Të reduktojmë ankthin nga stomatologu

Efikasiteti i muzikoterapisë

Nga Figini Lara

Ankthi është një problematikë domethënëse në klinikat dentare dhe mund të prekë si të rriturit ashtu dhe fëmijët. Prek 10-20% të të rriturve dhe deri në 43% të fëmijëve dhe adoleshentëve (Gordon et al., 2013; Shim et al., 2015).

Pasojë e pashmangshme e ankthit dhe e frikës për trajtimet dentare është një sjellje neglizhence nga ana e pacientëve të prekur, për shëndetin e tyre oral që shfaqet duke shmangur klinikat stomatologjike.

Për pacientët shumë në ankth shpesh është konsideruar që t'i drejtohen sedacionit koshient bashkë me administrimin e barnave ansiolitike. Megjithatë shumë pacientë të rritur por mbi të gjitha prindërit e pacientëve pediatrikë të prekur nga "ankthi dentar" - preferojnë që të shmangin trajtime farmakologjike për shkak të risqeve mjekësore që lidhen me to.

Për të mos u neglizhuar, gjithashtu, është rritja domethënëse e kostove që lidhen me trajtimet stomatologjike kur duhet t'i drejtohemi sedacionit koshient. Për këto arsye, teknikat e menaxhimit të sjelljes janë gjithmonë e më të përdorura në këto raste dhe dëgjimi i muzikës për menaxhimin e ankthit është një nga këto ndërhyrje alternative gjerësisht e pranuar si nga prindërit, si nga pacientët pediatrikë, nga individë të rritur ashtu dhe nga profesionistët.

Tipologjia e kërkimit dhe mënyra e analizimit
Në një studim të publikuar në Oral Disease, prill 2018, rishikohen studimet kryesore të publikuara në literaturë mbi veprimet përfituese të dëgjimit të muzikës gjatë trajtimeve stomatologjike për menaxhimin e ankthit të pacientëve.

Nga një rishqyrtim i studimeve të rëndësishme, autorët kanë kërkuar që të theksojnë udhëzimet në fjalë.

Rezultate
Janë nxjerrë faktorët individualë që ndikojnë në përgjigjet e pacientëve ndaj muzikës:

• mosha dhe seksi
• funksioni konjitiv dhe kultura
• ashpërsia e ankthit
• familjariteti dhe preferencat muzikore
• marrëdhëniet personale me muzikën

Autorët në publikim kanë përpunuar një sërë udhëzimesh që mund të jenë në ndihmë të stomatologut:

1. T'i vësh pacientit të dëgjojë muzikën e tij të preferuar gjatë trajtimeve. Kjo i ngre humorin dhe është në gjendje që të mbajë vëmendjen te subjekti
2. T'i vësh pacientit të dëgjojë - në zhanrin e tij të preferuar muzikor - këngë qetësuese gjatë trajtimeve
3. T'i lejosh pacientit që të menaxhojë kontrollin e volumit, për të parandaluar bezdisjet dhe për të maksimizuar kontrollin e perceptuar
4. T'i lësh pacientit të zgjedhë nëse do të përdorë kufje apo nëse do të dëgjojë pa to. Edhe nëse kufjet mund të ndihmojnë në maskimin e "tingujve stomatologjik", mund të rrisin ankthin te pacientët duke penguar komunikimin me dentistin. Kur përdoren kufjet, volumi i muzikës duhet të mbahet i ulët që të mundësojë komunikimin me dentistin por në të njëjtën kohë duhet të garantojë mbulimin e duhur të "tingujve stomatologjikë"
5. Kohët e ndërhyrjes muzikore. Është e rëndësishme që dëgjimi i muzikës të fillojë para trajtimit stomatologjik, kur është e mundur. Kjo mund të ndihmojë në parandalimin e ankthit ndërsa pacienti është në sallën e pritjes
6. Duhet të ftohen pacientët që të përqendrohen në mënyrë aktive te pjesët muzikore që po dëgjojnë në vend që të dëgjojnë thjeshtë muzikën.

Konkluzione
Nga ky studim mund të përmbyllim se dëgjimi i muzikës mund të ndihmojë në reduktimin e ankthit që lidhet me procedurat mjekësore/stomatologjike dhe të bëjnë kështu më të menaxhueshme kurat.

Për të optimizuar impaktin e trajtimit, ndërhyrjet muzikore duhet të fillojnë që në sallën e pritjes.

Efikasiteti i muzikoterapisë është shpesh jo përfundimtar te pacientët shumë në ankth. Për këto individë autorët rekomandojnë që të merren në konsideratë këshillat e një muziko-terapeuti.

Implikimet klinike
Një metodë e thjeshtë, jo e kushtueshme dhe e realizueshme ne çdo kontekst stomatologjik për reduktimin e ankthit të pacientëve është muzikoterapia. Pjesa më e madhe e studimeve aktuale në literaturë për sa i përket kësaj është përqendruar mbi shpërqendrimin pasiv të muzikës te pacientët në ankth.

Për studimet e ardhshme do të ishte e dobishme që të hetonim dhe impaktin e ndërhyrjeve të muzikoterapisë që lejojnë një përfshirje më aktive të pacientëve në vetë-menaxhimin e ankthit të tyre.

Për më tepër:
• Gordon D, Heimberg R, Tellez M, Ismail A. A critical review of approaches to treatment of dental anxiety in adults. J Anxiety Disord 2013;27:365-78.
• Shim Y, Kim A, Jean E, An S. Dental fear and anxiety and dental pain in children and adolescents: a systemic revieë. J Dent Anesth Pain Med 2015;15:53-61.
• Bradt J, Teague A. Music interventions for dental anxiety. Oral Dis 2018 Apr;24(3):300-6.

Përktheu: Erjola Taga