe Spriano, President i Kongresit (ECHNO 2018) dhe primar i Otorinolaringologjisë dhe Kirurgjisë Onkologjike Cerviko-Faciale të Institutit Nacional të Tumoreve Regina Elena, Romë. "Bëhet fjalë për neoplazi shumë të ndryshme që mund të lindin nga inde të ndryshme dhe organe të këtij grupi, nga lëkura, hunda, veshi, tiroidja, gjëndrat e pështymës, qafa, zgavra e gojës, faringu dhe laringu. Për shkak të këtij kompleksiteti, kurimi dhe asistenca e pacientëve kërkon patjetër përfshirjen e shumë figurave profesioniste që nga diagnoza: patologët, radiologët, mjekët nuklearë, radioterapistët, onkologët dhe kirurgët otorinolaringologë".

"Në aspektin e parandalimit," - vijon Spriano, që në javët e kaluara është emëruar dhe President i Kongresit Botëror, që do të mbahet në vitin 2022, -"shumë rrugë mbetet akoma për të përshkruar, mbi të gjitha për sa i përket parandalimit primar. Tumoret kokë-qafë në 75% të rasteve, mbi të gjitha janë në fakt të lidhura me abuzimin ndaj alkoolit dhe konsumit të duhanit. Në veçanti shqetësuese është duhanpirja që prek 26% të qytetarëve europianë: nëse 59% është përpjekur që ta lërë, vetëm 1 në 5 ia ka arritur me efektivitet që të heqë zakonin". Ndërsa për sa i përket "konsumit të alkoolit gjatë 25 viteve të fundit, ka pasur një zvogëlim, por në të njëjtën periudhë, vdekjet që i atribuohen abuzimit me të janë shtuar me 4%". Por një temë e rëndësishme për parandalimin është apeli i Spriano, "është pikërisht vaksinimi kundër Papilloma virus që duhet të bëhet te të gjithë adoleshentët dhe për të dyja gjinitë. Kjo profilaksi mjekësore mund të reduktojë në mënyrë drastike infektimet dhe kështu dhe riskun onkologjik", edhe sepse "infeksioneve nga HPV i atribuohen 50% e rasteve të karcinomës orofaringeale në Europë".

Ndër tematikat e tjera të ballafaquara gjatë Kongresit internacional, "është edhe robotika: në fushën kirurgjikale sot falë kësaj disipline mund të kryejmë ndërhyrje gjithmonë e më pak "invazive" dhe më të respektueshme se integriteti estetik dhe funksional në këtë zonë delikate të trupit". Përtej kësaj, një fokus i është dedikuar "imunoterapisë që po dëshmon se është vërtetë efikase dhe për tumoret kokë-qafë. Kjo konsiston në administrimin e barnave në gjendje që t'i lejojnë sistemit tonë imunitar që të njohë qelizat tumorale dhe t'i sulmojë ato, duke zhbllokuar aktivitetin e receptorëve që ishin inhibuar nga kanceri. Në diagnostikim kufiri i ardhshëm që duhet eksploruar përfaqësohet nga roli i të ashtuquajturës biopsi e lëngshme. Ky test inovativ lejon që të gjurmojmë markatorë si mikroRna, molekula shumë të vogla, mungesa apo shfaqja e të cilave, mund të tregojë mungesën ose përsëritjen e sëmundjes".

Përktheu: Erjola Taga